Abeipa deita chatlaituhpa a châ
1 Atahmâ deikua cha hy Zakaw sahlao saih u, ABEIPA, nâmo châ taotuhpa nata hy Izarel sahlao saih u, nâmo cha paduatuhpa chata he tana heta a tah:” Chi khah u, ei cha chatlai haw ei hih, nama moh ta cha aw ei na ta, keima eih nama châ mâh tâh.
2 Tizy nama chakah nota chhao nama hnohta y aw na ta; chavahzy nama chakah nota chhao cha vao aw veih ei; mei liata nama sie palâh nota chhao kâpa ta y leipa aw eichi ta, mei palei ta kâpa ta y hra aw veih eichi.
3 Kei ABEIPA nama Khazohpa, Izrael sahlao Mo Pathaihpa, nâmo Pachhatuhpa châ tlôh na ta. Nama chatlaina châta Izi râh pie na ta, Ethiôpia nata Sheba râh zy cha nâmo vyuhpa ta ei pie.
4 Ei mohmô liata a sôh ngaitapa châ eichi ta, zachhih ngaitapa châ eichi ta, nâma kyh ei cha pachâ hrapa vâta, nâmo vyuhpa ta chyhsazy pie aw na ta, nama hrona vyuhpa ta chyhsa to ei pie aw.
5 Chi khah u, nama hnohta ei y mâ tâh; nama pathlazy cha nochhi lâ tawhta a vaw chhi aw na ta, notla lâ tawhta ei cha pakhy aw ei;
6 maw lâ hnohna chata, “Papua teh u,” tah aw na ta, chho lâ hnohna chata, “Pakhâ khah u,” ei tah aw; ei sawchanôzy cha kaoki tawhta a vaw chhi teh u,
7 ei moh a phaohpa maih nata ei rôhnahna awpa ta ei taopa maih cha âmo cha padua na ta,
8 Moh hnei tlôh ta, mochaopazy nata nah hnei tlôh ta, nahpâpazy cha a chhi teh u!
9 Phopi to apakhy ei sala, chyhsa to y pakhy ei se. Ama hry liata ahy e he he reih thei ta, cha hlâta hmozy maniah a pahnosa thei? Thai pachâsapa ta ama y theina awpa ta ama bie a pahnotuhpazy a vaw chhi mawh sy, cha vei khiahtala nah ta thei sala. Hmeihseihpa a châ’ tah mawh sy.
10 “Chyhsazy ta na pahno ei ta, na ngiapâ ei ta, ano cha ei châ tahpa ama pahno theina awpa ta nâmo he na pahnokheituhpazy nama châ, na chakaotuhpa ei tlypa chhao cha,” ABEIPA ta a tah. Ei y hlâta cha Khazohpa rai paduapa y leipa ei ta, ei y tawhta chhao y hra veih ei.
11 Kei, kei tlai he, ABEIPA cha ei châ, keima dei leipa ta cha pachhatuhpa hropa rai y veih ei.
12 Keima ta reih na ta, pachha na ta, pahnosa na ta; nâmo hry liana chata khazoh hropa rai ama y leipa kha; chavâta nâmo he bie na pahnokheituhpazy nama châ,” ABEIPA ta a tah.
13 “Kei cha Khazohpa ei châ, noh y rakha tawhna khata kei he ano cha ei châ; ei ku tawhta a pachha theipa ahy hmahta y veih ei; rai hria aw na ta, ahy e cha cha a phie aw?” tahpa ta.
14 ABEIPA nama Chatlaituhpa, Izarel sahlao Mo Pathaihpa chata he tana heta a tah: Nâmo vâta Babylaw lâna chata pheisaih sahlao tuah aw na ta, atâhna pâhchhôzy cha ei parao khai aw, Kaldia mozy cha amâ lyna balyhzy liana chata a râpa chyhsa a chhipa ta ei za chhihtha aw.
15 Kei he, ABEIPA nama Mo Pathaihpa, Izarel sahlao Taotuhpa, nama Beipa cha ei châ,” tahpa ta.
16 ABEIPA, tilaipi liata lâpi a taotuhpa nata ti ru ngaitapa zy ta lâpi a taotuhpa,
17 talaili nata arâ nata pheisaih sahlao nata hmotaotheina a chhituhpa chata chazy cha hmaohkha ta a zia ei ta, thyu khao aw veih ei; mo khai haw ei ta, poh kâ-u pachhaipa hawhta pachhaipa ta ama y haw, he tana heta a tah:
18 “Hmia lâta hmozy cha a thei thlâh ha leipa ula, hlâno ta hmozy cha pachâ hra khah u.
19 Pachâ teh u, hmo thiehpa ei tao aw na; atahmâ tlai heta a khai pathao hai; cha cha pahno aw vei eichi ma? Râhpathohpa lia tlai chhao lâpi tao aw na ta, râhchawhpa liata chavahzy ei tao hra aw.
20 Râhchawhpa liana chata chavahzy ei paysapa vâta lyurâhpa sazy chhaota eina palyupalih aw ei, sihâzy, pavawpizy taihta, cha cha ei chyhsa ei tlypa zy ta ama doh thei nawpa ta.
21 He chyhsa keima châta ei taopazy heta eina reithaina ei ama phuah thei nawpa ta.
22 “Châhrasala hy Zakaw sahlao y, nâmo ta pado tlôh leipa eichi ta; hy Izarel sahlao y, keima chakao awpa ta a pabua hoh tlôh lei khâh eichi ta!
23 Nama raopa hlânazy sahroh chyhpazy cha na vaw hlâ beih leipa eichi ta, nama atheihnazy chata na palyupalih beih hra veih eichi. Hmohlâpa ta cha chakaosa beih leipa ei na ta, deiryh ta nama rie cha patheisa veih ei na.
24 Basu rai tâkâ ta na chaleipa beih leipa eichi ta, nama atheihnazy thaw ta lôhrâ na patlôsa beih hra vei eichi. Nama moleinazy chhaota tlao na chakao eichi ta, nama hmoparaonazy ta nâmo ta ei rie eina pathei eichi.
25 “Kei, kei tlai he, keimasasy vâta nama taopasina zy a phihtuhpa cha ei châ, nama moleinazy chhao a thei thlâh ha aw va na.
26 Pachâ pathi teh u; pachâ khoh ei suh u; thai pachâsapa ta nama y theina hâh ta nama bie cha reih teh u.
27 Nama paw hmiatua chaipa khata molei haw ta, nama lyuhchâpazy chhaota kei lâta taopasi haw ei ta.
28 Chavâta nâ abeisawzy ta ei su pathaihpa papua palei ha ei ta, Zakaw sahlao cha raopathlahpa ta tao aw na ta, Izarel sahlao cha riethlapa ta ei tao hra aw.