Isai 42
Abeipa chakaotuhpa
1 Ei chakaotuhpa, ei duakheipa, ei tlypa, ei palôhrupa ta a ly ngaitapa he moh teh u; a chô liata ei Thlahpa ei soh haw; Zenitaizy lâta pie awpa ta a pachiana a puakhei aw.
2 Awh leipa aw ta, a ao papua hra leipa aw ta, othliah liata a ao cha patheisa aw vei;
3 lothi tli pa-ipa thlie pathlah leipa aw ta, pala khu chhao pachhai aw vei; pachiana cha bie hmeihseihpa ta a pua khei aw.
4 Ano cha thazei leipa aw ta, hnabeidypa ta y hra aw vei; alei liana heta pachiana a paysa hlâ lei cha; chatawhcha liahpahlôzy chata a ryhpa bie cha ama hâ thlâh ha aw.
5 Khazohpa, ABEIPA avâ a taotuhpa nata a paraituhpa nata a chhôh tawhta apuapa zydua a pakawtuhpa, a chô liata chyhsazy hnohta husona apietuhpa nata a chô liata a chareipa zy hnohta thlahpa a pietuhpa chata, he tana heta a tah:
6 Kei ABEIPA heta siana ta ei cha aw, na ku patu aw na ta, ei cha hrôbieh aw,
7 mochaopazy mo pavâhsa aw na ta, atâhpazy atâhna tawhta papua awpa ta nata zohna hryta atyuhpazy patâhna tawhta papua awpa ta chyhsa zy biehraina châta nata Zenitaizy a pakhaihtuhpa châta ei cha rao.
8 ABEIPA ei châ, cha cha ei moh a châ; ei rôhnahna he mo hropa hnohta pie leipa aw na ta, ei reithaina he khazoh nohthlahpa ataopazy hnohta pie hra aw va na.
9 Moh teh u, a hmiatuapa hmozy cha avaw tlô khai haw, hmo thiehpazy ei reih hih; a ri hlâta a thâtih ei cha chho ei hih.
Abeipa pachhana rôhnahpa reithaina
10 Tilaipi lâta a zupazy nata a chhôh liata a ypa zydua nata liahpahlôhzy nata a chô liata a ypa zydua saih u, ABEIPA reithaipa ta hla thiehpa sa ula, kaoki tawhta chhaota ano reithaina hla sa teh u.
11 Râhpathohpa nata a khihpizy chata ama ao papua mawh sy, Keda sahlao yna khihzy chata; Sela khih liata a pahrâpazy cha thaphapa ta sa ei sala, tlâh laki tawhna zy chata awh ei se.
12 ABEIPA cha parôhnahsa ei sala, liahpahlôzy liana chata ano reithaina bie chho ei se.
13 ABEIPA chata chyhsa thatlô ngaitapa hawhta pua aw ta, adyuhpa chyhsa hawhta hiatliana a pathyu aw; a paropa ta a awh aw; ano khakhaipazy chô liana chata thatlô ngaitapa ta a tlie aw.
14 Bopi a chalih haw na ta, y molopa ta ei maoh-oh lyliah tyh, atahmâ deikua cha chanô sawzeipa hawhta aw aw na ta; ei hu ei tô paliepalâ hra aw.
15 Tlâhzy nata a byuhpazy cha roryhrapa ta paysa aw na ta, sipopa zydua cha ei pachawh khai aw; chavahzy cha râhchawhpazy ta tao aw na ta, ti-opazy cha ei pakua aw.
16 Mochaopazy cha ama pahno beih leipa lâthlôh liata a vaw chhi aw na ta, ama pahno beih leipa lâthlôhzy liana chata ei chhi aw. Ama hmiakô liana chata zohna cha khaihna ta tao aw na ta, lâpi a kohpazy cha ei patlâh hra aw. Cha hmozy cha tao aw na ta, âmo chhao pathlua aw va na.
17 Khazoh nohthlahpa a taopazy ngâpa ta khazoh nohthlahpa leipa hnohta, Nâmo cha eima khazoh nama châ,” a tahtuhpazy cha pakuasapa ta y aw ei ta, thata ama maohphyuh aw.
Izarel sohsi theipa a châna zie
18 Nahpâpa saih u, thei teh u; mochaopa saih u, nama hmô theina hâh ta, moh teh u.
19 Ei sei leipa ta cha ahy e a mo a chao? Cha vei khiahta ei lyuhchâpa ei tuapa hawhta ahy e a nah a pâ. Nâ ryhtuhpa hawhta ahy e a mo chaopa ta, ABEIPA sei hawhta ahy e a mo a chao?
20 Hmo hluhpi hmô ta, châhrasala na pathilôh liata a vao thlâh ha tyh va chi; a nahzy a â ta, châhrasala thei tyh vei.
21 Ryhpa cha siana vâta palaipa ta châ ta, za pachhihsapa cha ABEIPA châta â lyna zie châ ta.
22 Châhrasala he chyhsazy he parutuhpa parupa nata hraona a tyh hawpa zy châ ei ta; khaotlô liata a tlapa zy châ khai ei ta, atâhna ozy liata khôpa châ khai ei ta; hrao awpa châ ei ta, ahy hmah pachha tlôh leipa ei ta, hrao awpa châ ei ta, ahy hmah ta “Pie heih teh,” tah tlôh leipa ei ta.
23 Nâmo hry liana heta chazy liana cha ahy e nah a pachôh awpa a y? Daihti a vaw tlô awpa chata nahthliepa ta a thei awpa ahy e a y?
24 Ahye Zakaw sahlao hraona châta pie ta, Izarel sahlao parutuhpa zy hnohta a pie? ABEIPA, a chô liata hmo eima paraona châta a piepa châ vei ma? A lâpizy liana chata sie khoh tlôh leipa ei ta, a ryhpa bie a ngiah hra veih ei.
25 Chavâta a hiehâhna ru ngaitapa nata adyuhna thatlôna cha âmo chô liata leitha ta; cha chata âmo sahlao cha raopa ta y ei ta; châhrasala pahno tlôh leipa ei ta; cha chata âmo sahlao cha kâ ta; châhrasala ama palôhrupa ta pachâ tlôh leipa ei ta.