Izarel hnohta Khazohpa bietaina
1 Hy liahpahlôh saih u, ei hmiakô liana cha sidiapa ta y teh u; chyhsa to chata ama tha tlô pathi heih ei sala; a vaw hnia chyu ei sala, cha hnôh lâna chata reih ei se; pachia awpa ta a hnia rairieh ei suh u.
2 Nochhi lâ tawhta chyhsa pakha siana vâta a phei thaby liata a awpa cha ahy e a pahra? Ano chata phopizy a hmiakô liata li ta, abei sahlao chô liata ryu pareisa ta; arao cha dohlei hawhta a zaozi hnohta pie ta, sâh sihpa thlih ta a phaohpa hawhta a libaw hnohta pie hra ta.
3 Ano chata âmo sahlao a chadai ta, a bohpa ta sie lymâ ta; a phei ta a sie beih leipa lâpi liana chata.
4 A thaona tawhta chhâ zydua aw pata, ahy e hriapa ta a paloh? Kei, ABEIPA, hmiatua chaipa nata hnôh chaipa hnohta a ypa hih; a tahtuhpa cha ei châ.
5 Liahpahlôzy chata hmô ei ta, chi ei ta, kaokizy cha a chalyu ei ta; a vaw hnia ei ta, a vy ei ta.
6 Chyhsa to ta âmo viasazy bao ei ta; chyhsa to ta âmo unawhzy hnohta, Thlahlôhpa ta y teh!” tah chyu ei ta.
7 Zôthaipa chata ngôh a daihpa pasyu ta, syulô ta mihpa ta a daihpa chata syuphaw lô liata a daihpa pasyu hra ta, a baipana lâna chata, “A phana,” tah ta; chatawhcha a chalyu lei awpa ta khaipâna zy ta liahsa khaipâ ta.
8 Châhrasala nâmo, Izarel sahlao ei chakaotuhpa, Zakaw sahlao ei tlypa, ei viasa Abaraha pathla saih u;
9 Nâmo leilô chhâna tawhta ei chhipa, ei ki tawhta ei awpa, nama hnohta, Ei chakaotuhpazy nama châ, thy pathlah leipa ta tlao ei châ tlyh ei, ei tahpa saih u
10 chi khah u, kei nama hnohta y tlôh na ta, nôpopa ta y khah u. Kei nama Khazohpa châ tlôh na ta; tha cha patlô aw ei na ta, ei siana ku chachâh lâta ei cha patu thlâh ha aw ei.
11 Nama chô liata palôh châ leipa zydua chata nozapa ta nata maohphyuhpa ta ama y aw; nâmo cha eituhpazy cha khâpa hmah châ leipa hawhta châ aw ei ta, ama leidia aw.
12 Nâmo châ eituhpazy cha tlua aw eichi ta, hmô aw vei eichi; nâmo châ dyutuhpazy cha khâpa hmah châ leipa hawhta châ aw ei ta, hmo a y leipa hawhta deita ama châ aw.
13 Kei, ABEIPA nama Khazohpa heta, Chi khah u, ei cha bao aw ei, nama ku chachâh lâ cha patu tlôh aw ei na ta,” ei cha tah haw ei hih.
14 Nâ, Zakaw châkariepa nata Izarel a chyhsa saih u, chi khah u! Ei cha bao aw ei, ABEIPA ta a tah. Nâmo châ chatlaituhpa cha Izarel sahlao Mo Pathaihpa cha a châ.
15 Pachâ teh, sâh tlyna chhaichhi tiah ngaitapa a bâh a hneipa ta ei cha tao aw ei; tlâhzy cha tlypa ta pazao aw eichi ta, tlâh byuhpazy cha sâh sihpa hawhta nama tao aw;
16 zi aw eichi ta, thlih ta phaoh aw ta, khisô ta a papai aw. Chatawhcha ABEIPA liana chata aly aw eichi ta, Izarel sahlao Mo Pathaihpa cha nama parôhnahsa aw.
17 Sipasapa nata dyhchhiepazy chata ti tlua tyh ei ta, y tlôh leipa ta, ama palei cha dâhphina ta a chawh khai ha tyh, kei ABEIPA heta âmo cha a chhy aw na ta, kei Izarel sahlao Khazohpa heta âmo cha siesai aw va na.
18 Tlâh sâhpa khâpa hmah a y leipa liana cha chavahzy palosa aw na ta, saikao liah liana zy chata tihnawh ei palosa hra aw; râhpathohpa cha ti-opa ta tao aw na ta, râh chawhkaraipa cha tihnawh ta ei tao hra aw.
19 Râhpathohpa liana chata sidy tho zy, akeisa tho zy, myrtle tho zy, ôli thozy loh aw na ta; râhpathoh chawhkaraipa liana chata meisa zy, meisa chi nanopa zy, sidy chi nanopazy hmaokha ta ei loh aw;
20 ABEIPA ku chata chazy cha a tao tahpa nata Izarel sahlao Mo Pathaihpa chata a tao tahpa hmôpa ta pahnopa ta pachâpata ama pahno thei chyu nawpa ta.
Khazoh do leipazy hnohta Abeipa pahaona
21 Nama bie cha vaw reih teh u, ABEIPA ta a tah; namâ einazy cha palâsa teh u, Zakaw sahlao Beipa ta a tah.
22 Cha nohthlahpazy cha a vy ei sala, hmo vaw tlô awpa zy cha chhochhielie ei se. Cha hlâta hmozy cha khâpa e a châ tahpa phuah ei sala, chatanachata pachâna zy eima hnei thei nawpa ta, cha vei khiahta hmo a vaw tlô awpazy cha pahnosa teh u.
23 Khazoh nama châ tahpa eima pahno thei nawpa ta he tawhta hmo a vaw tlô awpa zy cha reih teh u; eima nôpona awpa nata eima moh chyu nawpa ta hmophapa tlyma, hmopha leipa tlyma tao teh u.
24 Khâpa hmah châ vei eichi, nama hriana chhao khâpa hmah châ hra vei; nâmo châ tlyhtuhpazy cha pasichhihpa ama châ.
25 Maw lâ tawhta chyhsa pakha pathyu na ta, ano cha a vaw tlô haw, noh chhina tawhta ei moh a pado tuhpa cha; ano chata alô baipâna hawhta ryureituhpa zy taotia aw ta, beihvituhpa ta beihlei a tlypa hawhta a tly hra aw.
26 Eima pahno thei nawpa ta ahy e athaona tawhna kha ta a reih bâ tly? A pahnosapa rai y veih ei, nama biereipazy he a theipa rai y veih ei.
27 He liana heta Zaio chata biereikheituhpa tuah awpa cha a y, Zerusale chata vaituh awpa ryraotuhpa cha ei rao.
28 Ei vaw mo nata chyhsa rai y leipa ei ta; âmo ei hiahri nata ama hry liata ryraotuhpa bie miakha a chhy theipa ahy hmah ta y vei ei.
29 Moh teh u, ama zydua ta ama raihria zy cha hmo hrao leipa sai, khâpa hmah a châ leipa a châ; ama nohthlahpa leipazy cha thlih nata a ruapa deita a châ.