Zaio hnohta Abeipa thlahpalôhna biezy
1 Thlah palôh teh u, ei chyhsazy he, thlah palôh teh u, nama Khazohpa ta a tah.
2 Zerusale sahlao hnohta thlah palôhna lâta bie reih ula, ama dyuhna cha pakipa ta y ta, ama hmoparaona cha a ngiahthaipa châ ta; ama moleina zydua vyuhpa ta ABEIPA ku tawhtapa a lie no ta ama hmô haw tahpa chho teh u.
3 Awtuhpa ao chata: “Râhpathohpa liata ABEIPA lâpi a chhuahdy ula, râhchawhpa liata eima Khazohpa châta lâlai paryh teh u.
4 Saikao to pasâhpa châ khai aw ta, tlâh to a byuhpa pahnaipa a châ hra aw; lâpi a kohpazy patlâhpa châ aw ta, a byuhpa zy pamihpa a châ hra aw.
5 Chatawhcha ABEIPA rôhnahna cha paluahsapa châ aw ta, chyhsa zydua ta cha cha ama hmô chyu aw, ABEIPA pakah chata reih haw tlôh ta,” tah ta.
6 Ao chata, “Awh teh!” a tah chu. Kei chata, “Khâpa bie reipa ta e ei awh aw?” tah na ta. Chyhsa zydua sibiepa hawhta châ ei ta, ama phana kyh zydua chhao sibiepa paw hawhta a châ.
7 ABEIPA hu chata a hmôpa vâta sibiepa cha uah ta, a paw cha a lo tyh; chyhsazy cha sibiepa hawhta ama châ tlai na.
8 Sibiepa cha uah ta, a paw cha a lo tyh; eima Khazohpa bie deikua cha chhâzaw ta a y thlâh ha aw.
9 Hy Zaio lâta thâtihpha a chhotuhpa, tlâh sâh ngaitapa liana khita khy teh;hy Zerusale lâ thâtihpha a chhotuhpa, a paro ngaitapa ta na ao papua teh, papua teh, chi khâ, Zudah khihzy chata, Moh teh nama Khazohpa hih!” tahpa ta.
10 He liata Abeipa KHAZOHPA cha chyhsa thatlô ngaitapa hawhta a vy aw hih, a bâh chata ano vyuhpa ta ryu a reih aw; moh teh u, a lymâ cha a hnohta a y hih, a thôhna cha a hmiakô liata y hra ta.
11 Ano chata mietahkuvaihtuhpa hawhta ano sa zaw cha pasa aw ta, mietahkupa tawzy cha a bâh ta a pyh aw ta, a kalachhôh liata sopa ta siekhei aw ta, ataw a chhipazy cha dusawta ta a chhihtha aw.
Izarel pakhopâ thei leipa Khazohpa
12 Ahy e tizy cha a ku pazah ta panuapa ta avâ khi a kha ta thliepa ta alei liata dohlei he panuana miakha ta liata panuapa ta, tlâhzy cha khopathliana ta pathliahpa ta tlâh byuhpa zy cha pathliahna ta a pathliah tly?
13 Ahyma ABEIPA Thlahpa cha tao awpa a chho tly, cha vei khiahta ahy e aryhna a raopatuhpa châpa ta ano a pachu tly?
14 Ano chata ahyma a novâh nawpa ta a chhohia ta; ahyma ano cha siana kyh lâpi pachu ta, pahnona kyh pachupa ta, novâhna kyh a pamosa beih tly?
15 Pachâ teh, phopi cha râvâ byh liata ti di kha hawhta deita châ ei ta,khopathliahna liata a didâpa a baipa hawhta deita ta raopa ama châ; pachâ teh, liapahlôzy cha hmo chyhpa ta hawhta a lâ thlâh ha ta.
16 Lebanaw tlai chhao cha mei liata ti khi châ leipa ta, a râh liata sahrohzy chhao a raopa hlâna khi châ hra vei.
17 Phopi cha a hmiakô liata khâpa hmah châ leipa hawhta châ ei ta, ano pachâ ta cha khâpa hmah châ leipa hlâta, a chyh viapa a ruapa dei châ ei ta.
18 Khazohpa cha ahy nata e namâ pakho aw tly? châ vei khiahta khâpa nohthlahpa e ano nata namâ pakho aw tly?
19 Khazoh nohthlahpa he raihriatuhpa châta tao ta, ngôh a daihtuhpa châta ngôh ta pahu ta, chatanachata tâkâ bâlia zy a lei hra.
20 Cha hawhpa hmo piepa pie thei leipa ta sipasa tupa chata tho a hmy lei awpa a tlyh tyh; khazoh nohthlahpa a taopa a chalyu lei awpa ano chata a taopa tuh awpa zôthaipa a tlua tyh.
21 Nama palôhrupa ta pahno beih vei eichi ma? Nama nah ta thei beih vei eichi ma? A thao tuana tawhna khata cha chho veih ei ma? Leilô bô tua no tawhna khata pahno thai vei eichi ma?
22 Ano cha leilô padôna chô liata atyuhpa cha a châ, a mohmô liata alei chôta a ypa sahlao cha khawsu hawhta deita châ ei ta; ano cha avâ khi poh paraipa hawhta pakaipa ta, poh-o pahrâna awpa ta paraipa ta;
23 abeisawzy khâpa hmah châ leipa ta a tao tyhpa cha a châ, ano chata alei liata a pachiatuhpazy cha a ruapa lâta a tao tyh.
24 A lopa châ veih ei, a tupa châ veih ei;ama kô chata alei liata thari thla vei; cha leipa chhao cha ano chata âmo sahlao cha a hu ta hmô ta, uah ei ta, khisô ta sa sihpa a phaohpa hawhta a phaoh tyh.
25 Ahy nata ma na pakho eichi ta, ahy tlu deita ta ma eina rao aw eichi, Mo Pathaihpa chata a tah.
26 Chô lâna khi ta nama mozy ua ula, khizy khi ahy taopa e a châ moh teh u? Ano chata zawpizy khi a pazi lymâpa ta paysa tyh ta, ama moh chyu ta aw tyh ei ta; a thatlôna rôhnahpa vâta nata hmotaotheina lâta thatlôna vâta miakha hmahta a ki leipa y beih veih ei.
27 Khazia e hy Zakaw sahlao, he hawhna heta nama tah, khazia e hy Izarel sahlao, he hawhna heta nama reih?” Ei lâpi he ABEIPA tawhta nyupa châ ta, eina pachiana he ei Khazohpa tawhta lapa ta a châ haw,” tahpa hih?
28 Nama palôhrupa ta pahno beih veih eichi ma? Nama nah ta thei beih veih eichi ma? Tlyzaw Khazohpa, ABEIPA kaoki Taotuhpa cha. Panao beih leipa ta a tha a zei beih hra leina zie he, a novâhna zie cha a laichadai theipa rimâ châ vei.
29 Panaopa hnohta hmotaotheina pie ta, thatlôna rai a hnei leipazy cha tha a patlô tyh.
30 Satliapazy tlai chhao panaopa ta ama tha zei aw ta, satliapazy chhao ama pao pathlah aw;
31 ABEIPA a hâtuhpa zy deikua chata ama thatlôna pathieh aw ei ta, pahmôpi hawhta mathlaw ta a zaw aw ei ta, riethei leipa ta a râ aw ei ta, panao leipa ta phei ta ama sie aw.