Babylaw tawhta vyuhtuapazy Hezekiah ta â pyh ei (2Ab 20:12-19; 2Tr 32:27-31)
1 Cha nona chata Balada sawchapawpa Babylaw bei Merôdabalada chata chazy nata lymâ Hezekiah lâta paphao ta, a pasa tahpa nata a tlâh haw heihpa a pahnopa vâta.
2 Hezekiah cha ama chô liata a ly ta; ama hnohta a hmo sôhpa sona o zy, tâkâ zy, ngôh zy, khâpaleipa rohpahâhpa zy, sathaw sôhpa zy, adyuhna chhaichhi sona o chhôh zydua, a ryu phapa hry liata a ypa zydua cha pamosa ta. A o liatahpa nata a râh chhôh liatahpa Hezekiah ta a pamosa leipa hmo rai y vei.
3 Cha nona chata hrohsopa Isai cha Abei Hezekiah lâta a vy ta a hnohta, “He chyhsazy heta khâpa e ama reih? Khataih tawhta e nâ lâta amâ vy?” tah ta. Hezekiah chata, “Râh hlapapi tawhta Babylaw râh tawhna tlai chata kei lâta amâ vy,” tah ta.
4 Isai chata, “Na o liana heta khâpa e ama moh?” tah ta. Hezekiah chata, “Ei o chhôh liata a ypa zydua cha ama mo khai haw; ei ryu phapazy hry liata ei pamosa leipa khâpa hmah y vei,” tahpa ta a chhy ta.
5 Chatanachata Isai ta Hezekiah hnohta, Pheisaihzy ABEIPA bie he vaw thei teh.
6 Na o chhôh liata a ypa zydua nata he noh taihta na mahpawzy ta ama pachô pakhypa zy cha Babylaw râh lâta siekheipa ta a y khai aw; khâpa hmah siesaipa ta y aw vei, cha hawhpa nohzy cha a vaw tlô aw, ABEIPA ta a tah.
7 Chatawhcha na sawchapawpa nâ tawhta a vaw pua awpazy hry liatahpa tlai cha ama siekhei aw; âmo cha Babylaw beipa o liana chata hrilyupa ta ama y aw, a tah,” tah ta.
8 Hezekiah ta Isai hnohta, “ABEIPA bie na reipa he a pha na,” tah ta. Ano lilaw chata, “Ei hro chhôh heta adyhna nata hmeihseihna y tlôh aw ta,” tah hra ta.