Hezekiah pasana (2Ab 20:1-11; 2Tr 32:24-26)
1 Cha nona chata Hezekiah cha thi daihmâpa ta pasa ta. Amôza sawchapawpa hrohsopa Isai cha ano lâ a vy ta a hnohta, “ABEIPA chata he tana heta a tah: ‘Na chhôhkhazy khihsana zie awpa paryh teh, thi tlôh aw chi ta, hroh aw va chi,’ tahpa ta,” tah ta.
2 Chatanachata Hezekiah cha pâhchhô lâ aheihpa ta a palie ta, ABEIPA lâta thlah chhâ ta,
3 Atahmâ, hy ABEIPA, na hmiakô liata hmeihseihpa nata pathipalôh pha pakipa phaohpa ta ei y tyhna zie nata na mohmô liata hmophapa ei tao tyhna zie kha ngiachhiepa ta a thei thlâh ha mah y,” tahpa ta. Chatawhcha Hezekiah cha thata cha ta.
4 Chatanachata ABEIPA bie cha Isai hnohta vaw tlô ta:
5 “Sie la, Hezekiah hnohta reih teh, ABEIPA nama mahpaw Davi Khazohpa chata he tana heta a tah: ‘Na thlahchhâna thei na ta, na mothlihzy chhao hmô na ta; na hro chhôh nohzy he kô hrawhleipangawh ta ei pasihsa aw.
6 Chatawhcha nâ nata he khihpi he ei hrôbieh aw, tah ta.
7 Isai ta Hezekiah hnohta, “ABEIPA ta a hmo reipa he a tao tlai aw tahpa, he he na châta ABEIPA tawhta pahnona cha a châ aw;
8 mo tua, pheibu liata nohpahlipa hao Ahaza dawh pahnona liata nohpahli a ypa pahnaipa ta a pahnona liata pheibu sâhrawh taihta ei pakuasa heih aw, a tah,” tah ta. Chatanachata noh cha a hnai hawna dawh pahnona liana” chata nohpahlipa cha pheibu sâhrawh taihta kua haw heih ta.
9 Zudah beipa Hezekiah hla, pasana tawhta a tlâh nata a rôhnah zie cha
10 Ei hro chhôh nohzy locho nona heta thlâ chhikaozy liana chata a ngia aw na ta; ei hro chhôh kô a y awpa zy chhupa ta ei y haw, tah na ta.
11 ABEIPA, ABEIPA tlai cha a hrohpa râh liana heta hmô khao leipa aw na ta; khizaw liata a ypazy hry liana heta chyhsapa hmô heih khao aw va na.
12 Ei yna he pasiepata y ta, mietahku vaihtuhpa poh-o hawhta ei tawhtapa lapa ta a y haw; poh satuhpa ta a poh a chatypa hawhta ei hrona he chaty na ta; ano chata thaisana tawhta na tai pachhô aw ta; nâ ta noh kha nata zâ kha hmo liata eina pachha aw chi hih, tah na ta.
13 My taihta a thlih lyliah na ta; chakeibarôhneipa hawhta ei ru zydua thlie khai na ta; nâ ta noh kha nata zâ kha hmo liata eina pachha aw chi hih.
14 Sivia tlyma, vawpô tlyma hawhta sâh na ta; vachhuh hawhta a rôh na ta. Chôlâ sai nawpa ta ei mozy cha zoh haw ta. Hy ABEIPA y, pasaipa-ipa ta ei ypa he; nâ cha ei bohna châ mah y!
15 Khâpa e ei reih aw? Ano chata ei hnohta reih ta, ano tlai ano lilaw ta tao haw hra ta. Ei hrona hupona vâna khata ei hro chhôh kô zydua liana chata dusawta ta ei sie ha aw.
16 Hy ABEIPA, ei thlahhmipa cha na hnohta hroh aw ta, ei thlahpa cha pahâsa la; na patlâh la, hrona na pie mah y.
17 Pachâ teh, thlahlôhna chata hupona thata ei hnei; châhrasala na châta ei hrona kyh na pachâpa vâta, paraona khaotlô tawhtapa cha na pachha haw; ei molei zydua kha na hnôh lâ chata thy khai haw tlôh chi ta.
18 Sheôl heta cha reithai thei tlôh leipa ta; thina heta cha palyupalih thei hra vei; khaotlô liata a zupazy chata na bie hmeihseihpa cha ama hnabei sei thei vei.
19 Chyhsa a hrohpa ta, chyhsa a hrohpa ta, he noh liata ei taopa hawhna heta ama cha reithai aw; paw chata a sawzy hnohta na bie hmeihseihpa cha a pahnosa aw.
20 ABEIPA cha na pachha awpa ta a mâ thlâh haw; chavâta ei hro chhôh zydua ABEIPA o liana chata ei hlazy he totâ ri a hneipazy chhaota eima sa aw.
21 Chatawhcha Isai ta theiku tlâ bai awpa ta âmo chho ta; chatanachata theiku tlâ kha la ei ta, a kheihluh liata bai ei ta, chatanachata vaw tlâ ha ta.
22 Chatawhcha Hezekiah chata, ABEIPA o lâta ei khy heih aw tahpa pahnona khâpa pahnosana e a vaw y aw?’ tah ta.