Khazohpa chyhsa kua heihna
1 Râhpathohpa nata su chawhkaraipa cha a ly aw ta,leisadi su cha thaphapa ta rose paw hawhta a pawh aw.
2 A paw lochopa ta y aw ta, thaphapa nata hla sapa ta a ly aw; Lebanaw rôhnahna cha a hnohta piepa a châ aw, Kamel nata Sharaw a ngiana chhaota ABEIPA rôhnahna ama hmô aw, eima Khazohpa a ngiana chhaota.
3 Ku thatlô leipazy cha tha patlô ula, pakhu chieh leipazy cha pa-i teh u.
4 Pathipalôh riahchhiepazy hawhna chata, Thatlô ngaitapa ta y ula, chi khah u! Pachâ teh u, nama Khazohpa cha phulana chhaota a vy aw, Khazohpa viarithôna chhaota a vy aw ta, a cha pachha aw ei,” tah teh u.
5 Cha tina chata mochaopazy mo cha pavâhsapa ta y aw ta, nahpâpa zy nah cha pavâsapa ta a y aw
6 cha tina chata pheisypa zy cha sakhi hawhta a chapie aw ei ta, reih a pathlie thai leipazy paleih cha thaphapa ta a sa aw. Râhpathohpa liana chata tizy vaw pua hôlô tlôh aw ta, leisadi bypizy liana chata vatie ti avaw pua hôlô hra aw
7 leisadi sa ngaitapa su cha tipo lâta a lie aw ta, chhaolei dâhphi ngaitapa cha tihnawh lâta a lie aw; sihâ pahrâna liata amâ ziana liana chata sibiepa, lothi nata maitanô chhaota a y aw.
8 Chatawhcha cha liana chata lâlai a y aw, lâthlôh chhaota cha cha “Pathaina Lâpi,” bi aw ei ta; chyhsa pathaih leipa cha cha liana chata sie aw veih ei; khi a tlyhpazy, ahrupazy chhao cha liana chata sie beih hra aw veih ei.
9 Chakeibarôhneipa rai cha liana chata y leipa aw ta, sahrâhpa rai cha liana chata khy hra aw vei; cha liana chata hmô awpa chhao y aw vei, chatlaipazy deikua cha cha liana chata tlao ama sie aw.
10 ABEIPA chatlaipazy cha kua heih aw ei ta, hla sana chôta ama Zaio tlô aw ei ta; chhâzaw alyna ama luh chô liata a y ha aw; thaphana nata alyna hmô aw ei ta, pachârôhna nata a rôhna cha a lei ha aw.