Isai 34
Phopizy nata Edôma chôta Abeipa hiehâhna
1 Phopizy saih u, nah ta thei awpa ta a vaw hnia teh u, chyhsa to saih u, nahthlie teh u! Alei nata a chhôh liata a ypa zydua chata nahthlie mawh sy; khizaw nata a chhôh tawhta a puapa zydua chhao.
2 ABEIPA pathi-iana kyh chata phopi zydua chô liana chata palôh châ leina hnei ta, ama pheisaih zydua chô liana chata pathi-iana hnei tlôh ta; âmo cha liahsa pahleipadia khai haw ta, thiepa ta pie haw ta.
3 Ama hry liata thiepazy cha thypa ta y aw ei ta, ama ri roh chhiepa cha pua aw ta; tlâhzy cha ama thisaih ta palosapa ta a y aw.
4 Avâ zawpi zydua khi patlôpa ta y aw ei ta, avâ khi châbu lopa hawhta lopa ta y aw ta. Zawpi zydua khi krezôh tawhta a hna uah ta, a zô tyhpa hawhta nata theiku kô tawhta a hna uah ta, a zô tyhpa hawhna heta uah khaipa ta ama tla khai aw.
5 Ei zaozi chata avâ liata lôhrâtlôpa ta do haw tlôh ta; pachâ teh, cha cha pachia awpa ta Edôma sahlao chô liata nata chhie ei sapa chyhsa chô liana chata a zu aw.
6 ABEIPA zaozi cha thisaih lôhrâtlôpa ta y ta, a thawna ta pathawpa ta a y haw, mietahkupa tawzy nata miezy thisaih ta, mietahkupa tôhpa lôpo thawzy ta. ABEIPA chata Bôzrah khih liana chata atheihna hnei ta, Edôma râh liana chata thina rarôh y ngaitapa hnei hra tlôh ta.
7 Châhrasala chaoliah tôhpa zy vyuhpa ta, phopizy pao ei ta, viahchao tôhpa zy vyuhpa ta, pho thatlôpa. Ama râh cha thisaih pari aw ta, ama dohlei cha thawna ta pathawpa ta a y aw.
8 ABEIPA phulana noh cha hawh tlôh ta, Zaio pabohsatuhpa kyh liata viarithôna kô cha.
9 A chavah tizy cha chathli lâta pachâsapa ta y aw ta, a dohlei cha kai lâta pachâsapa ta y hra aw ta; a lyurâh cha chathli kâ ngâpa lâta a lie aw.
10 A chhô a zâ ta pachhaipa ta y leipa aw ta; meikhuh cha chhâzaw ta kiah aw ta. Chhâ y chhôh zydua ta roryhrapa ta y aw ta. Tlyzaw nata tlyzaw ta ahy hmah ta chapia aw veih ei.
11 Vawpô nata sawku ta cha râh cha tlao hnei aw ei ta, vaku nata ra-awh chhao cha liana chata ama pahrâ aw, patypamâna ri nata ruana padonari cha a chô liata a parai aw.
12 Cha su liana cha ahy hmah abei y leipa aw ei ta, ama abeisaw zydua cha khâpa hrao leipa ama châ aw.
13 Ama o rôhnahpa zy liana chata ahlohzy pyuh aw ta, ama kuhzy chhôh liana chata thlabei nata bôhbawzy a pyuh aw. Sihâ yna châta nata pavawpi zy chata o dôhpachhôh tlymia a châ aw.
14 Râhpathohpa liata râh sazy cha changiezy chhaota a tyh aw ei ta, syukipa chata a viasa aw aw ta; zâ chichhihpa chata cha liana chata yna ta tao aw ta, ano chata a pahâna su awpa a hmô aw.
15 Cha liana chata tutahlupa ta a bu tu aw ta, a tih thla aw ta, kei aw ta, a tlô aw; cha liana chata hmôchhizy cha kaolâhpa hnei chyupa ta ama y pakhy aw.
16 ABEIPA châbu liata tlua ula, reih hra teh u; chazy hry liana chata miakha hmahta a ki leipa y leipa aw ta, miakha hmahta a kaolâhpa a hnei leipa y aw vei. Ei pakah tlaita bie pie ta, a Thlahpa tlaita chazy cha pahmaohpakhy tlôh ta.
17 Ano chata ama châta pachaopa ta, a ku ta khawhri ta thliepa ta lyurâhpa cha rai pa chyu ta; chhâzaw ta hnei aw ei ta, chhâ y chhôh zydua ta cha liana chata ama y aw.