Abeipa ta pachhana a tlôkhei aw
1 Na pahleipadiana a tyh beih tlôh lei pa ta, pahleipadiatuhpa, piehpie ngaitapa ta taopa a tyh tlôh leipa ta; piehpie ngaitapa ta a taotuhpa, na hu a po na! Chyhsa pahleipadiana na ba tita, pahleipadiana a tyh hra aw chi ta; na chô liata piehpie ngaitapa ta ama tao hra aw.
2 Hy ABEIPA, zawh maniah a ngiah mah y; eima cha hâ thlâh ha hih. My tato ta ama bâh vaw châ la, nôpona daihti liana chata eima pachhana vaw châ hra mah y.
3 Patypahreina pyu ta chyhsa a râ ei ta, nâma tlai na thyu nona chata phopi papaisapa ta y haw ei ta;
4 nama hraona hmo cha changyu pahlyna hawhta pahlypa ta y aw ta;" khawsuzy a chavia silipa ta a râpa hawhta, ano ta âmo chô liata a râ aw ta.
5 ABEIPA cha parôhnahsapa ta y haw ta, chô lâna khi ta y tlôh ta; ano chata ano cha pachiana siana nata siana ta pabie ta;
6 na hro chhôhna chata a ina y aw ta, pachhana zy, sona zy, pahnona zy y aw ta; ABEIPA china cha a ryu by a châ.
7 Pachâ teh, ama riaphapazy cha khôtho lâta awh ei ta; a ryhna lyuhchâpazy cha cha ei ta.
8 Lâlaizy cha pathaihparohpa ta y ta, khitlyhpa chyhsa cha y khao leipa ei ta. Ano chata biehrai cha parao ta, khihzy cha mohnao ta chyhsa pachâ hra vei.
9 Râh cha mâchhiesapa ta panao ta, Lebanaw cha noâhpa ta uah ta; Sharaw cha râhpathohpa hawhta châ haw ta; Basana nata Kamel cha ama hnazy chakhy ei ta.
10 “Atahmâ cha thyu aw na ta, ABEIPA ta a tah,” atahmâ cha hria aw na ta; atahmâ cha parôhnahsapa ta ei y aw.
11 Saviah phaoh aw eichi ta, ei husona cha mei hawhta cha kâ patlô awpa a châ.
12 Chyhsa tozy cha chinai lôraopa hawhta vaw châ aw ta, ahloh chhawh chiehpazy hawhta mei liata raopa ta ama châ aw,” tah ta.
13 A hlapi ta a ypa saih u, ei hmotaopa he nahthlie teh u; a hniapa ta a ypa saih u, ei hmotaothei zie he pahno teh u.
14 Zaio liata moleipa a ypazy chata chi ei ta; Khazohpa a za leipa chyhsazy cha a chalyuna ta patu haw ta. Eima hry liata ahy e kâ a hmâhpa kei liata a y aw tly? Eima hry liana heta ahy e tlyzaw a kâpa liata zy a y aw tly?
15 A sia ngaitapa ta charei ta a do ngaitapa ta a rei tyhpa, pasaipa-ina zy a thôkheina rai a khoh leipa ku phai chipa ta, thisaih palona kyh nahthlie khoh leipa ta nah a chahupa, moleina rai a moh khoh leipa mo apasotuhpa cha,
16 ano cha chô lâta pahrâ aw ta; ano riahvaina su cha lôpanô kuhzy châ aw ta; a pati cha a hnohta piepa châ aw ta, a tizy cha a y thlyu aw.
17 Na mozy chata abei cha a ngiana liata hmô aw ta; râh kawh ngaitapa a sai aw.
18 A reihtuhpa kha khataih liata a y tly? Chhiecheipa a pathliahtuhpa kha khataih liata a y tly? Lôsôpa a reihtuhpa kha khataih liata a y tly?” tahpa ta na pathipalôh ta hmo rarôh y ngaitapa kha na pachâ aw.
19 Chyhsa a hra kawpa, rei a thu kawpa pahno thei leipa chi ta, chyhsa reih zy reih hropa na pahno thai leipa reihzy cha hmô khao aw va chi.
20 Eima kyhchhi raopa khihpi, Zaio cha moh tua! Na mozy chata Zerusale cha yna thlahlôh ngaitana poh-o, khatita hmah pasie lei awpa, a paraina ri rai a chie lei awpa cha na hmô aw.
21 Cha liana chata ABEIPA, chavah kawh ngaitapa vatiepa a y hôlôpa su cha a rôhnah ngaitapa ta ei hnohta tlao a y aw; cha ti chô liana chata adyuhna balyh laipa a hiana a hneipa chyhsa rai sie leipa aw ta, balyh laipa rôhnah ngaitapa chhaota sie pakhô hra aw vei.
22 ABEIPA cha eima pachiatuhpa châ ta, ABEIPA cha ryhpa maniah a pietuhpa châ ta, ABEIPA cha eima beipa a châ; ano chata maniah a pachha aw.
23 Na khawhri cha padaopa ta y aw ta; ama poh zawna balyh tôh cha pa-i thei leipa ei ta, ama balyh poh zawna cha zawh thei vei ei. Cha noh tlai chata ama hraona sôh hluhpi cha raipa ta y ta; pheisypa zy chhaota hraona sôh la haw ei ta.
24 Cha khih liata a ypa chata, Tla vana,” tah aw vei; a chhôh liata a pahrâpa chyhsa a ypa zy cha molei ngiahthaipa ta ama y aw.