Abei siapa
1 Pachâ teh, abei pakha chata siana kyh liata ryu reih aw ta, ryureituhpazy chata pachiana siapa ta ryu ama rei hra aw.
2 Chyhsa pakha cha thlihpipa tawhta anyuna su hawhta nata vâsua rupa tawhta a bohna su hawhta a châ aw, su chawhpa liata ti a lohpazy hawhta râh riethei ngaitapa lôpanô lai kawpa nohpahlipa hawhta,
3 A hmôtuhpazy mo cha pasiasa leipa châ aw vei, a pahnotuhpazy nahkhao chata a thei aw.
4 Patypamâ a khohtuhpa palôh chata pahnona bie cha a no â vâh aw, reihcha-awpazy paleih cha a sia ngaitapa ta a reih thei aw,
5 Chyhsa pasichhihpa hmo pie a pasaihpa tah khao aw veih ei, chyhsa piehpiepa cha zawngiahpa tah khao hra aw veih ei.
6 Khazohpa za leina hmo tao awpa vâta. ABEIPA lei nawpa doh leipa rei nawpa ta, nodipazy py paruasa nawpa nata dâhphipazy do awpa pahleipadiapa ta, pasi a chhihpa chata moleina bie reih tlôh aw ta, a pathipalôh chata hmo a parao hra aw.
7 Chyhsa piehpiepa hmobaohzy cha pha lei ngaitapa châ ta; dyhchhiepazy chata bie dopa reipa chhaota chyhsa sipasapazy cha haipa bie liata pahleipadia nawpa ta hmoparaona hmozy ano châta hmo moleipa taopa ta pachâ tyh ta.
8 Chyhsa riaphapa deikua chata hmo pasaina lâta hmozy cha a pachâ tyh, hmo pasaina lâta hmozy liana chata a y thlâh ha aw.
Zerusale chanôzy zikyurâpa ama châ
9 Chanô a y chakhypa saih u, thyu ula, ei ao nahthlie teh u; sawchanônô a chado leipa saih u, ei bie reipa liana heta nah pachôh teh u.
10 Chanô a chado leipa saih u, kô kha nata noh khazie rakha tlyma tawhna chata nama nôpo aw ta; kre lyupa hra y khao tlôh leipa aw ta, kre lyu pakhypa liana chata khâpa hmahta y aw vei.
11 Chanô diathlâpa saih u, a chalyu teh u, a chado leipa saih u, nôpopa ta y teh u; a pahluh ula, thluahruapa ta a tao ula, nama chaizy liana chata lathopala poh a sai teh u.
12 Nama lyu kho chaipazy vâta nata kre patheipa khopa vâna chata, nama chachôhna a chô teh u,
13 ei chyhsazy râh chô liana heta ahloh a hneipazy nata bôhbawzy cha pyuh aw ta; khihpi thapha ngaitapa thaphana o zydua chô liana zy chata.
14 O rôhnahpa zy siesaipa ta y tlôh aw ta, chyhsa hluhpa khihpi cha siesaipa ta y hra aw ta; kuhzy nata osâhpa zy chhâzaw ta khaotlôpazy ama châ aw, alâ hrâhpa zy thaphana nata mietahkupa bâna su châ hra aw ta;
15 chôlâ tawhta Thlahpa cha eima chô liata lei thlupa ta y ta, râhpathohpa cha alei pha ngaitapa su ta a lie ta, alei pha ngaitapa su cha râhhmâhpa ta reipa ta a châ aw.
16 Cha tina chata pachiana siapa cha râhpathohpa liana chata pahrâ aw ta, siana cha alei pha ngaitapa su liana chata a y aw.
17 Siana raihria theilâpa cha adyhna châ aw ta, siana liata hmo a puapa cha chhâzaw ta thlahlôh kawpa ta yna nata ngâna kyh ta yna a châ aw.
18 Ei chyhsazy cha thlahlôhna yna lia nata o a i ngaitapazy nata pahâna su thlahlôh ngaitana zy ama châ aw.
19 Râhhmâhpa cha papaopa châ aw ta, khihpi cha panawhpa ta a y aw.
20 Ti lohna zydua ngiakâh liata chi hie tyhpa, viahchao tôhpa nata alâ phei pathlie tyhtuhpa saih u, nama nohhlao na.