Izi mo cha Khazohpa châ veih ei, chyhsapa ama châ
1 Izi râh lâta baona hmô awpa ta zupa ta arâzy chô liata ngâna pahnieh ta, a hluhpa vâta talailizy nata ama thatlô ngaitana vâta arâ a kiahpa zy ngâ ta, Izarel sahlao Mo Pathaihpa lâta moh tlôh leipa ta ABEIPA chhao a chhohia tlôh leipa zy cha ama hu a po na!
2 Ano chhao cha sôh tlôh ta, hmo moleipa patlôsa aw ta, a biezy chhao pathlei aw vei, hmo moleipa a taotuhpa chhôhkhapazy adyuh awpa ta tlao thyu aw ta, hmoparaotuhpazy baona adyuh awpa ta a thyu hra aw.
3 Izi mozy cha Khazohpa châ leipa ei ta, chyhsapa dei châ ei ta; ama arâzy cha thlahpa châ leipa ta sapa dei châ ta. ABEIPA ta a ku a pazawh tita a baotuhpa cha thy pathla aw ta, a baopa chhao cha a pao aw, chatawhcha ama zydua ta ama leidia aw.
4 ABEIPA ta he hawhna heta ei hnohta reih haw tlôh ta, Chakeibarôhneipa nata chakeibarôhneipa dawpa ta a sa tai hai nota a rôhpa chata, mietahkuvaihtuhpa hluhpi siehnao awpa ta y hra sala ama ao cha chi leipa aw ta, ama palôh pasapa vâta a riahchhie hlei leipa hawhna heta Pheisaihzy ABEIPA cha Zaio Tlâh liata nata a tlâhbyuhpa liata adyuh awpa ta a za chô aw.
5 Pavawzy amâ zaw ngâpa hawhta, Pheisaihzy ABEIPA ta Zerusale cha a vaih aw; vaihpa ta pachha aw ta, a zaw pakhôpa ta a paboh aw.
6 Hy Izarel pathla saih u, thata namâ tysaipa lâ cha a heih heih teh u.
7 Cha noh liana chata chyhsa to ta ama tâkâ khazoh nohthlahpazy, ama ngôh khazoh nohthlah nothlahpazy moleina châta nama ku ta nama tao chhypazy cha thy pathla tlôh aw ei ta.
8 Cha tina chata Asuria mo cha chyhsapa zaozi ta papaopa châ leipa ta zaozi papaopa ta y aw ei ta; zaozi chyhsapa zy eih châ leipa ta, ano cha a palâ khai aw; chatawhcha zaozi tawhta a râ aw ta, a satliazy cha chhie a cheihtuhpa ama vaw châ ha aw.
9 A lôpanô cha hmo rarôh ypa vâta leidia aw ta, a molaipazy cha pahnopa vâta ama nô a po hra aw,” he he ABEIPA bie cha a châ, ano mei Zaio liata a ypa nata a patisana mei Zerusale liata a ypa a châ.