Izi chôta a chahâna khâpa hmah a châ leina zie
1 Saw atyhmâhpa sahlao cha ama hu a po na, ABEIPA ta a tah, cha sahlao chata chyhsa a chhohia ei ta, kei deikua cha na chhohia tlôh ei va; ama moleina chôta moleina ama baichhana awpa ta khuna ta khu ei ta, ei thlahpa liata deikua cha khu tlôh ei va
2 Phirao thatlôna ta tha a patlô awpa nata Izi râh nohpahlina ngâ awpa ta eipakah hiahri tlôh leipa ei ta, Izi râh lâ zu a chhuahpa ta sie ei ta!
3 Chavâta Phirao thatlôna cha nama maohphyuna châ aw ta, Izi râh nohpahlina nama ngâpa he nama nozana a châ aw.
4 A abeisawzy cha Zôan khih liata y ei ta, a lyuhchâpazy chata Hanes khih lâta tlô haw tlôh ei ta,
5 âmo chata phahnaina rai a hnei leipa chyhsa a baopa châ leipa ta phahnaina ahneipa chyhsa châ hra leipa ta, nozana nata maochhiena tlao a châpazy cha ama zydua ta ama zakhei aw,” tah ta.
6 Neke râh liata sazy phao hripa cha. Nôpona nata thlahzona râh, chakeibarôhneipa pano nata chakeibarôhneipa tôhpa, vâzi nata parih pachu pasapa ta a zaw theipa puana cha, ama sôh cha alâ taw chô liata zy paphaosapa ta, ama ryuzy cha râraoseihpa ky byupa liata zy paphaosapa ta, âmo chata phahnaina a hnei leipa chyhsa zy lâta pie awpa ta sie ei ta.
7 Izi chata a ruapa nata phahnai lei ngaitapa ta bao tyh tlôh ta, chavâta ano cha, “Rahabi atyuh molopa,” ei bi.
8 Atahmâ sie la, chazy cha ama hmiakô liata cha rona phiapa ta roh la, châbu chhao roh teh, atahmâ tawhta chhâzaw nata chhâzaw châta a châ theina hâh ta.
9 Cha sahlao cha chyhsa atythaipa zy, saw haithaihpa zy, saw ABEIPA ryhpa bie a thei khoh leipa zy châ tlôh ei ta;
10 a hmô theituhpazy hnohta, “Hmô khah u;” hrohsopa hnohta, “Hmo dopazy maniah chhochhielie khah u; hmophapa la eima hnohta reih teh u, dona bie chhochhielie teh u,
11 lâpi leipa lâta sie teh u, lâkia lâta tlei teh u. Izarel sahlao Mo Pathaihpa eima hmiakô tawhta pahlei teh u,” a tah tyhpa zy cha.
12 Chavâta Izarel sahlao Mo Pathaihpa chata he tana heta reih ta. He bie he nama mopakhôpa vâ nata pasaipa-ina nata chhoruna ngâ ei chi ta
13 a chô liata nama pahniehpa vâta he paraona he nâmo chô liana chata alô pâhchhô a sâh ngaitapa raopa a cho daihmâpa sôkha ta movi ta a rao awpa hawhpa he a châ aw
14 beihvituhpa beih ama pakeipa hawhna heta, pahlôpa ta y chachei leipa ta pakeipa ta; a tlawh hry liata beikaopa chakoh liata mei lana awpa tlyma, tikhaoh liata ti thaina awpa tlyma chhao a y leina taihta a pazao khai aw,” tahpa ta.
15 Abeipa KHAZOHPA Izarel sahlao Mo Pathaihpa chata he hawhna heta reih tlôh ta, Kua heihpa ta a pahâpa ta ypa ta, pachhapa ta y aw eichi ta, thlahlôh ngaitapa ta yna liata nata ngâ ngaitapa ta yna liana heta nama thlahlôhna a y aw.” Châhrasala khoh leipa eichi ta,
16 nâmo deikua chata, Châ vei! Arâ chô kiapa ta eimâ râ aw,” tlao tah eichi ta, chavâta namâ râ tlai aw; Hmo chahra ngaitapa chô liata eima kiah aw,” tah eichi ta; chavâta châ chadaituh awpa ei cha a chahra ngaitapa ama châ aw.
17 Chyhsa pakha pachhiparypa ta chyhsa sâh kha a râ aw ei ta, chyhsa papangawh pachhiparypa ta nama râ aw, a chhâna lâta cha tlâh laki liata meihô hawhta nata tlâh byuhpa liata pahnona a ypa hawhta nata tlâh byuhpa liata pahnona a ypa hawhta siesaipa ta nama y aw.
Khazohpa ngiachhiena a chyhsazy hnohta bietaipa
18 Chavâta ABEIPA chata a cha ngiachhie thei nawpa ei ta hâ aw ta; chavâta tha a cha pasa thei nawpa ei ta palyupalihpa ta a y aw. ABEIPA cha pachiana Khazohpa châ tlôh ta; ano a hâtuhpa cha ama nohhlao na.
19 Chyhsazy cha Zerusale liata Zaio liana chata pahrâ tlôh aw ei ta; cha khao aw vei eichi. Nama awna ao liana chata ano ta cha ngiachhie tlai aw ei ta; a thei pata nahta a châ chhy aw ei.
20 ABEIPA chata nôpona viahchhâ nata rietheina ti cha pie hra ei sala, nama pachutuhpazy cha a nyupa ta y khao leipa aw ei ta, nama mo ta nama pachutupazy cha tlao a hmô ha aw.
21 Chachâh lâ namâ heih pata nahta tlyma chavei lâ namâ hei pata nahta tlyma nama nah ta nama hnôh lâtahpa bie, “He he lâpi a châ hih, he liana heta sie teh u,” tahpa ta a pahno lymâ aw.
22 Nama tâkâ khazoh nohthlahpa taopa, tâkâ ri ta nama pahupa nata nama ngôh khazoh nohthlahpa leihpa, ngô ta pahupa cha papuapalei aw eichi ta. Hmo puapa hawhta thy aw eichi ta; a hnohta, “Sie syulyu teh!” nama tah aw.
23 Chatawhcha ano chata nama sâh chi alei liata nama tu awpa châna chata vâsua pie aw ta, alei liata hmo a pyupazy viahchhâ lâta a pie aw, cha chhao cha a pha ngaitapa nata a thôh ngaitapa a châ aw. Cha noh liana chata nama sahrohzy cha sibiepa su kawh ngaitapa zy liana chata ama bâ aw
24 viahchao tôhpa nata alâ taw alei a palietuhpazy chata niepa iapa aleilina nata a zina ta pasia chiehpa ama nie hra aw.
25 Thata a thiena noh liata, riahvaina o sâhpazy a chô nona chata, tlâh sâhpa to liata nata tlâh byuhpa to liana chata chavahzy nata vatiezy ti a lohpazy a vaw y aw.
26 Cha leipa chhao chata ABEIPA chata chyhsa hmah cha chahry ta, ama chhawna hmah cha a patlâh noh liana chata thlâpâ khaihpa cha noh khaihpa tluta y aw ta, noh khaihpa cha a lie sari ta noh sari chhôh a khaihpa tluta a y aw.
Asuria chôta Khazohpa pachiana
27 Pachâ teh, ABEIPA moh cha lâhlapi tawhta a vy na, ahiehâhna cha mei kâpa nata meikhu chhakalupa liata kiah ta; a hmaozy cha palôh châ leina ta bie ta, a paleih cha hmo kâ patlôna mei hawhta châ ta
28 a hu cha khâpa hrao leipa sohri ta phopi ri awpa ta chavah rao taih tlaita a kao a khô ngâpa hawhta a châ; chyhsa to pakah liana chata paviasana chhâri a y aw.
29 Zâ ta kyhchhi pathaihpa ta kyh ama chhi nota hla ama sapa hawhta hla sa aw eichi ta, ABEIPA tlâh liata Izarel sahlao lôpanô tlo awpa ta rahmo chhaota ama sie nota pathipalôh thaphana ama hneipa hawhta pathipalôh thaphana chhao nama hnei aw.
30 Chatawhcha ABEIPA ta ao rôhnah ngaitapa cha patheisa aw ta, hiehâhna nata kâ patlôna mei ta thlihpi nata vâsua nata pareih ta a ku pathlana zie cha a pamosa aw.
31 ABEIPA ao vâna chata Asuria mo chôhchahrei ta chyhsa a tu tyhpa cha paraopa ta y tlôh aw ta.
32 Ano cha chôhchahrei rao chiehpa ta ABEIPA ta a tuna maihta paotlâ zy nata totâ zy chhaota tu aw ta; a chôhchahrei hmâpa ta adyuhna zy liata amâ dyuh aw.
33 Tôphe miakha cha hlâno tawhta a chhuahdy hawpa châ tlôh ta; chatatly, abei châna chata a chhuahdypa ta y ta, a thuh ngaitapa nata a kawh ngaitapa ta tao ta; apahmaohpakhypa cha mei nata tho a hluhpi chata ABEIPA hu cha kaih vatie a lohpa hawhna chata pakâ ta.