Ephrai hnohta zikyurâna
1 Ephrai sahlao sahhmah parihmâhpazy apalaina lakho chô nata ama ngiana rôhnahna pawpi a lohaipa kresawti ta a pachiepa ta a ypa sahlao, saikao pha ngaitapa a khupa a vaw châ!
2 Pachâ teh, Abeipa chata chyhsa thatlôpa hmo tao thei kawpa hnei ta; ano chata pareih thata tla ngâpa thlihpipa hmo a paraopa hawhta nata ti thata laipa a khô ngâpa hawhta, alei liata a ku ta a za thy aw.
3 Ephrai sahlao sahhma parihmâhpazy palaina lakho cha phei ry liata tlypa ta y aw ta;
4 amâ ngiana rôhnahpa pawpi a uah haipa saikao phapa luh chô lâta nopi noh hlâta theiku hmoh tua chaipa hawhta, a mo tupa ta hmô ta, ano ku liata a y pata nahta a nie khai thlâh ha tyhpa hawhta a châ aw.
5 Cha noh liana chata Pheisaihzy ABEIPA cha a chyhsa a y chhôhpazy chata rôhnahna lakho nata â ngiahpa lakho chyhpazy châ aw ta;
6 pachia awpa ta atyupa chata pachiana thlahpa zy châ aw ta, kuh chhikao thaby liata a vaw dyupa a pakhâtuhpazy châta thlahlôhna zy a châ aw.
Zerusale hnohta zikyurâna nata biehraina
7 Hezy chhao cha kresawti vâta pavia ei ta, pari theina dona vâta paochhei chhâ ngâ ei ta; theihthaipazy nata hrohsopazy cha pari theina dona vâta pavia ngâ ei ta, kresawti palâ khaipa ta y ei ta, pari theina dona vâta a viavô ngâ ei ta; a hrana kyh liata pavia ei ta, pachiana liata ama paochheichhâ tyh.
8 Su pathaihpa rai y leina taihta tlâhkhai zydua cha pali nata hmo puapa ta a bie.
9 “Pahnona lâ cha ahyma a pachu aw tly? Bietapa cha ahyma a pahnosa aw tly? Sâhpi pazy a bâh dyupazy nata sâhpi apazy khao leipazy he ma ama châ?
10 Chhoreina bie chô liata chhoreina bie baichhapa ta, chhoreina bie chô liata chhoreina bie baichhapa ta, biepiena chô liata biepiena bie baichhapa ta, biepiena chô liata biepiena baichhapa ta, he lâ a chyhta, hao lâ a chyhta,” tahpa sai châ tlôh ta.
11 Châhrasala hmao nanopa a phaohpa chyhsa hmâpa ta reih nanopa ta he chyhsa zy hnohna heta bie tlao a reih ha aw,
12 “He he pahâna cha a châ, rietheipazy cha pahâsa teh u; he he na a châ, a pahrâna cha a rie a patheipa zy cha, châhrasala nahthlie khoh tlôh va.
13 Chavâta sie ei ta, a die lâta pao ei ta, rao haw ei ta, khohei liata a soh haw ei ta, patupa ta ama y thei nawpa ta ABEIPA bie cha âmo sahlao china chata chhoreina bie chô liata chhoreina bie baichhapa ta, chhoreina bie chô liata chhoreina bie baichhapa ta, biepiena bie chô liata biepiena bie baichhapa ta, biepiena bie chô liata biepiena bie baichhapa ta, he lâ a chyhta, haolâ a chyhta saita a châ thlâh ha aw.
14 Chavâta chyhsa nawhtaw a hmâhpa chyhsa saih u, he chyhsazy Zerusale liata a ypa sahlao ryu a reipa tuhpazy saih u, ABEIPA bie he thei ula!
15 “Thina liata biehraina eima tao haw, Sheôl nata bie eimâ taih haw; chheina ti laipa a khôpa cha a loh palâh tita chhao, keimo taihna chata loh aw vei; haina biezy eima pabohsa nawpa ta hmâh pi ta, haipa ry liata a nyu tlôh pi ta,” nama tahpa vâta;
16 chavâta Abeipa KHAZOHPA chata he hawhna heta a reih, Pachâ teh, alô, alô pasia chiehpa, a ki liata alô sôh ngaitapa, â ipa ta a bôpa cha Zaio liana chata lôbô châta ei paryh hih: A ngiapâtuhpa cha pakhâ aw vei.
17 Pachiana siapa cha padona ri ta hmâh aw na ta, siana cha padona thua bangiepa ta ei hmâh aw; parei ta cha a pabona haipa biezy cha pathai aw ta, tizy chata nyuna cha a vao khai aw.
18 Chatawhcha thina liata nama bie hraipa cha phiepa ta y aw ta, Sheôl nata nama bie taipa chhao aduah aw vei; chheina ti khôpa cha a loh palâh tita, cha tina chata a tlypâpa ta nama y aw.
19 A loh palâhna maihta cha la lymâ aw ei ta; a my ta a my chareih, a chhô a zâ ta, loh palâh tlôh aw ta; bietapa yzie pahnopa cha hmo rarôh ypa sai a châ aw, tahpa ta.
20 Rakhô cha patlâ nawpa ta chyu tu tlôh ta, poh cha khu nawpa ta chyh tu hra tlôh ta.
21 A rai, rai nanopa cha a hria thei n’awpa nata a hmotaopa a hmotaopa nanopa cha a patlô thei nawpa ta, ABEIPA cha Perazi Tlâh liata athyupa hawhna khata thyu tlôh aw ta, Kibia saikao liata a hiehâpa hawhna khata!
22 Chyhsa mohnao a hmâhtuhpa zy châ khao khah u, cha leipa khiahla nama keihrai daipazy cha ngâchhih ngaitapa ta ama tao pathlei aw na; a chhâna, chhâna tlô thlyu awpa ta raipa cha leilô chô liata a tlôpa bie Abeipa Pheisaihzy KHAZOHPA tawhna chata pahno tlôh na ta!
23 Nah pachôh ula, ei ao he thei teh u; nahthlie ula, bie ei reipa he thei teh u.
24 Leipalietuhpa chata chi a hie nawpa ta alei khâ a palie thlâh ha tlyma? Alei tlo cha pakeipa ta khâ a padi thlâh ha tlyma?
25 A chô cha a paryh khai nahta ahia zy cha hie vei mâ? Sykathu zy chhao hie hra vei ma, sâh zy chhao a tlâh tlâh ta, bali sâh zy chhao a su a raopa liata nata rai zy chhao a yna su liata loh vei ma?
26 A Khazohpa chata ano cha a sia ngaitapa ta no pavâhsa ta, a pachu hra.
27 Ahia cha sâh tlyna hmo tiahpa ta tly beih tlôh leipa ta, sykathu chô liana cha talaili phei cha pahlua thlu beih hra vei; ahia cha chôhchahrei ta chhei ei ta, sykathu cha sômasi ta tlao ama chhei tyh.
28 Viahchhâ taona sâh cha charopa ta y tyh ta; khâ chhei aw veih ei, talaili phei nata arâzy chata hiezawh hra sala charosa beih vei.
29 Cha chhao cha Pheisaihzy ABEIPA chhosiena kyh liata chyhsa pha kawpa tawhna chata a puapa a châ.