Isai 29
Ariel nata a khakhaipa
1 Hy Ariel, Ariel, Davi a riena su khihpi, Kô liata kô baichha teh u; kyhchhinazy cha vaw tlô heih se.
2 Cha tina chata Ariel he a nô papo aw na ta, mâchhiesana nata pachârôhna a y aw, ano cha ei châta Ariel mei maisâh hawhta a châ aw.
3 Nâma dyupa ta na kiapâ ta ei ri aw, kuh taopa ta cha padôh hra aw na ta, adyuh awpa ta padôna kuh sâpazy ei tao aw.
4 Chatanachata panawhpa ta y aw chi ta, alei ry tawhta bie rei aw chi ta; na ao cha buhchâ hry liata a naipa ta a paro aw; na ao cha ahripa khazoh a hneipa hawhta deita ta alei ry tawhta vaw pua aw ta, na rei cha buhchâh hry tawhta bieparu a kaw reih aw.
5 Châhrasala nâma châ dyuhtuhpa zawpi zy cha buhchâh dipa hawhta ama y aw, chyhsa chichhihpa sahlao zawpi zy cha saviah leidia tyhpa zy hawhna heta ama y hra aw. Movi hlâta sôkha ta ama y aw.
6 Tôkalôpa a thuapa zy, alosihpa zy, pyu paro ngaitapa zy, khisô zy, thlihpipa zy, hmo a kâ patlôna taih mei paleih zy ta âmo cha Pheisaihzy ABEIPA hriepa ta ama y aw.
7 Ariel adyuhtuhpa phopi zydua zawpi sahlao, ano nata a kuh a dyuhtuhpa zydua nata ano nô a papotuhpa zydua cha, mâ hawhta nata zâ ta aluahna hawhta deita ama châ aw.
8 Chyhsa nodipa ta mâ sa ta, pati nie tyh ta; châhrasala a vaw hra ta a chhôh cha a ruapa hawhna he a châ aw, a châ vei khiahtala chyhsa dâhphipa ta mâ sa ta ti doh tyh ta, châhrasala a vaw hra ta vaw panao ta, ti a khôpa hawhta a châ aw, Zaio Tlâh adyuhtuhpa phopi zawpi sahlao cha, cha hawhna chata ama châ aw na.
Izarel mochaona nata haiphiana zie
9 Aduah thlâh ha ula, noâh tah teh u, thaphapa ta charei ula, mochaopa ta y teh u! Pari ei ta, châhrasala kresawti vâta châ vei; a viavô ei ta, châhrasala pari theina dona vâta châ vei!
10 ABEIPA chata mokuna thlahpa nama chô liata leithlu ta, nama hrohsopa zy cha a mo pasosapa ta, nama luh chaipa a hmô theituhpa zy cha khu haw tlôh ta.
11 Aluahna rai nama chôta châbu chahnaopa bie hawhta a châ haw, cha cha chyhsa ta cha thaipa chyhsa hnohta, Ngiachhiepa ta he he reih teh,” tahpa ta pie ei ta; ano chata, “Reih thei va na, chahnaopa a châ hih,” tah ta.
12 Chatawhcha châbu cha cha thai leipa chyhsa ku liata, Ngiachhiepa ta he he reih teh,” tahpa ta pie ta; ano chata, “Cha thai va na,” tah ta.
13 ABEIPA chata:” He chyhsazy heta na vaw hnia ei ta, ama pakah nata ama hmao ta eina palyupalih ei, châhrasala ama pathipalôh cha kei tawhta a hla tlôh ta, eina china cha chyhsapa zy biepiepa, chyhsa ta ama pachupa dei a châ;
14 chavâta he chyhsazy hry liana heta hmonoâhpa ei tao aw, hmonoâhpa, hmonoâh ngaitapa cha; chatanachata ama chyhsa sopa zy sona cha lei aw ta, ama chyhsa sona a hmâh thaipazy novâhna cha nyupa ta a y aw.
15 Ama ryhraopa ABEIPA tawhta nyu awpa ta a thuh ngaitapa ta a tluatuhpazy cha ama hu a po na, ama hmotaopazy zohna ry liata y ta.” Ahy e maniah a hmô aw? Ahy e a pahno chhao maniah a pahno aw?” tah ei ta.
16 Nâmo ta hmozy he a lie lâta nama palie tyh na! Beihvituhpa cha beihlei hawh deita ta pachâpa ta a y aw na; hmotaopa chata a taotuhpa cha, Ano eina taopa na kawh châ na va, a tah tlyma, a châ vei khiahtala hmo paysapa châta a paysatuhpa cha, Novâhna rai hnei vei,” a tah tlyma?
Izarel chatlaina
17 Bohpi leipa rakha tawhta vei ma, Lebanaw cha chhaolei pha ngaitapa su ta pachâsapa ta y aw ta, alei phapa su cha râhhmâhpa ta pachâpa ta a y aw?
18 Cha noh liana chata nahpâpa zy chata châbu biezy cha ama nah ta thei aw ei ta, mochaopa mozy chata zohna ry nata a zohna hry tawhta a hmô ha aw.
19 A reisipazy chhao chata ABEIPA liata ama thaphana papôh aw ei ta, chyhsapa hry liata sipasapazy cha Izarel sahlao Mo Pathaihpa liana chata amâ ly ha aw.
20 Chyhsa chichhihpa cha khâpahrao leipa ta taopa ta y haw ta, mohnaotuhpa cha dia haw ta, hrao leina a ngiatiah leituhpa zydua cha pahleipadiapa ta y haw tlôh ta.
21 chazy chata chyhsa cha biepeipa kyh liata hmoparaotuhpa ta tao tyh ei ta, kuh chhikao liata chhoreituhpa a aona chata khohei chôh tyh ei ta, a siapa cha hmo khâpa hrao leipa ta ama pakhôkhâhsa tyh.
22 Chavâta ABEIPA Abaraha a chatlaituhpa chata Zakaw chhôhkhapazy kyh liata he tana heta a tah: Zakaw sahlao cha atahmâ maohphyu khao leipa aw ta, ama hmia chhao hlâ khao aw vei.
23 Ei ku ta a taopazy cha ama hmô no ta, ei moh tlao ama pathaisa aw; Zakaw sahlao Mo Pathaipa cha pathaisa aw ei ta, Izarel sahlao Khazohpa cha ama chi hra aw.
24 Thlahpa kyh liata a paviapazy chata vaw pahno thai aw ei ta, a paphôhpazy chata bie pachupa cha amâ chu ha aw,” tahpa ta.