Izarel pachhana nata pahmaohna
1 Cha noh liana chata ABEIPA chata a zaozi tiah ngaitapa laipa ngâchhihpa chata Leviathan parihpi a râ ngâpa, Leiviathan parihpi kokachupa cha hrie aw ta, tilaipi liata drakao a ypa cha a thie hra aw.
2 Cha noh liana chata: Ano kresadô khochhihpa, palyupalihpa ta hla sa teh u!
3 Kei, ABEIPA he, a vaihtuhpa ei châ; buakha ta ta ti bao aw na ta. Ahy hmah ta ama hria lei nawpa ta a chhô zâ ta ei vaih aw
4 keima liana heta hiehâhna y vei. Bôhbaw nata ahlohzy chata maniah dyuh ta na siehnao tua tlai sala! Âmo siehnao awpa ta su kha ta ei rao khai aw.
5 Cha leipa khiahtala keima paryh nawpa ta ei thatlôna he patu mawh sy, na paryh se.
6 Daihti a vaw tlô awpa liana chata Zakaw sahlao chata thari pathla aw ei ta; Izarel sahlao cha a paw pabyuhpa ta ama pawh aw, chatanachata khizaw chô liana heta patheipa ta a pabie aw.
7 Ano a tutuhpazy a tupa hawh tlaita ano cha a tu hra tlyma? Cha leipa ta ano a thiepazy hawh tlaita ano cha thiepa ta a y hra ma?
8 Âmo cha papuapa ta nata pasiesapa ta hrie haw chi ta; nochhi lâ tawhta thlih hrâhpa pathlipa chata âmo cha â chadai ta.
9 Chavâta he heta Zakaw sahlao hmoparaona cha pathaisa aw ta, he he ama molei siekheina thei sai a châ; Asherazy nata noh khazoh nohthlapazy cha, thyu khao leina taihta maisâh lô zydua cha leirapa lôzy pazao khaipa ta a ypa hawhta ama taopa he.
10 Khihpi kuh a hneipa cha a y ru ta, a yna chyhsa hnôh chhypa nata siesai chiehpa châ ha tlôh ta, râhpathohpa hawh tlaita; cha liana chata viahchao taw a laobâ aw ta, cha liana tlai chata a byu ta, achiahzy cha a nie aw.
11 A chiahzy cha a ua tita thliepa ta y aw ta; chanô sahlao a vy aw ei ta, ama rao aw. Pahno theina rai a hnei leipa chyhsa zy châ tlôh ei ta; chavâta a taotuhpa châta a kho rai khokhei aw vei.
12 Cha noh liana chata ABEIPA chata Chavah lona tawhta Izi Chavahzy taihta a thei chhei pathla aw ta, chatanachata hy Izarel pathlazy saih u, pakha ta reipa ta nama y aw.
13 Cha noh liana chata chiahmie lai ngaitapa tô aw ei ta, chatanachata Asuria râh liata leidia daihmâpa sahlaozy nata Izi râh liata papuapa sahlaozy cha a vy aw ei ta, Zerusale liata tlâh pathaihpa liana chata ABEIPA cha amâ chhy aw.