Abeipa hrôbiena ngâna hla
1 Cha noh liana chata Zudah sahlao râh liata he hla he ama sa aw: Khihpi a i ngaitapa hnei pi ta, ano chata pachhana cha pâhchhôzy nata kuhzy hawta a tao aw.
2 Phopi siapa bie hmeihseihpa a zyhtuhpa cha a ngia thei nawpa ta kuh chhikaozy cha pahy teh u.
3 Na chô liata palôhrupa a pahniehtuhpa cha nâma a cha ngâpa vâta thlahlôh ngaitapa ta y awpa ta na vaih aw.
4 ABEIPA cha chhâzaw ta ngâ teh u, ABEIPA KHAZOHPA cha, chhâzaw lôpanô châ tlôh ta.
5 Ano chata a sâh ngaitapa ta a ypa zy nata khihpi a pasâhsa ngaitapa cha panawh haw tlôh ta. Alei taih tlaita panawh ta; buhchâh taih tlaita papao ta.
6 Phei châta tlypa ta, sipasapa zy phei nata dyhchhiepa zy chakâpa tlai chata.
7 A siapa siena cha a dona châ ta; na pathipalôh a do ngaitapa a phaohpa chi chata a siapa siena cha patlapa chi ta.
8 Hy ABEIPA, na pachiana kyh liana chata cha hâ thlâh ha pi ta, eima hrona kho viapa lâ cha, na moh a thei thlâh hana he a châ.
9 Ei hrona ta zâ ta cha khoh na ta, ei chhôh liata ei thlahpa a ypa heta mydi ta ei cha tlua. Na pachianazy cha alei liata a vaw yna maihta, khizaw liata a ypazy chata siana cha achu tyh tlôh ei ta.
10 Hmoparaopa cha khokheipa ta y hrasala, siana a chu hlei aw vei; a dona râh liana chata a do lei ngaitapa ta tao aw ta, ABEIPA rôhnahna hmô hlei aw vei.
11 ABEIPA y, na ku cha pazawhpa ta y ta, châhrasala hmô tlôh veih ei. Anodeikuacha chyhsa zy chata na phahnai khohna cha hmô aw ei ta, ama no a za aw. Nâma châ dyuhtuhpazy cha mei ta a kâ patlô aw.
12 ABEIPA y, nâ ta adyhna maniah na taopa aw, nâ ta eima rai zydua chhao maniah hriapa tlôh chi ta.
13 Hy ABEIPA eima Khazohpa, nâma dei châ leipa ta bei hropazy chhaota keimo chô liata bie hnei haw tyh ei ta, châhrasala nâma baona tlaita na moh eima pado aw.
14 Âmo cha thi haw ei ta, lei haw heih ta, thyu khao aw veih ei; chavâta nâ ta âmo cha hriepa ta parao chi ta, ama myleina zydua chhao na pahleipadia haw.
15 He phopi he papôh haw chi ta, hy ABEIPA, he phopi he na papôh haw; nâ cha palyupalihpa ta na y haw, he râh he a râhri zydua na pakawh haw.
16 ABEIPA y, ama nôpo nota cha pado tyh ei ta, na hriena âmo chô liata a tla nota thlah ama chhâ tyh.
17 Chanô saw phaohpa nawh yna a hnia hawpa cha pasa tyh ta, sawzeipa pasapa ta a aw tyhpa hawhna heta, hy ABEIPA, keimo chhao na hmiakô liata eima y tyhpa kha;
18 saw phaoh pi ta, pasa pi ta, thlih dei ta eima sapa kha. Alei liana heta pachhana lâ rai patlôsa leipa ta, khizaw liata a ypa sahlao pi veih ei.
19 Nâ athipazy cha hroh heih aw ei ta, ei chyhsa rizy cha ama thyu heih aw. Dolei liata a ypa saih u, a hra ula, thaphapa ta sa teh u! Na diati cha ahnalasizy diati hawhta châ ta, alei heta a thipazy cha thy tlôh aw ta,” tahpa hih.
20 A vy ula, ei chyhsazy saih u, nama chhôhpadâhpa chhôh liata zy a ngia ula, nama ochhizy cha a khaw khâh teh u; palôh châ leina he a pai hlâta cha buakha likawh ta a nyu teh u.
21 Pachâ teh u, ABEIPA cha eima hmoparaona vâta alei liata a ypa zy hrie awpa ta a yna tawhta a vaw pua aw, alei chhao heta a thisaih zy cha palâ aw ta, chyhsa ama thiepa zy cha khu khao aw vei.