Abeipa khokheina reithaina hla
1 Hy ABEIPA, nâ cha ei Khazohpa châ chi ta; cha parôhnahsa aw na ta, na moh ei reithai aw; hmo noâh ngaitapa hlâno ta ryhraopazy cha, ngâchhihpa nata hmeiseihpa ta tao tlôh chi ta.
2 Khihpi chhao alei byuhpa lâta pachâsa chi ta, khih kuh a hneipa chhao parao chi ta; khichhaipa chyhsazy o rôhnahpa chhao khih leipa lâta pachâsa tlôh chi ta; khatita hmahta sapa ta, y heih khao aw vei.
3 Chavâta chyhsa thatlôpazy chata cha parôhnahsa aw ei ta; phopi chichhihpazy khihpi châta ama cha chi aw.
4 Chyhsa chichhihpazy hu cha chasipaw thlih hawhta a y nona zy heta, nâ cha sipasapa châta kuh, dyhchhiepa nôpo noh châta kuh, thlihpipa tawhta a pabohna, noh sa pahlina châ tyh tlôh chi ta.
5 Nohsana chawhkaraipa su lalôhpa cha na papai tyhpa hawhta khichhaipa zy pyu cha na papai aw; a lopa cha meido pahlina ta papaipa ta a y tyhpa hawhna heta, chyhsa chichhihpa sahlao hla sapa cha papaipa ta a y aw.
6 He tlâh liana tlai heta Pheisaihzy ABEIPA chata chyhsa to châta hmo thawpazy ta kyh a chhi aw, kresawti zy a hawpa nata pachi thlâh hapa hmo thawpa zy, lathli ta a biepa kresawti zy a hawpa nata pachi thlâh hapa a phapa ta adipa cha.
7 Chyhsa to ama hmia khuna nata phopi to ama khuna cha he tlâh liana heta a parao aw.
8 Thina cha palâ khai haw ta, Abeipa KHAZOHPA chata chyhsa zydua hmia tawhtapa cha mothlih zy hru aw ta, chyhsa zy moh chhiena cha leilô a pahrâpa zydua tawhta a pahlei aw; ABEIPA ta cha cha reih haw tlôh ta.
9 Cha noh liana chata, “Pachâ teh u, he he eima Khazohpa a châ hih; ano he hâ thlâh ha pi ta, maniah a pachha aw. He he ABEIPA cha a châ hih; ano he hâ thlâh ha pi ta, pachhana liana chata thaphapa ta nata alypa ta eima y aw.
10 He tlâh liana heta ABEIPA ku cha a pahâ aw ta, sâhkô cha ie sona su liata tlypâpa ta a ypa hawhta, Môaba cha ano su liata tlypâpa ta y tlôh aw ta.
11 Ti a zaw thaipa ta ti a zaw awpa ta a ku a hiepa hawhna heta cha chyhsa hry liana chata a kuzy a hie aw; apalaina cha a ku papiena chhaota a panawh aw.
12 Chatawhcha na kuh pâhchhô zy o sâhpa kuh cha pachopa ta, panawhpa ta alei liata dohlei taih tlaita a papao haw.