Alei chôta Abeipa pachiana
1 Pachâ teh u, ABEIPA chata alei he parua ta, pathaiparosa ta, pakhu aw ta, a pahrâpazy cha a papai aw.
2 Chatawhcha vâtlâh chôta a ypa hawhta, theihthaipa chôta chhao a y hra aw; sei chapaw chôta a ypa hawhta, azibeipa chôta chhao a y aw; seichanô chôta a ypa hawhta a zibeinô chôta chhao a y aw; a chaleituhpa chôta a ypa hawhta a zuahtuhpa chôta a y aw; a pacheisatuhpa chôta a ypa hawhta, a cheituhpa chôta chhao a y aw; a pôhpa a chadaipa ta dyu a pacheisatuhpa chôta a ypa hawhta, a hnohta a pôhna a pietuhpa chôta chhao a y aw.
3 Alei he liahsa paruapa nata liahsa paraopa ta a y aw; cha bie cha ABEIPA ta reih haw tlôh ta.
4 Alei he mâchhiesapa ta a loh na, khizaw he thazeipa ta a loh na; alei liata chyhsa chônôpa cha thazeipa ta ama y hra.
5 Alei he a pahrâpa zy ry liana chata papuapaleipa ta y ta; ryhpazy parao ei ta, bieraopa zy panano ei ta, chhâzaw biehraina cha ama paraopa vâta.
6 Chavâta chhiesana ta alei he chaih khai haw ta, a pahrâpazy cha thai lei pachâsapa ta ama y; chavâta alei liata a pahrâpazy cha mei ta kâ saopa ta y ei ta, chyhsa chyhta deita ama y.
7 Kresawti thiehpa cha mâchhiesapa ta y ta, krezôh cha thazeipa ta a y, pathipalôh thaphapa zydua cha amâ rôh.
8 Paotlâzy thaphana cha a dia, aly ngaitapa ta a ypa zy pyu cha a chhâ, totâ thaphana pyu cha a dia.
9 Hlasana chôta kresawti doh aw veih ei; pari theina cha a dohtuhpa zy châta a kha ngaitapa a châ aw.
10 Patypamâpa khihpi cha paraopa ta y haw ta, chyhsa ahyrai ta a ngia lei awpa ta o zydua khawpa ta a y.
11 Kresawtizy vâna chata othliahzy liana cha chana pyu y aw ta! alyna zydua pazohsapa a châ; he râh thaphana he a lei haw.
12 Khihpi liana chata roryhrana y ta, a kuh chhikao cha paraopa ta a y haw.
13 Alei liah liata chyhsa to hry liata he hawhna heta y tlôh aw ta, Ôli tho chhei chiehpa, theilâpa a y tyhpa hawhta nata, kre lyu chiehpa kre kamo tho awpa a y tyhpa hawhna heta.
14 Alyna vâta ao paropa ta hla ama sa aw; ABEIPA rôhnahna vâta tilaipi tawhta a paro ngaitapa ta ama sa hra.
15 Chavâta ABEIPA cha nochhi lâta palyupalih teh u, ABEIPA Izarel sahlao Khazohpa moh tlai cha, tilaipi liahpahlôzy liana chata palyupalih teh u.
16 Kaoki chhâna liata hla sapazy eimâ thei, A Mo Siapa hnohta rôhnahna y mawh sy,” tahpa hla hih. Châhrasala kei chata, “Zao rili na ta, ei hu a po na! Piehpie ngaitapa ta a taotuhpa zy chata piehpie ngaitapa ta tao ei ta; piehpie ngaitapa ta a taotuhpa zy chata piehpie ngaitapa ta ama tao haw,” tah na ta.
17 Hy alei liata a pahrâpa, chichhihna zy, khaotlô zy, khohei zy cha na chô liata a y na!
18 Chichhihna pyu tawhta a ratuhpa cha khaotlô liata tla aw ta; khaotlô chao tawhta a puapa cha khohei ta a ao aw. Avâ opyzy cha pahypa ta y tlôh ta, leilô bônazy cha a chalyu hra.
19 Leilô he rao khai ta, leilô he patlôpa ta y khai ta, leilô he thata a chalyu ta.
20 Leilô he a paripa chyhsa hawhta aviavô aw ta, byureihzy chalyupa hawhta a chalyu aw; paraona cha a chô liata a hri ngaitapa ta y aw ta, chatanachata pao aw ta, thyu heih khao aw vei.
21 Cha noh liana chata ABEIPA chata chô lâta chyhsa chônôpa sahlao py lai ngaitapa cha a hrie aw, alei liata alei beizy chhaota.
22 Patâhpa sahlao khaotlô liata a chhipakhypa ta ama ypa hawhta, cha sahlao cha a chhi pakhypa ta y aw ei ta, atâhna o liata khôpa ta y aw ei ta, bohpi tawhna chata hriepa ta ama y aw.
23 thlâpâ khi nozapa ta y aw ta, noh khi maophyupa ta a y aw; Pheisaihzy ABEIPA cha Zaio Tlâh nata Zerusale liata nata a machâ sahlao hmiakô liata rôhnah ngaitapa ta ryu rei tlôh aw ta.