Tyre nata Sidaw kyh chhochhieliena
1 Tyre khih phao hri cha, Hy Tasi balyh laipa saih u, thata cha teh u, na balyh pahâna cha pathaihparohpa ta a y haw! Cha cha Kitima râh tawhna chata âmo hnohta paluahsapa ta a y.
2 Hy liahpahlô liata a pahrâtuhpa saih u, a chalih teh u, Sidaw sôh a daohtuhpa zy tilaipi liata a siepazy sôh a pahneisapa cha,
3 Ti lai ngaitapazy liata Sihaw cha Nile sâh hriapa cha a thôhna châ ta; phopizy sôhdaona su a châ tyh.
4 Hy Sidaw y, nozapa ta y teh, tilaipi kuh chata bie reih haw tlôh ta, Saw azei beih leipa na ta, sâh beih hra va na, satliapa pasa beih hra va na, laihsakôpa chhao chhy beih hra va na,” tahpa ta.
5 Bie pathâhpa cha Izi râh a tlô tina chata, Tyre bie pathâhpa cha thata pasa ama tao aw.
6 Tasi lâta kiah ula, liahpahlô liata a ypa saih u, thata cha teh u!
7 He he ma nama khih thapha ngaitapa a hlôna zie hlôthlâhpa nohzy tawhtapa a phei ta a hlapapi ta a y awpa ta achhi tyhpa châ vei mâ?
8 Lakho a pakhosatuhpa khihpi Tyre chô liana heta ahy e he bie a tlô awpa ta a rao? Cha liata sôhdaopa zy cha abeisawzy châ ei ta, cha liata sôhdaopa chyhsazy cha alei liata chyhsa zachhihpa zy châ tlôh ta.
9 Pheisaihzy ABEIPA chata rôhnahna zydua palaina cha, papua awpa nata alei liata chyhsa zachhihpa zydua mohnaopa ta paysa awpa ta a rao,
10 Hy Tasi sawchanô y, na râh liana chata lei palie teh, na balyh pahâna rai y khao vei hih.
11 Tilaipi chô liata a ku pazawh ta, khihnarâh zy cha chalyu ta; ABEIPA cha Kana râh kyh liata bie pie ta, a kuhzy parao awpa ta.
12 “Hy Sidaw sawchanô laihsakôpa pasaipa-ipa y, thyu la, Kitima râh lâta hiah teh; cha liana chhao chata pahâna rai hnei hlei aw va chi,” tah ta.
13 Moh teh, Kitima râh he! Ama o sâhpa zy sa ei ta, cha liata o rôhnahpa zy pahleipadia ei ta; o rypa ta a tao haw.
14 Hy Tasi balyh laipa saih u, thata cha teh u, nama kuh cha paraopa ta a y haw.
15 Cha noh liana chata Tyre khih cha kô sysari chhôh mypa ta a y aw. Châhrasala abei hropa a bei nota kô sysari a lei tina chata sihryhpa hlâta ama reipa hawhta Tyre khih chô liana chata a tlô aw:
16 Nâ sihryhpa, mypa ta a ypa, totâ tô la, khihpi chahlô teh! Ao ngiapazy ta hla hluhpi sa teh, pahnopa ta na y heih theina hâh ta.
17 Kô sysari a chhâ nahta, ABEIPA chata Tyre khih cha tly aw ta, ano cha a hlao a chadaipa ta y heih aw ta, alei chô liata khizaw zydua sihryhpa ta a y aw.
18 A sôh a hmôpa nata a hlao cha ABEIPA châta hmo pathaihpa a châ aw; cha cha pachôpa ta tlyma, pasôpa ta tlyma y leipa aw ta; a sôh a hmôpa cha ABEIPA hmiakô liata a pahrâpazy châta châ tlôh aw ta, a daihpa ta ama hiepa nata chysia rôhnah ngaitapa ama hnei thei nawpa ta.