Aluahna saikao kyh chhochhieliena
1 Aluahna saikao phao hri cha, Khâpa na nama tah maw, o chôzy liata nama kiah khai?
2 Hy awna pyu ta a biepa, khihpi patypahreipa, khihpi thapha ngaitapa, na chhôh liata ama thiepa zy cha zaozi ta thiepa châ leipa ei ta, adyuhna ta a thipa châ hra veih ei.
3 Nâ ryureituhpa zydua cha hmaohkhata a râ ei ta, libaw leipa ta patupa châ ei ta, na chariah dyutuhpa zydua cha patu khai ei ta, lâhlapi tawhta a vaw râpazy cha.
4 Chavâta kei chata: “Na moh leipa ula, hiakha lâ moh teh u; thata ei cha aw na; ei chyhsa sahlao sawchanô hraona ta ama lapa kyh liana chata palôh na pangâ khoh khah u,” tah na ta.
5 Abeipa, Pheisaihzy ABEIPA tawhna chata aluahna saikao liana heta tymâna nata tlypâna nata nôpona noh châ tlôh ta, kuh pâhchhô paraona nata tlâhzy awna cha.
6 Chatawhcha Elami sahlao ta lavah byh phaoh ei ta, chyhsapa kiana talailizy nata arâ kiapazy chhaota, Kir sahlao ta vyhphao pahlyna cha pathla ei ta.
7 Na saikao pha chaipazy cha talailizy ta bi ta, arâ a kiahpazy cha kuh chhikao liata a pa-o ei ta.
8 Zudah sahlao khuna cha la haw ta. Cha noh liana chata râhhmâhpa o liata chariah chhaichhi cha moh haw chi ta,
9 Davi khihpi kuh raonazy ama hluh chhei hapa hmô eichi ta; tipo mathi lâtahpa tizy cha hmaohkha ta palosa eichi ta
10 chatawhcha Zerusale ozy reih eichi ta, kuh alô sahdô tha patlôna chata ozy cha phie haw eichi ta.
11 Tipo parohpa ti-ona tao eichi ta. Châhrasala chazy ataotuhpa lâ cha moh tlôh leipa eichi ta, hlâno ta a vaw taotuhpa cha pachâ hra vei eichi.
12 Cha noh liana chata Abeipa Pheisaihzy KHAZOHPA chata cha awpa nata chachôhna a chô awpa nata luh a papôlô awpa nata latho pala poh a sai awpa ta aw ta
13 thaphana nata alynazy, viahchao thiena nata mietahkupa thiena zy, sa niena nata kresawti dona zy tlao y haw ta, Nie sih la, doh suh u, mylâ thi tlôh aw pi ta, tah ei ta.
14 Pheisaihzy ABEIPA chata ei nahkhao liata a pahnosa ta: He hmoparaona he nama thi hlâ lei la nâmo tawhtapa pathaipa ta y tlai aw vei, Abeipa, Pheisaihzy KHAZOHPA chata a tah, tahpa ta.
Shebna cha Eliakima ta â thla nawpa zie
15 Abeipa Pheisaihzy KHAZOHPA chata he tana heta a tah, “Sie la, he sôh mokhâhtuhpa hnohna heta, Shebna ochhôh liata hyutuhpa ta a ypa lâna tlai chata sie teh, a hnohta he tana heta reih teh:
16 “He liana heta khâpa na tao tly? He liana heta ahyzy e hnei chi ta, he liata nâ khie tly, ano châta a sâh ngaitapa ta thlâ khie ta, ano châta lôpanô liata yna a tao baohrapa he.
17 ABEIPA chata chyhsa thatlôpa to a thypa hawhta thata a cha thy aw. Ano chata khâchâ cha patu aw ta,
18 a cha pahie aw, bawhlôpa hawh tlaita râh kawh ngaitapa liata a cha thy aw; cha liana chata thi aw chi ta, cha liana hra chata, nâ, ano bei o chhôh a pamaohphyutuhpa chi, na rôhnahna talailizy a y aw.
19 Na raihriana tawhtapa cha papua aw na ta, âmo chata na hyutuh châna tawhtapa cha a châ daophi aw.
20 Cha noh liana chata ei chakaotuhpa Hilkiah sawchapawpa Eliakima cha aw aw na ta,
21 na viahpakao pasihpa he pakysa aw na ta, na chaisaina heta a tha patlô aw na ta, na ryureina he a ku liata ei pavaosa aw; ano cha Zerusale liata a pahrâpazy nata Zudah chhôhkhapa zy châta paw a châ aw.
22 Chatawhcha Davi chhôhkhapa zy châhbi cha a ngiatlâh liata soh aw na ta; ano chata pahy aw ta, ahy ta hmahta khaw aw veih ei; khaw aw ta, ahy hmahta pahy aw veih ei.
23 Chatawhcha ano cha thua khaina su â i ngaitapa liata ama khaipa hawhta khâchâ pa-i aw na ta, chatanachata a paw chhôhkhapa abeidyuchhai rôhnah ngaitapa châta a châ aw.
24 Chatawhcha ano liana chata a paw chhôhkhapa zy rôhnahna zydua cha ama bai khai aw, a sawzy nata a pathla hmobaoh chyhpa to rai biebu hmobao tawhta ti sona hmobaoh taihta.
25 Cha noh liana chata thua khaina su a i ngaitapa liata liahsa khaipa ta a ypa chata pahnie aw vei, chhawh pathlapa ta y aw ta, tlâh ha aw ta; a chô liata hmo hripa a ypa cha pahleipadiapa ta a y ha aw, ABEIPA ta cha cha reih haw tlôh ta, Pheisaihzy ABEIPA chata a tah,” tahpa ta.