Asuria ta Izi nata Ethiôpia a pahnie nawpa zie
1 Asuria bei Sarkô tuapa ta Tarta Asadô khih lâta a vy ta, Asadô khih a dyuh ta, la ha ta;
2 kô thôh hnôh lâ liata ABEIPA ta Amôza sawchapawpa Isai hnohta, “Sie la, na chai liata lathopala poh kha pathlâ la, na phei liata na pheiky kha pahluh teh,” tahpa ta a chho chiehpa hawhta. Cha hawhna cha tao ta, sasaihpa nata pheiky a ky leipa ta charei haw ta.
3 Asadô lana kô liana chata ABEIPA chata, “Ei chakaotuhpa Isai he Izi sahlao chô liata nata Ethiôpia sahlao chô liata pahnona nata hmonoâhpa chata kô thôh chhôhta sasaihpa nata pheiky a ky leipa ta a siepa hawhna heta,
4 cha hawhna hra chata Asuria beipa ta Izi sahlao a patupazy nata Ethiôpia sahlao seizy cha a hawti machâ ta, thluahruapa nata pheiky a kyh leipa ta, chao khu leipa ta, Izi sahlao maophyu nawpa ta a siekhei aw.
5 Chatanachata ama hnabeisei chaipa Ethiôpia sahlao nata ama rôhnahna chaipa Izi sahlao vâna chata nôpopa nata maophyupa ta ama y ha aw.
6 Cha noh liana chata he tilaipi kiah liatahpa heta, ‘Pachâ teh, eima hnabeisei chaipa Asuria beipa tawhta maniah pachha awpa ta maniah baotuhpa chata eima râna cha he hawhna he châ haw tlôh ta! Keimo he kheihta e eima pua thei aw? ama tah aw,” tahpa ta.