Izi kyh chhochhieliena
1 Izi râh phao hripa cha. Pachâ teh, ABEIPA cha meihdo chatliepa liana chata siepa ta Izi râh tlô aw ta; Izi râh khazoh nohthlahpa zy cha a hmiakô liata a chalyu aw ei ta, Izi sahlao pathipalôh cha ama chhôh liata a zao aw.
2 Izi mozy cha Izi mo lilaw adyuh awpa ta ei pathyu aw, chatanachata chyhsa to ta ama unawhpa adyuhpa ta, chyhsa to ta ama vaih adyuhpa ta amâ dyuh aw, khihpi nata khihpi adyuh aw ei ta, khihnarâh nata khihnarâh amâ dyuh aw;
3 Izi sahlao thlahpa cha ama chhôh liana chata khâpa hrao leipa ta taopa ta y aw ta, ama ryhraopa cha ei parao aw; chatawhcha khazoh nohthlahpazy nata dyuthaipazy nata thlahpa nopeipazy nata khazoh hneipa zy amâ chhosie aw;
4 Izi mozy cha zibeipa nôchhiepa ku liata pie aw na ta; chatawhcha abei a hrâhpa ta ryu a reih aw, Abeipa Pheisaihzy ABEIPA chata a tah.
5 Tilaipi tawhta tizy cha kua aw ta, chavah cha loh pathlahpa ta a kua aw;
6 chavahzy a roh chhie aw ta, Izi râh chavah a lohpa cha a sy aw ta, a kua aw, lothi nata ti sipopazy cha a ua khai aw.
7 Nile liata, a kiah lia tlaita sahroh bâna sibiepa zy nata chicheipa zydua cha raoh aw ta, phaoh pathlah aw ta, y khao aw vei.
8 Nga patupazy chhao cha cha aw ei ta, Nile liata keipa a chôh tyhpa zydua cha; ama chachôhna a chô aw ei ta, ti liata sao a parai tyhpa zy cha ama panao ha aw.
9 Cha leipa chhao cha poh rih dipa a hriapa chyhsa zy nata poh ngyuhpa a sapa chyhsa zy cha ama maohphyu aw.
10 Alô tôzy cha paraohpa ta y aw ta, a hlaotuhpa zydua cha ama palôhrupa ta ama pachâ a rôh aw.
11 Zôan khih liata abeisawzy cha ama hru kaw na; Phirao ryraotuhpa so chaipa ryraopa cha, ahrupa ryraopa hawhta deita a châ haw. Phirao hnohta, A sopa sawchapawpa hlâno ta abei sahlao sawchapawpa ei châ, kheihta zie ta a tah tyhpa e nama châ?
12 Khataihta e, na chyhsa sopazy cha ama y tly? Âmo chata atahmâ cha chho ei se, Izi râh chô liata hmo a vaw tlô awpa, Pheisaihzy ABEIPA raopazy cha pahno mawh sy.
13 Zôan khih liata abeisaw zy cha ahrupa vaw châ haw ei ta. Memphi khih liata abeisawzy cha dôpa ta ama y haw; cha pho sahlao ki liata alôzy chata, Izi sahlao cha ama paviasa haw.
14 ABEIPA ta Izi sahlao hry liata chhoruna thlahpa a paysa haw; sahhma paripa a pali liata a paochheichhâpa hawhta Izi sahlao cha ama raihria to rai liata ama paviasa haw.
15 Izi sahlao chata luh ta tlyma, chaolahmei ta tlyma, chiah ta tlyma, lothi ta tlyma, hria theipa khâhmah y khao aw vei.
16 Cha noh liana chata Izi sahlao cha chanôzy hawhta vaw châ aw ei ta, Pheisaihzy ABEIPA ku chathopa cha ama chô liata a chathopa vâta a chalyupa ta ama chi aw.
17 Zudah râh liata a ypa zy cha Izi sahlao châta rarôh y ngaitapa châ ha aw ei ta; ama moh ama reipa maih zy chata ama chi aw, ama chô liata a tlô awpa Pheisaihzy ABEIPA bie raopa vâna chata.
18 Cha noh liana chata Kana sahlao reih a cheihpa nata Pheisaihzy ABEIPA lâta chhiesapa ta bie a taihpa zy cha Izi râh liata khihpi miapangawh y aw ta, miakha cha Noh Khihpi bipa ta a y aw.
19 Cha noh liana chata Izi râh lia liana chata ABEIPA châta maisâh y aw ta, a râhri liana chata ABEIPA châta lôbôna a y aw.
20 Cha cha Izi râh liata Pheisaihzy ABEIPA china châta ngiana nata pahnona a châ aw; pasaipa-ituhpa zy vâta ABEIPA aw tlôh aw ei ta, ano ta pachhatuhpa nata pabohsatuhpa tuah aw ta, ano chata âmo sahlao cha a pachha aw.
21 ABEIPA cha Izi sahlao pahnopa châ ha aw ta; Izi mozy chata cha noh liana chata ABEIPA ama pahno aw; atheihna nata hmohlâpa ta achhy aw ei ta; ABEIPA lâna chata bie â taih aw ei ta, achhy aw ei ta; ama patlô hra aw.
22 ABEIPA ta Izi sahlao cha a tu aw, tu aw ta, amâ ngiarih aw; chatawhcha ABEIPA lâta kua heih aw ei ta, ano cha âmo a hawpa ta y aw ta, âmo a patlâh aw.
23 Cha noh liana chata Izi râh tawhta Asuria râh taihta lâlai y aw ta, Asuria mozy cha Izi râh lâta sie aw ei ta, Izi mozy cha Asuria râh lâta ama sie hra aw, Izi mo chata Asuria mozy chhaota hmaohkhata Khazohpa amâ chhy ha aw.
24 Cha noh liana Izarel sahlao cha Izi sahlao nata Asuria sahlao pathôhnapa châ aw ei ta, leilô liah liata byhnâ ama châ aw,
25 Pheisaihzy ABEIPA chata, “Ei chyhsa Izi sahlao nata ei ku hriapa Asuria sahlaozy chata ei ryuto Izarel sahlaozy cha byhnâ awpa ta y mawh sy,” tahpa ta byhnâ aw tlôh ta.