Ethiôpia kyh chhochhieliena
1 Aw, mathlaw chakhypa paro ngâpa râh Ethiôpia râh liata chavah zy haosâ liata a ypa,
2 Nile liata ti chô liata lothi balyh zy liata lyuhchâpa sahlao a tuahtuhpa cha! Zikyu a râpa thatlôpa zy saih u, phopi do a sâhpa a mih ngaitapa hnohta ama pua rakha tawhta atahmâ taihta chyhsa chi a chhihpa zy hnohna chata sie teh u; cha phopi chata râh raih tyh ei ta, ama tlypa tyh hra, ama râh cha chavahzy chata a pachhaih.
3 Khizaw liata a pahrâpa zydua nata leilô chô liata a ypa saih u, tlâhzy liata pahnona ama chaluah tita moh teh u! Chiahmie a tô tita, nahthlie teh u!
4 ABEIPA ta ei hnohta he tana heta a reih:” Y molo aw na ta, ei pahrâna liana heta ei sai thlâh ha aw, nohsa nota a lopa hawhta nata sâhhria daihti nota diati hluhpa hawhna heta,” tahpa ta.
5 Kre lyu daihti hlâta a paw zô ta, a paw cha kre thei machy a châ tina chata, a chiah dipa zy theilâpa kô taina chaizôh ta tai tlôh aw ta, a chiah a seihpa ta a zawhpa zy cha a chhaw pathlah hra aw.
6 Chazy cha tlâh liata pavaw rihkawhpa zy châta nata alei liata sahrâhpa zy châta siesaipa ta ama y aw. Chatawhcha pavaw rihkawhpa zy châta âmo cha nohpi noh chhôhta nie aw ei ta, alei liata sahrâhpa zydua chata chasipaw noh chhôhta ama nie aw.
7 Cha tina chata Pheisaihzy ABEIPA moh yna su liata Zaio Tlâh liana chata, Pheisaihzy ABEIPA hnohta pie awpa ta chyhsa doh sâhpa, a mih balôpa tawhta zy, ama y ta tawhta chyhsa chichhih ngaitapa tawhta zy, pho tlatlôpa nata apalaipa, ama râh chhao chavah ta a pachhaihpa zy tawhta hmosaipa cha ama vaw cheih aw.