Damaska kyh chhochhieliena
1 Damaska khih phao hripa cha, Damaska cha khihpi châ khao lei awpa ta lapa a châ haw. a raopa pahmaohpa dei a châ ha aw.
2 A khihpi zy cha chhâzaw ta siesaipa ta y ta; mietahkupa hrizy a byuhna awpa dei a châ aw, chazy cha a byu aw ei ta, ahy hmah ta pachisa aw veih ei.
3 Ephrai tawhta a dôhna kuh cha lei aw ta; Damaska tawhta khihnarâh lei aw ta; Suria râh liata a laibâhpa zy chhao ama lei aw; Izarel pathlazy rôhnahna hawh deita ta ama y aw, Pheisaihzy ABEIPA ta a tah.
Izarel chôta pachiana
4 Cha noh liana chata Zakaw rôhnahna cha pazaopa ta y aw ta, ano sapa thawna zie chhao cha a vaw zao ha aw.
5 Sâh a hriatuhpa ta sâh pakhypa ta a sâh pakhypa ta a sâh suh zy cha a ku ta a lapa hawhna tlai he châ aw ta; Rephai Saikao liata chyhsa ta sâh kamo ama thopa hawhna dei he a châ aw.
6 Ôli thokô chalyu chiehpa a kithlao a sâh chaipa liata a theilâpa miano miathôh tlyma, tho pathei ngaitapa a chiah seih chaipazy liata miapalih miapangawh tlyma a y tyhpa hawhna heta, cha liana chata kamo tho awpa a y aw, ABEIPA Izarel sahlao Khazohpa ta a tah.
7 Cha noh liana chata chyhsa ta âmo Taotuhpa lâta moh aw ei ta, ama mozy chata Izarel sahlao Mo Pathaihpa cha a za ha aw;
8 maisâh âmo ku ta taopa lâna zy chata moh khao leipa aw ei ta, âmo ku ta taopa Ashera zy tlyma rohpahâhpa raona maisâh zy tlyma za khao aw veih ei.
9 Cha noh liana chata ama khih a ipa zy cha tho thih nata tlâh laki liata su a râsai chiehpa, Izarel pathlazy hmiakô liata amâ râsai chiehpa hawhpa kha a châ aw, a to zydua roryhrapa a châ ha aw.
10 Na pachhana Khazohpa my haw chi ta, na bohna Lôpanô cha a thei thlâh ha tlôh leipa chi ta; chavâta thokô a ngia ngaitapa zy loh tyh chi ta, a chhôh liana chata a chiah nanopa zy patao tyh chi ta,
11 na loh nota dôh tyh chi ta, my ta na chi cha na papawsa tyh, châhrasala a theilâpa lyupa cha pachârôhna nata thata pasana noh liana chata a lei tyh.
12 Chyhsa hluhpi kalihpi a topa tilaipi zy pyu paropa hawhta a paropa zy nata; phopi kalihpi a topa ti chahra ngaitapazy hawhta a chahra ngaitapa zy rimâ cha!
13 Phopi cha ti chahra ngaitapa pyu hawhta ama chahra aw; ano chata ra aw ei ta, lâhlapi lâta ama râ aw, tlâ liata savia thlih ta a phaohpa hawhta nata buhchâ khisô ta a phaohpa hawhta a chadaipa ta ama y aw.
14 Zâlâ ta a to zydua chichhihpa ta y aw ta! Khihdei hlâta y khao veih ei! Cha cha maniah a hraotuhpa zy tovyuh châ ta, maniah a paru patuhpa zy eih a châ hra.