1 Râhzy chôta ryureituhpa chata mietahkupa taw cha Sela khih râhpathohpa lâta a ypa tawhna chata Zaio sawchanônô tlâh lâna chata paphao teh u.
2 Môaba sawchanônôzy cha pavaw aviavipa a bu tawhta a thyusaipa hawhta Arnaw chavah taina zy liata ama vaw y aw,
3 A ryhna maniah raopa la, ryu maniah reipa teh; na nohpahli cha nohchhô ta tao la; topa ta a ypazy cha nyu la; a viavipazy cha patusa khah y;
4 Môaba tawhta topa ta a ypazy cha na hnohta pahrâ mawh sy; âmo chata a paraotuhpa hmia tawna chata a nyuna su châ mah y. A nyutuhpa cha khâpa hrao leipa ta taopa ta y haw tlôh ta, paraona dia haw ta, pasaipa-ituhpazy cha lyurâhpa tawhna heta pahleipadiapa ta ama y haw,
5 chatawhcha ryureina dyuchhai cha ngiachhiena liata pa-isapa ta y aw ta; cha chô liata Davi poh-o liana chata mo pakha ryureipa ta atyupa ta pachiana siapa tluapa ta hmo siapa a chatliepa ta taopa ta hmeihseihna kyh ta a tyu aw.
6 Môaba sahlao a palaina kyh, amâ palai ngaitapa thei pi ta; ama sâlâna zie nata ama palaina zie nata ama hiehâhna zie kyh cha; amâ palaina zy cha khâpa hmah châ vei.
7 Chavâta Môaba sahlao châta châ sala, mo to ta Môaba sahlao chata cha chaimâh ei se. Âmo chyuta cha chaimâh aw ei ta, Kiharese kre tlâh cha palôh chhie ngaitapa ta nama chakhei aw.
8 Hesbaw lyuzy cha va khai tlôh ta, Sibma krezô chhaota; phopi beizy chata a kô pha chaipa zy cha thlie haw ei ta, Zaza khih taih tlaita a zaw hôlô ta, râhpathohpa lâta a zaw ta; a chiahzy cha hie patla ta tilaipi chôta a zawpa ta khô haw ta.
9 Chavâta Sibma krezô cha Zaza chakheina ta ei chakhei aw; Hy Hesbaw nata Eliale y, ei mothlihzy ta ei cha bao aw na, nopi noh theilâpazy chô liata nata na sahriana chô liana chata awna pyu tla haw tlôh ta.
10 Thaphana cha la papa ta a y haw, lyu phapa tawhna zy chata alyna cha lah papa ta y haw hra ta; kresahdôzy liana chata hla sana rai y khao leipa aw ta, pyu thaphapa rai y khao hra aw vei; kresaona khaohzy liana cha a saotuhpa rai ta kresawti papua khao aw veih ei; awna cha ei padiasa haw.
11 Chavâta ei rizy he Môaba vâta totâ hawhta paro ta, ei chhôh cha Kiharese vâta paro hra ta.
12 Môaba cha a sâhpa su liana chata thazeipa ta a ypa hmôpa ta a y nota, a noh pathaihna su liata thlah chhâ awpa ta â vy tina chata, hmô aw vei.
13 Chazy cha Môaba thâtih ABEIPA ta cha hlâta a reipa kha a châ.
14 Atahmâ deikua cha ABEIPA ta, Hlao a hmôtuhpa kô reina zie, kô thôh chhôhta Môaba rôhnahna cha a zawpi lai ngaitapazy chhaota mohnaopa ta paysapa ta y aw ta, a laibâhpa zy a chyhta deita rei khi leipa ama châ aw, tahpa ta a rei haw.