Môaba kyh chhochhieliena
1 Zâ khata Môaba phaohripa cha.Ar khih cha paraopa ta a ypa vâta, Môaba cha khâpa hmah châ leipa ta taopa ta y haw tlôh ta; zâ khata Kir khih cha paraopa ta a ypa vâta, Môaba cha khâpa hmah châ leipa ta taopa ta y haw tlôh ta.
2 Dibô sawchanônô cha su a sâhpa zy lâna chata cha awpa ta khy haw ta; Môaba sahlao chata Nebô khih nata Medeba khih cha chakhei ei ta. Ama luh zydua pôlô khai haw ta, kâh hmi zydua ngyupa ta y khai haw ta;
3 ama othliah zy liata latho pala poh ta ama chaizy a saih ei ta; ama o chô liata zy nata ama othliahzy liana chata chyhsa zydua ta thata chapa ta awh ngâ ei ta.
4 Hesbaw sahlao nata Eliale sahlao cha aw ei ta, ama ao cha Zahaza khih taih chhaota theipa ta y aw ta; chavâta Môaba sahlao pheisaih chaihrai hnei chaipa zy cha ao paro ngaitapa ta awh ei ta; ama hrona cha ama chhôh liata a chalyu ta.
5 Môaba sahlao vâta ei pathipalôh cha aw ta; ama chyhsa phapa cha Zawa khih lâta nata Eklaselisiza lâta a râ ei ta. Luhi chakhâ liana chata chana chôta ama khy; Hôrônai khih lâpi liana chata pahleipadiana ao ta sa tlôh ei ta;
6 Nimri tizy roryhrapa ta y tlôh aw ta; sibiepa cha raoh khai haw ta, sibiepa panyupa chhao pie hra vei, khâpa hmahta a hropa rai y tlôh leipa ta.
7 Chavâta ama sôh hneichhôhpa zy nata ama pasopazy cha Vatiepa Rabu a hneipa lâna cha ama siekhei aw.
8 Nôpona awna cha Môaba râhri zy liana chata pathâh tlôh ta; cha ngâna pyu cha Eklai khih lâta pathâh ta, cha ngâpa pyu cha Bereli khih lâta a pathâh.
9 Dibô khih tizy cha thisaih ta bie tlôh ta; Dibô khih chô liana chata hmo a tha viata patlôsa tlôh aw na ta, Môaba sahlao tawhta a râpa zy chô liata nata cha râh chyhsa laibâhpa zy chô liana chata chakeibarôhneipazy ei patlôsa aw.