Babylaw beipa reipachhiena
1 ABEIPA chata Zakaw sahlao ngiachhiena hnei aw ta, Izarel sahlao cha a tlypa ta âmo râh tlai liata paysa aw ta, khichhaipa chyhsazy chata âmo a bai aw ei ta, Zakaw chhôhkhapazy cha khâchâ ama patu aw.
2 Chatawhcha pho hluhpi ta âmo a chhi aw ei ta, ama su awpa ama tlôkhei aw, chatawhcha Izarel chhôhkhapazy chata ABEIPA râh liana chata âmo cha seichapawzy nata seichanôzy ta hnei aw ei ta; âmo sei ta a hneipazy cha sei ta patu aw ei ta, âmo a taolatuhpazy chô liana chata ryu ama reih aw.
3 Na pachârôhna tawhtapa zy, nâ tymâna tawhtapa zy, raihria ru ngaitapa ama cha pahriasana tawhtapa zy ABEIPA ta a cha pahâsa noh liana chata,
4 he pakhona bie he Babylaw bei aw thlupa ta na reih aw; “Kheihta zie ta e pasaipa-ituhpa cha a dia kaw ha dia! Kheihta zie ta e ngôh khihpi cha a dia kaw ha dia!
5 ABEIPA chata hmoparaopa chôhchahrei thlie haw ta, ryureituhpazy ryureina chôhchahrei cha,
6 chyhsa to hiehâhna chôta tu lymâ tyhpa ta, phopizy hiehâhna chôta ahy hmah pakhâ beih leipa taolana liata ryureipa tyhnapa cha.
7 Leilô zydua he a pahâ ta, sidiapa ta y ta; hla sapa pyu a dia.
8 Na chô kyh bie vâta meisa kôzy cha thaphapa ta y ei ta, Lebanaw liata sidy thokôzy chhaota, Panawhpa ta na y rakha tawhta cha, a thlutu awpa rai keimo lâta a khy beih khao veih ei,’ tahpa ta.
9 A ry lâta Sheôl cha na vaw tlôpa cha dy awpa ta nâma vâta atymâpa ta a y, athipa, alei liata abei chaipazy cha nâma vâta pasyupa ta y ei ta; phopizy abei zydua cha ama ryureina dyuchhai tawhta a pathyu haw.
10 “Cha zydua chata na hnohta he tana heta ama reih aw: ‘Nâ chhao keimo hawhta thazeipa ta na châ haw hra ma? Keimo hawhta na y haw!
11 Na rôhnahna cha Sheôl lâta chhihthapa a châ haw, na totâ selao pyuzy chhaota; châkariepa cha na ry liata a phawpa ta y ei ta, châkariepazy châta a cha khu haw hih.
12 “Hy Deiva Awhsi, My sawchapaw a y, kheihta zie ta e avâ tawhta tlapa ta na y tly! Phopizy tha a pazeisatuhpa kheihta zie ta e alei taihta chhawh pathlapa ta na y tly!
13 Na pathipalôh liata cha, ‘Avâ lâ kiah aw na ta; Khazohpa awsizy chô lâna khita ei beidyuchhai ei pasâhsa aw; pakhyna tlâh maw chhâna liata a ypa liana chata atyu aw na ta;
14 meihdo hlâta a sâh viapa zy liana khita kiah aw na ta, Chônôchaipa hawh tlaita ei y aw na,’ na tah tyh bao hrapa kha.
15 Châhrasala Sheôl liata panawhsapa ta y tlôh aw chi ta, Khaotlô chy chhâ kariena taihna chata.
16 Cha hmôpa maihta pakhâta ta cha moh aw ei ta: He chyhsa he ma alei chalyupa ta, khihnarâh chalyupa ta,
17 khizaw râhpathohpa hawhta taopa ta cha liana chata a khihpi zy pahleipadiapa ta, a patâhpa zy âmo o lâta sie awpa ta a papua beih leipa cha? tahpa ta na thâtih ama reih aw.
18 Phopi abei zydua, âmo zydua ta ama o chyu liata a rôhnah ngaitapa ta a mô aw ei ta;
19 nâ deikua cha a chiah pasichhih ngaitapa nata chariah thiepa, zaozi ta a chopa khaohtlô liata alôzy hry liata a zupa sahlao hawhta na thlâ o tawhta a hlapapi ta thypa ta tlao na y haw hih, thi chipa tlypapa hawh tlaita.
20 Na râh pahleipadia chi ta, na chyhsazy na chhawhsao hawpa vâta ama hry liata pabupa ta y aw va chi, Hmo moleina a taotuhpazy moh cha chhâzaw ta reih aw veih ei!
21 Thyupa ta leilô hneipa ta khizaw chô he khih ta ama pabie lei nawpa ta, ama pawzy hmoparaona vâta a sawzy thiepa ta a chhuahdy teh u,” tahpa ta.
22 “Âmo lâna cha thyuhnao aw na ta, Pheisaizy ABEIPA ta a tah, Babylaw tawhta moh na ta, laibâhpazy nata sawchapawpa nata sawchapawpa sawchapawpa cha ei pahleipadia aw, ABEIPA ta a tah.
23 Sawku châta hneina ta tao aw na ta, ti-opazy ta chhao ei tao hra aw, pahleipadiana ophi ta ei phi aw, Pheisaihzy ABEIPA ta a tah.
Asuria paraona zie
24 Pheisaihzy ABEIPA ta chhie sa ta: Ei pachâpa hawhna tlai heta a vaw tlô thlyu aw na, ei raopa hawhna tlai heta a y hra aw,
25 ei râh liana chata Asuria chyhsa parao aw na ta, ei tlâhzy liana chata ei phei ry liata ei tly aw; cha tina chata a raopaky pakypa cha nâma tawhna chata lei aw ta, a hmo hripa cha na ngiatlâh tawhna chata a lei hra aw.
26 He a chhuahna he leilô zydua chôta a chhuahpa cha a châ; cha cha phopi zydua chô liata ku pazawhpa cha a châ.
27 Pheisaihzy ABEIPA chata a chhuah ha tlôh ta, ahy e a pakhâ aw tly? Ku cha pazawhpa ta y haw ta, ahyma a paliesa heih aw tly?” tahpa ta.
Philistina kyh chhochhieliena
28 Abei Ahaza thina kô liana khata he phaohripa he a vaw y haw.
29 Hy Philistina y, namâ tuna chôhchahrei a tlie hawpa vâta thaphapa ta y khâ, parih thari tawhna chata vâzi vaw pua tlôh aw ta, a patheipa cha parih mei-ia a zaw theipa a châ aw.
30 Sipasapazy cha ei sibie su liata nie aw ei ta, dyhchhiepa zy cha â bohpa ta amâ zia aw; na tharipa deikua cha chakâpa ta pathiesa aw na ta, nâ eih a laibâhpazy cha thiepa ta ama y aw.
31 Hy chhikao y; thata cha teh, hy khihpi y, awh teh; hy Philistia y, tlokhu ta na zao khai haw! Maw lâ tawhta khakhaipa vaw pua tlôh ta, ama daihti raopa zy liana chata hnoh a khawpa rai y beih veih ei.
32 Phopi lyuhchâpazy cha kheihta e eimâ chhy aw? ABEIPA ta Zaio cha padua ta, a chyhsa hry liata sipasapazy cha ano liata ama ngâ aw,” tahpa ta a cha aw.