Babylaw kyh chhochhieliena
1 Babylaw kyh chhochhieliena Amôza sawchapawpa Isai ta a hmôpa cha.
2 Molaipazy Chhikao liana chata amâ ngia thei nawpa ta, tlâh pathaih parohpa liana chata pahnona chaluah ula, a paro ngaitapa ta amo châta awh ula, ku ta thliethlâ teh u.
3 Keima tlaita ei chyhsa ei raopa sahlao cha bie ei pie haw, ei chyhsa thatlô ngaitapa a pasasapa ta thaphapazy cha ei hiehâhna papaituhpa châta ei aw haw.
4 Tlâh liata zawpi pyu chyhsa hluh ngaitapa pyu hawhpa cha! Phopi khihnarâh zy ahmaohpakhypa sahlao pyu cha! Pheisaihzy ABEIPA ta chariah adyuh awpa ta zawpi sahlao ahmaohpakhypa a châ.
5 Âmo sahlao nata ABEIPA a pathi-iana chaihraizy cha,râh hlapapi tawhta avâ chy chhâna tawhta râh zydua he parao awpa ta amâ vy.
6 Cha chaimâh teh u, ABEIPA noh cha a hnia ha tlôh ta; Atotaotheipa tawhta pahleipadiana hawhta a vaw tlô aw na!
7 Chavâta ku zydua thazeipa ta y aw ta, chyhsa zydua pathipalôh a zao aw,
8 chatawhcha chi aw ei ta. Pasana nata pachârôhna zy chata patu chyu aw ta, chanô saw a zeipa hawh tlaita ama pasa aw. Noâh a tah rairiehpa ta ama y chyu aw; ama hmiazy mei paleih hawhta a châ aw.
9 Râh roryhrapa ta paysa awpa nata cha liata moleipazy cha a chhôh tawhta pahleipadia awpa ta, ABEIPA noh cha thata pathi-iana nata hiehâhna ru ngaitapa chhaota a vaw tlô aw na.
10 Avâ awhsi zy nata awhsi py zy chata ama khaihna papua leipa aw ei ta; noh cha a siena zy liana chata pazohsapa ta y aw ta, thlâpâ chhaota a khaihna cha pakhaihsa khao leipa ta.
11 Khizaw he ama moleina vâta hrie aw na ta, hmoparaotuhpa zy cha ama hmoparaona vâta ei hrie hra aw; chyhsa a palaipa luh a palaina zie cha pahlei aw na ta, chyhsa chichhihpa a palaina cha ei panawh hra aw.
12 Chyhsa he ngôh suapa hlâta a sôh viapa ta tao aw na ta, chyhsapa tlai he Ôphira ngôh suapa hlâ chhaota sôh viapa ta ei tao aw.
13 Chavâta avâ zy khi chalyusa aw na ta, Pheisaihzy ABEIPA hiehâhna vâta a hiehâhna ru ngaitapa noh liana chata alei chhao he yna pasiena taihta chalyusapa ta a y aw.
14 Sakhi chadaipa ta a ypa nata mietahkupa ahy hmah pahmaohpakhy leipa hawhta, chyhsa to âmo chiheihzy lâ chyuta a heih aw ei ta, chyhsa to âmo râh lâ chyu amâ râpai aw.
15 Ahyrai ama hmôpa maih a chôsaopa ta y aw ei ta, ahyrai ama patupa maih zaozi ta papaopa ta ama y aw.
16 Ama hawsaihzy chhao ama mohmô liata a zaona taihta taisaopa ta y aw ei ta; ama ozy cha hraopa ta y aw ta, ama lahpinô zy cha taolana chôta ykhei aw ei ta.
17 Midia sahlao âmo adyuh awpa ta pathyu aw na ta. cha sahlao chata tâkâ pachâ leipa aw ei ta, ngôh chhao aly hra aw veih ei.
18 Ama libawzy chata satliapazy cha pazao aw ta; chhi thei chô liata chhao ngiachhiena hnei leipa aw ei ta; ama mokhaoh chata sawnawhpazy pahlôh hra aw veih ei.
19 Chatawhcha Babylaw, khihnarâh rôhnahpa Kaldia sahlao noâhpa nata a palaina cha, Khazohpa ta Sawdawma nata Kawmawra a pahleipadia no hawhna khata a y aw.
20 Khatita hmahta cha liana chata chyhsa pahrâ khao leipa aw ei ta, chhâ y chhôh zydua chata a chô liata a pahrâpa y hra aw veih ei; Arabia chyhsazy ta cha liana chata ama poh-o cha parai hra leipa aw ei ta, mietahkuvaituhpa ta cha liana chata ama mietahkupa zawzy cha pabyusa aw veih ei.
21 Râhpathohpa sahrâpa zy chata cha liana chata tlao a byu aw ei ta; ama ozy cha hmohrohneipa a rôh ngâpazy ta bie aw ta; cha liana chata pavawpizy pahrâ aw ei ta, cha liana chata syukipazy ta la aw ei ta.
22 Changie zy cha ama ku liana chata sâh aw ei ta, sihâzy cha ama o rôhnahpa zy liana chata amâ râ hra aw; a hriena daiti awpa cha tlô daihmâ haw ta, noh zy chhao pasihsapa ta y aw vei.