Zese chiah ryureina siapa
1 Zese thabypa tawhta chhyh vaw pua aw ta, a tharizy tawhta a chiah a vaw thaopa cha a pathei aw;
2 ABEIPA Thlahpa, sona nata novâhna thlahpa, ryraona nata thatlôna thlahpa, pahnona nata ABEIPA china kyh thlahpa cha a chô liata â choh aw.
3 Alyna cha ABEIPA china liata a châ aw. A mo ta a hmôpa hawhta pachiah leipa aw ta, a nah ta a theipa hawhta ra hra aw vei;
4 sipasapazy cha a sia ngaitapa ta pachiapa aw ta, alei liata a reisipazy chata pathlua hlei hnei leipa ta a rapa hra aw; a pakah chôhchahrei ta nôchhiepa zy cha tu aw ta, a hmao liata hu ta hmo paraopazy cha a tusao aw.
5 Siana he a chai a saihna châ aw ta, ngâchhihna he a chaisaina a châ hra aw.
6 Changie cha mietahkupa taw hnohta pahrâ aw ta, keichho cha mie taw hnohta a byu hra aw, viahchao taw nata chakeibarôhneipa dawpa zy cha hmaohkha ta nie khoh aw ei ta, hawti chyhpa ta ta âmo a chhihtha aw ei.
7 Viahchao nata chavyh cha a viasa aw ei ta; ama tawtazy hmaohkha ta amâ byu aw; chakeibarôhhneipa cha viahchao hawhta sâhkô a bâ hra aw;
8 hawtita sâhpi a pazypa cha chyuphao khaoh chô liata palao aw ta, hawti sâhpi a bapa chhaota a ku cha vâzi khaoh liata a chahrao hra aw.
9 Ei tlâh pathaihpa liana chata a pasâhsana rai y khao leipa aw ta; a paraona y khao hra aw vei; tizy heta tilaipi a bie thlâh hapa hawhta, leilô he ABEIPA novâhna ta a bie khai ha aw.
10 Cha noh liana chata Zese thari chyhsa to pahnona chata a duahpa cha; ano tlai cha phopizy ta pangai aw ei ta; a pahâna su cha a rôhnah aw.
Laibâhpazy thaphapa ta ama vaw kuana
11 Cha noh liana chata Abeipa chata a chyhsazy a laibâhpa, Asuria râh tawhta zy, Izi râh tawhta zy, Patharô râh tawhta zy, Kusa râh tawhta zy, Shina râh tawhta zy, Hama râh tawhta nata tilaipi liahpahlôzy tawhta la heih awpa ta a ei nona ta a ku a pazawh heih aw.
12 Phopizy chata pahnona tawh aw ta, Izarel papuapa sahlaozy cha pakhy aw ta, Zudah a pai pathlapa sahlaozy leilô ki palih tawhtapa cha a pakhy aw
13 Ephrai sahlao hnâchhaona cha lei ha aw ta, Zudah sahlao patypamâtuhpa zy cha pahleipadiapa ta ama y hra aw; Ephrai sahlao ta Zudah sahlao hnâchhao khao leipa aw ei ta, Zudah sahlao chhaota Ephrai sahlao cha patypamâ khao aw veih ei.
14 Châhrasala notla lâta Philistina mo ngiatlâh liata, a zâ zawpa ta a zâ choh aw ei ta; nôchhie sawzy cha ama hrao aw; Edoma nata Môaba sahlao chô liana chata ama ku pathla aw ei ta; Amawri pathlazy chata ama bie ama zyh ha aw.
15 ABEIPA ta Izi tilaipi lihchakohpa cha pahleipadia aw ta; Chavah chhao cha a thlih lalôhpa chata a ku chatho thlu aw ta, vatie miasari ta taona taihta tu aw ta, chyhsazy cha pheipazah chhao dâ leipa ta a chakâsa aw.
16 Chatawhcha Izi râh tawhta ama khy nota Izarel sahlao chata lâlai a ypa hawhta a chyhsa sahlao laibâhpa a ypa zy châna chata Asuria râh tawhta lâlai a y aw.