Pathipalôh moleipa cha a thi aw
1 ABEIPA bie cha ei hnohta vaw tlô heih ta:
2 “Izarel râh kyh liata he bieso ama hmâpa he khâpa tahna e a châ? ‘Pawzy chata kre thaopa nie ei ta, ama sawzy hâh â za na tahpa he.
3 Izarel liata he bieso he hmâpa nata taopa hnei khao aw veih eichi, ei hro na, Abeipa KHAZOHPA ta a tah.
4 Pachâ teh u, hrona zydua kei eih sai a châ; paw hrona kei eih a châpa hawh hra ta, sawchapawpa hrona chhao keima eih a châ: moleina a taotuhpa maih ama thi aw.
5 “Chyhsa cha a sia nata ryhpa bie hawhta nata a dopa ta a tao khiahtala,
6 tlâhzy liata nie leipa ta, Izarel chhôhkhazy khazoh nohthlahpa lâ a heih hra leipa ta, a vaih lahpinô chô liata hmo pasichhihpa tao hra leipa ta, chanô thaitly lei no a hnia hra leipa ta,
7 ahy chô liata hmahta hmo parao leipa ta, leibâhtuhpa sôhkâ tlao pakuapa ta, ahy hmah hrao leipa ta, nodipa hnohta niepa piepa ta, thluahruapa poh pabusapa ta,
8 a pôhna chadai awpa ta dyu pacheisa leipa ta, a pôhna chhao la hra leipa, hmo moleina tao awpa ta a ku a sohsipa ta, chyhsa nata chyhsa likawh ta pachiana do ngaitapa ta pachiapa ta,
9 ei ryhpa taopazy achhihpa ta, a dopa ta taopa ta ei pachianazy a vao khiahtala, chyhsa siapa châ ta, a hroh tlai aw, Abeipa KHAZOHPA ta a tah.
10 “Sawchapawpa paruhmâhpa sapa ta thisaih a palotuhpa châpa ta, he hawhpa rai he taopa ta a sa khiahtala,
11 a tao awpa tlao tao leipa ta, tlâhzy liata tlao nie ta, a vaih lahpinô papuapaleipa ta.
12 sipasapa nata dyhchhiepazy taolapa ta, hraopa ta a sôhkâ pakua leipa ta, khazoh nohthlahpazy lâta a heihpa ta, hmo pasichhihpa taopa ta,
13 a pôhna a y awpa ta piepa ta; a pôhna a la hra khiahta cha a hroh aw ma? Hroh aw vei. He hmo pasichhihpa zydua he tao haw tlôh ta; a thi tlai aw; ano thisaih cha ano chô liata a y aw.
14 “Châhrasala sawchapawpa vaw sa sala, a paw moleina taopa zydua kha hmôpa ta; chipa ta, cha hawhta tao hra leipa ta,
15 tlâhzy liata nie leipa ta, Izarel chhôhkhazy khazoh nohthlahzy lâta a heih leipa ta, a vaih lahpinô papuapalei leipa ta,
16 ahy chô liata hmahta hmo parao leipa ta, sôhkâ khâpa hmah la leipa ta, ahy hmah hrao leipa ta, nodipazy niepa tlao piepa ta, thluahruapazy poh pabusapa ta,
17 dyhchhiepazy tawhta ku a sohsipa ta, a pôhna la leipa ta, ei pachiana zie a taopa, ei biepiepazy hmâpa ta, ei ryhpa taopazy a chhituhpa a châ khiahtala; a paw hmoparaona vâta thi leipa aw ta, tlao a hroh awpa a châ.
18 A paw deikua nôchhie ngaitapa ta chyhsa pasaipa-ipa ta a unawhpa tararuahpa ta hraopa ta, a chyhsazy hry liata hmopha leipa a taopa vâta, a hmo paraona vâta a thi awpa a châ.
19 “Châhrasala, ‘Khazia sawchapawpa cha a paw hmoparaona a phaoh aw vei,’ nama tah tyh. Sawchapawpa chata ryhpa bie cha zyhpa ta hmo dopa taopa ta ei bieraopa zydua cha angiahpa ta a tao hra khiahtala, a hroh tlai aw mâ tâh.
20 Moleituhpa cha a thi awpa a châ. Sawchapawpa chata hmoparaona cha phaoh leipa aw ta, a paw chhaota sawchapawpa hmoparaona cha phaoh hra aw vei; chyhsa siapa siana cha ano chôta y aw ta, chyhsa hmoparaopa hmoparaona cha ano chô liata a y aw.
Khazohpa taozi a sianazie (Ezek 33: 10-20,)
21 “Anodeikuacha hmoparaopa chata a moleina zydua a heisaipa ta, ei bieraopazy angiahpa ta, ryhpa bie cha zyhpa ta hmo dopa a tao khiahta cha a hroh tlai aw; thi aw vei.
22 A taopasina a tao hawpa kha a thei thlâh hapa châ khao leipa aw ta; a vaw tao hawpa a siana liana chata a hroh aw.
23 Moleipa thina liana heta alyna rai ei hnei ma, a lâpizy cha aheisaipa ta a hrona a châ leipa cha? Abeipa KHAZOHPA ta a tah.
24 Anodeikuacha a siapa chata siana lâpi aheisaipa ta hmoparaonazy taopa ta, moleipazy taopa lymâ hawhta hmo pasichhihpazy taopa ta a hroh aw ma? A hmo dopa taopa khâpa hmah a thei thlâh hapa châ khao leipa aw ta; a hmoparaona a paraopa liana khata nata a moleina a taona liana khata cha liana tlai chata a thi aw.
25 “Châhrasala, ABEIPA taonazie he a do vei,’ tah tyh eichi ta. Hy Izarel chhôhkhazy saih u: Ei taona zie a do vei ma? Nâmo taonazie cha a do leipa tlao châ vei ma?
26 Chyhsa siapa chata a sianazy heisaipa ta hmoparaonazy a tao khiahta cha cha liana chata thi aw ta; hmoparaopa a taona liana chata a thi aw.
27 Cha leipa chhao, cha chyhsa moleipa ta a moleina a tao hawpazy cha aheisaipa ta ryhpa bie angiahpa ta hmo dopa a tao khiahta cha a hrona a pachha aw.
28 A pachâpa ta a taopasina a vaw tao hawpazy cha aheisaipa vâta a hroh tlai aw, thi aw vei.
29 Châhrasala Izarel chhôhkhazy chata, ‘ABEIPA taonazie a do vei,’ tah ei ta. Hy Izarel chhôhkhazy saih u, ei taonazie he a do vei ma? Nama taonazie zy a do leipa tlao châ vei ma?
30 “Chavâta hy Izarel chhôhkhazy saih u, chyhsa to nâmo taona zie liana hawhta ei cha pachia aw ei, Abeipa KHAZOHPA ta a tah. Ro ula, nama hmoparaona zydua cha a heisai teh u, chatanachata hmoparaona cha nama leidiana châ aw vei.
31 Nama taopasina zydua nama parao hawpazy cha, thy khai ula, pathipalôh thiehpa nata palôhrupa thiehpa a tao teh u. Khazia nama thi aw tly, hy Izarel chhôhkhazy saih u?
32 A thipa thina liana chata alyna rai hnei va na, Abeipa KHAZOHPA ta a tah; chavâta a palie ula, hroh teh u.”