Pahmôpizy nata krezô pakhona
1 ABEIPA bie cha ei hnohta vaw tlô ta:
2 “Chyhsa y, Izarel chhôhkhazy hnohna chata bie pakhona tao la, pakhona bie ta reih teh;
3 Abeipa KHAZOHPA chata he tana heta a tah, tah teh: Pahmôpi lai ngaitapa, mathlaw phiapapi, mathlaw ki seih ngaitapa a chapaipa, hmi phi kalupa, Lebanaw liata a zaw ta, sidy tho cho la ta;
4 a cho panyu chaipa cha thlie ta, chyhsa a khiekhâna râh lâta a zawkhei ta, sôhdaona khihpi liana chata loh haw ta.
5 Cha râh chi cha la hra ta, lei phapa liana chata parisa ta; ti hluhpi kiah liana chata loh ta. Râhbu hawhta loh ta.,
6 chatawhcha laiseih ta, krezôh a hnaipa vaw châ haw ta, a chiahzy cha a vaw zaw pakhua ta, a tharizy cha a ry liata y ta. Chatanachata krezôh vaw châ ta, a chiahzy vaw pachiah ta, a chiah cha vaw thao haw ta.
7 “Pahmôpi lai ngaitapa hropa y hra ta, mathlaw phiapapi nata hmi phi kalupa hnei hra ta; he krezô he ano lâna khata a thari a zawh ta, a lona su tawhna chata ano lâta a chiahzy pachiah haw ta, ano cha ti ta a pasa thei nawpa ta.
8 A chiahzy pachiahpa ta nata krezô pha ngaitapa a châ theina awpa ti hluhpi kiah liata chhaolei phapa liata lopa a châ.
9 Abeipa KHAZOHPA chata he tana heta a tah: A pitloh palâh aw ma? A uah thlâh ha thei nawpa ta a theizy chhao pathlapa ta a thari chhaota phia aw vei ma? Hna a thao thiehpa zydua chhaota a uah pâ aw, a thari chhaota phia awpa ta hmotaotheina lai ngaitapa tlyma zawpi hluh ngaitapa tlyma a byuh hlei aw ma?
10 Lopa châ hra sala a pitloh palâh aw ma? Nochhi thlih ta a vaw chanaoh tina chata uah khai aw vei ma? A pyuna su liana tlai chata a uah aw, tah teh,” tah ta.
11 Chatanachata ABEIPA bie cha ei hnohta vaw tlô ta:
12 “Atyhmâhpa chhôhkhazy hnohna chata reih teh, he hmo yzie he pahno veih ei ma? Chho teh, Babylaw beipa cha Zerusale lâta a vy ta, ama abei nata abeisawzy cha patu ta, ano hnohta Babylaw lâta a chhi ta.
13 Ama abei pathla pakha patu ta, biehrai taokhei ta, chhie pasakhâhsa ta. (Râh liata chyhsa laipazy cha a chhi khai haw ta.
14 A khihnarâh nawh ta, ano ta a padua thei khao lei nawpa ta, a biehrai patuna chôna deita ta a padua thei nawpa ta).
15 Châhrasala arâzy nata chyhsa hluhpi vaw tuah awpa ta hiah awpa ta, Izi râh lâ lyuhchâpa tuapa ta a chô liata a ty haw ta. Hlaotlohpa ta a y aw ma? Cha hawhta a tahtuhpa chata anosasyh ta a pachha aw ma? Biehraina cha parao tlôhpa ta a boh thei aw ma?
16 Abei chaipa abei ta a taotuhpa pahrâna liana tlai chata chhiesapa zy mohnaopa ta, biehrai zy paraopa, ano hnoh tlaita Babylaw liana chata a thi aw, ei hro na Abeipa KHAZOHPA ta a tah.
17 Adyuhna liata chyhsa hluhpi chhaw sao awpa ta, tlâh byuhpazy nata kuhzy ama tao hlâ chhao, Phirao pheisaih sahlao nata zawpi lai ngaitapa chhaota khâpa hmah ta taopa thei aw veih ei.
18 Biehrai paraopa ta chhiesapa cha nawhtaw haw tlôh ei ta, bie a taih tawhta he hmo zydua he tao heih tlôh ta, a boh cheita aw vei.
19 Chavâta Abeipa KHAZOHPA chata he tana heta a tah: Ei chhiesapa nawhtaw ta, ei biehrai parao ta, cha tlai cha ano luh chô liata viari ei thô tlai aw, ei hro na.
20 Ei sao ta khu aw na ta, ei khohei liana chata a ao aw ta, Babylaw lâta a vaw chhi aw na ta, cha liana chata a paraona ei chô lia tlaita a paraonazy vâna chata ano ei pachia aw.
21 Chatawhcha a sahlao liata a râpaipa sahlao zydua cha zaozi ta thie aw ei ta, a laibâhpazy cha kaoki to liata amâ paih aw; kei, ABEIPA heta, ei reih haw tahpa nama pahno aw,” tah ta.
22 Abeipa KHAZOHPA chata he tana heta a tah: “Sidy tho a sâh ngaitapa cho cha, kei heta la aw na ta, ei loh aw; a sôpipa cho panyupa cha thlie aw na ta, tlâh sâhpa a luah ngaitapa liata ei loh aw;
23 Izarel a sâhna tlâh liana chata loh aw na ta, a chiahzy vaw pachiah aw ta, vaw pathei aw ta, sidy rôhnah ngaitapa a vaw châ aw; a ry liana chata mathlaw a hneipa pavaw chi to pahrâ aw ei ta; a chiah nohpahlina liata zy ama pahrâ aw.
24 Chatawhcha lyurâhpa tho zydua chata kei, ABEIPA heta tho a sâhpazy panai na ta, tho raopazy ei pahroh tahpa, ama pahno aw. Kei ABEIPA heta reih haw na ta, ei tao haw hra,” tah ta.