Izarel beizy chôta chaphôtuna
1 Cha leipa chhao chata Izarel abeisawzy kyh liata chaphôtuna phi la,
2 reih teh: Na nô khâpa ma a châ tly, chakeibarôhneipa panô a châ! Chakeibarôhneipa dawpazy hry liata a tawzy pasa ta â byu.
3 A taw pô kha, chakeibarôhneipa dawpa a tlohna taihta a pasa, sa tai thai ta; chyhsapa a tai hra.
4 Phopizy ta theipa ta; ama khaotlô ta ama patu; thua keihrai daipa ta Izi râh lâta ama tlôkhei.
5 A hâpa a hmô nota, a hnabei a vaw dy, a taw hropa chakeibarôhneipa dawpa ta a tao heih.
6 Chakeibarôhneipazy hry liata a khie laihta; chakeibarôhneipa dawpa a vaw châ, sa tai thai ta; chyhsapa a tai hra.
7 Ama o rôhnahpazy hrao ta, ama khihpizy rory pahrasa ta; a rôhpa vâta chyhsa nata lyurâh rory hra khaipa ta a y.
8 Phopi to vaw pôhpakhypa ta, lâkia tota khoheih tao ei ta; sao ama parai; ama khaotlô thupa ta ama patu.
9 Thua keihrai daipa ta a khona liata ama khô, Babylaw beipa lâta ama cheih; atâhna liata ama vaw tlôkhei haw, Izarel tlâhzy liata a ao theipa ta a y khao lei nawpa ta.
10 Na nô cha kresahdô liata ti ta pasapa kre a lyu, ti ta pasapa theilâpa a phapa a patheipa a bu a rôhpa a lyu.
11 “Ryureina chôhchahrei ta a chiah pachyupa vaw puapa ta; a chiah hropa zydua hlâta â sâh chai ta, a bu lypa ta â chaluah.
12 Châhrasala pathi-iapa ta ama thli, alei liata ama thy; nochhi thlih ta chanaoh ta; a theilâpazy a zô; a chiah pachyupa chhao tlie ta; mei ta a patlô.
13 “Râhpathohpa râh chawhkaraipa, ti y leipa liata a kôpipa ama loh.
14 A chiah tawhta mei vaw puapa ta, a theilâpazy chhao a nie khai haw. chatanachata ryureina chôhchahrei pachyupa châta chhao a chiah y khao vei. He he chaphôtuna hla châ ta, chaphôtuna châta hmâ awpa a châ.