Mara Holy Bible: Ezekiel

Showing posts with label Ezekiel. Show all posts

Ezekiel 1

Hrohsopa ta Khazohpa rôhnahna aluahna ta a hmôzie

1 Kô sythôhna, thla palihna, cha thla noh pangawhna liana chata, Keba chavah kiapâ ta atâhpazy hry liata ei y nona chata, avâ a pahy ta, Khazohpa aluahnazy hmô na ta.

2 Cha thla noh pangawhna liata, cha cha Abei Zehôiakina seichâna kô pangawhna châ ta,

3 Kaldia râh liata Keba chavah kiapâh ta Buzi sawchapawpa theihthaipa Ezekiel hnohna chata ABEIPA bie cha vaw tlô ta, ABEIPA ku cha a chô liata y ta.

4 Cha ei mo no ta, maw lâ tawhta thlihpi ru ngaitapa vaw pua ta, meihdo chhakalupa a ia ngâpa a chheipâh zydua phu a khaih hapa amei chhôh liah liata a pathliepa hawhta a ypa châ ta.

5 Chatawhcha cha hry tawhta hmohrohneipa miapalih alyupa vaw pua ei ta. Amâ lânazie cha he hawhna heta a châ: chyhsapa lyuna hnei ei ta,

6 hmia sâpalih hnei chyu ei ta, mathlaw sâpalih hnei chyu hra ei ta.

7 Ama pheizy cha patlâh ta, ama pheipazah rylâ cha viahchao taw pheipazah hawhta châ ta; dawh pathlie ngaitapa hawhta pathlie ta.

8 Ama kâ lâ bao palih liata, ama mathlaw ry liana chata chyhsapa ku hawhpa he hnei ei ta. Âmo papalih ta ama hmia nata ama mathlawzy cha he hawhna heta a châ:

9 ama mathlawzy cha apazao lymâpa ta, ama sie nota chhao a pahie beih leipa ei ta, ama dady ta a siepa ama châ chyu.

10 Ama hmia ta a lyupazy cha chyhsa hmia hawhta châ ta, ama papalih chata ama chachâh lâchhâhta chakeibarôhneipa hmia phaoh ei ta, ama papalih chata ama chavei lâchhâh viahchao tôhpa hmia hawhta phaoh ei ta, ama papalih chata pahmô hmia hawhta phaoh hra ei ta.

11 Ama hmiazy cha hawhna cha châ ta. Chatawhcha ama mathlawzy cha pakai ei ta, ama mathlaw miano chata pakaipa ta pazao chyu ei ta, miano ta ama pôhpa khu ei ta.

12 A hmia lâchhâ ta sie chyu ei ta, thlahpa siena la awpa liana chata sie ei ta, ama sie nota chhao a pahie beih veih ei.

13 Ama lânazie ta hmohrohneipazy ama lyu chaipa cha lôiatheipa kâ ngâpa hawhna he châ ta, meirei hawh tlaita a châ, hmohrohneipazy hry liana chata kiah tyh chô tyh ta; mei cha khaih ngaita ta mei tawhna chata dôhla vaw pathlie ngâ kaw ta.

14 Chatawhcha hmohrohneipazy cha dôhla pathliepa hawhna tlai chata a râ hrei ei ta.

15 Hmohrohneipazy ei mo no ta, hmohrohneipazy kiapâh liana chata ama hmia sâpalihzy chata alei liata talaili phei miakha lymâ ta hmô na ta.

16 Talaili phei nata a pielyunazie cha: bery lô hawh tlaita a lâ ta; miapalih ta alâna zie miakha hnei ei ta, ama lânazie nata ama pielyuzie cha talaili phei miakha chhôh liata talaili phei hropa a ypa hawhta a châ.

17 Ama sie nota cha ama kâ lâ miapalih ta ama sie thei, ama sie nota chhao a pahie beih veih ei.

18 Ama talaili phei a hlôhpa tlâhzy cha a sâh ngaitapa nata rarôh y ngaitapa a châ; ama miapalih chata a hlôhpa tlâhzy cha mohzy ta a bipa hnei ei ta.

19 Chatawhcha hmohrohneipazy cha ama sie nota ama kiapâh liata talaili pheizy cha sie tyh ei ta; hmohrohneipazy cha alei tawhta chalopa ta ama y nata talaili pheizy cha chalopa ta y tyh hra ta.

20 Thlahpa siena lâ awpa maih ta sie ei ta, cha lâna chata thlahpa cha sie awpa châ ta; talaili pheizy cha ama kiapâh ta chalopa ta y ei ta, hmohrohneipa thlahpa cha talaili pheizy liana chata y tlôh ta.

21 Chazy ama sie nona chata hezy he sie ei ta; chazy ama duah nona chata hezy he a duah ei ta; chazy alei tawhta chalopa ta ama y nona chata talaili pheizy cha ama hnohta chalopa ta y ei ta; hmohrohneipazy thlahpa cha talaili pheizy liana chata y tlôh ta.

22 Hmohrohneipzy luh chô liana chata avâ khuna alyupa y ta, dâhaw pasohpa hawhta pathliepa rarôhy ngaitapa ama luh chô liata pakai ta.

23 Chatawhcha vadô ry liana chata ama mathlaw bao kha cha hmohrohneipa hropazy hriapa ta pakai ta; ama mathlaw bao kha heih chata ama pôhpa khu ei ta.

24 Chatawhcha amâ zaw nona chata ama mathlaw pyu cha ti hluhpi pyu hawhta, Atotaotheipa ao hawh tlaita, zawpi pyu paro ngâpa pheisaih sahlao pyu hawhna tlai heta thei na ta; amâ vaw dua nona chata ama mathlaw cha pazi ei ta,

25 Chatawhcha ama luh chô liata avâ khuna chô liana khata ao vaw y ta: amâ dua nona chata ama mathlaw cha pazi ei ta.

26 Chatawhcha ama luh chô liata avâ khuna liana khata abeidyuchhai alyupa, saphai lô hawhna tlaita a lâpa y ta, abeidyuchhai alyupa chô liana chata chyhsapa hawh tlaita a lâpa y ta.

27 Chatawhcha a chai tawhta a chô lâ a lânazie cha dawh pathliepa hawh tlaita, mei hawhna tlai heta a châpa ta hmô na ta; a chai tawhta a ry lâ a lânazie cha mei hawhna tlai he a châpa ta hmô na ta, a chheipâh phu khaih ha ta.

28 Vâsua nota meihdo liata meisakupa a luahnazie hawhna tlai heta a châpa ta hmô na ta, a chheipâh phu khaih ha ta. He he ABEIPA rôhnahna aluahnazie hawhpa cha a châ. Chatawhcha ei hmô nota a khu lâta pao na ta, bie reipa ao cha thei na ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 2

Ezekiel awna

1 Chatawhcha ei hnohta, “Chyhsa y, na phei ta a duah teh, na hnohta bie ei rei aw na,” tah ta.

2 Chatawhcha keima hnohta bie a reih nona cha Thlahpa cha keima liata a vaw ngia ta, ei phei ta na paduasa ta; bie na chhotuhpa cha nahthlie haw na ta.

3 Chatawhcha ei hnohta, “Chyhsa, Izarel pathlazy hnohta atyhmâhpa phopi ei chô liata aty tyhpazy hnohna chata ei cha tuah; âmo nata ama pathlatuhpazy chhaota he noh taihna heta ei chô liata hmo ama parao tyh.

4 Chhâ sâlâpa nata chhorupazy châ ei ta; ama hnohta ei cha tuah hih; ama hnohna chata, ‘ABEIPA Khazohpa chata he tana heta a tah,’ na tah awpa a châ.

5 Chatawhcha âmo ta ama nahthlie tlyma, nahthlie vei tlyma (chhôhkha atyhmâhpa châ tlôh ei ta) ama hry liata hrohsopa a y tahpa ama pahno thlâh ha awpa a châ.

6 Chatawhcha nâ, chyhsa y, âmo chi khah y, ama bie liata chhao china hnei khah y, na hnohta bobaw nata ahlohzy ypa ta râhcha-ia hry liata pahrâ hra la; atyhmâhpa chhôhkha châ hra ei sala ama bie cha chi khâ, amâ luahnazie liata riahchhiepa ta y hra khâ.

7 Chatawhcha ama nahthlie tlyma, nahthlie vei tlyma ama hnohta ei bie na rei awpa a châ; atyhmâh ngaitapa châ tlôh ei ta.

8 “Anodeikuacha nâ, chyhsa y, na hnohta ei reipa he nahthlie teh, chhôhkha atyhmâhpa zy hawhta atyhmâpa châ hra khâ; na pakah â la, ei cha piepa nie teh,” tah ta.

9 Chatawhcha vaw moh na ta, ku ta na vaw paza ta, ku liana chata châbu chatypa y ta;

10 ei hmiakô liata vaw pakai ta; a chhôh lâ nata a khôtho lâta ropa châ ta, chaphôtuna zy, mâchhiesana zy, hupona zy ropa ta y ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 3

1 Chatawhcha ei hnohta, “Chyhsa y, na hmôpa kha nie teh, châbu chatypa he nie la, Izarel chhôhkhapazy hnohna chata bie kei reih teh,” tah ta.

2 Chatanachata ei pakah â na ta, châbu chatypa cha na paniesa haw ta.

3 Chatawhcha ano chata ei hnohta, “Chyhsa, na py liata khô la, he châbu chatypa ei cha piepa heta na rih pabie mawh sy,” tah ta. Chatanachata nie na ta; a thlôhzie cha ei pakah liana chata kheihti hawhna tlai châ ta.

4 Chatawhcha ano chata ei hnohta, “Chyhsa y, sie la Izarel chhôhkhazy hnohna chata ei biezy he hmâpa ta kei reih teh.

5 Chyhsa reih nanopa nata reih rupazy hnohta tuapa châ tlôh lei khâh chi ta, Izarel chhôhkhazy hnohta tuapa tlao châ tlôh chi ta.

6 Phopi reih chi nanopa nata rei ru ngaitapa, ama bie na pahno thei leipazy hnohta tuapa châ va chi. Âmo hnohta ei cha tuah khiahtala, na bie ama nahthlie tlai aw na.

7 Châhrasala Izarel chhôhkhazy chata cha nahthlie aw veih ei, keima na nahthlie tlôh leipa aw ei ta; Izarel chhôhkha zydua cha hmia châ ngaitapa nata pathipalôh chhoru ngaitapa châ tlôh ei ta.

8 Chatawhcha na hmia cha âmo hmia liata a pachyu ngaitapa ta, na khi chhao ama khi liata a châ ngaitapa ta ei tao hih.

9 Na khi cha chilô hlâta a châ viapa ta tao na ta; chi leipa la ama mo padei liata chi hra khâ, atyhmâhpa chhôhkha châ hra ei sala,” tah ta.

10 Cha leipa chhaota ei hnohta, “Chyhsa y, na hnohta bie ei rei awpa zydua cha na nah ta nahthlie la, na pathipalôh liata khô teh.

11 Chatawhcha sie la, na chihei seichâna ta a ypazy hnohta tlôkhei la, ama nahthlie tlyma, ‘He hawhna he Abeipa KHAZOHPA ta a tah,’ tahpa ta reih la, chho teh,” tah ta.

12 Chatanachata Thlahpa ta na chalo haw ta, ei hnôh lâna chata pyu paro ngâpa he thei na ta, “A su tawhna heta ABEIPA rôhnahna cha byhnâ awpa ta y mawh sy,” tahpa ta,

13 hmohrohneipazy mathlaw a typa pyuzy, ama kiapâh ta talaili phei pyuzy, pyu paro ngaitapazy thei na ta.

14 Thlahpa ta na chalo ta, na la haw ta, hiehâh ngaitapa nata ngiaroh ngaitana chôta sie haw na ta, ABEIPA ku cha ei chô liata thatlôpa ta y tlôh ta;

15 chatawhcha Telabi liata seichâna ta a ypa Keba chavah kiapâh ta a pahrâpazy hnohna chata tlô na ta. Amâ tyuna liana chata atyuh na ta, noâh ngaitapa ta cha liana chata noh sari atyuh haw na ta.

Izarel riahvaihtuhpa(Ezek 33:1-9)

16 Chatawhcha noh sari a chhâ nahta, ABEIPA bie cha ei hnohta vaw tlô ta:

17 ‘Chyhsa y, Izarel chhôhkhazy vaihtuhpa ta ei cha rao; chatanachata ei pakah liata bie thei aw chi ta, keima vyuhpa ta zikyu nâ râ awpa a châ.

18 Moleipa hnohta ei bie, ‘Na thi tlai awpana a châ,’ ei tahpa, cha moleipa cha a hrona paboh awpa ta a moleina lâpi siesai awpa ta chhoreina hnei leipa ta, zikyu a râna bie chho hra leipa ta, cha moleipa cha a hmoparaona liata a thi khiahtala; a thisaih cha nâ liata ei hnawh tlai aw.

19 Anodeikuacha cha moleipa cha zikyu a râ chi ta, a moleina siesai leipa ta, a moleina lâpi a heisai hra leipa khiahtala, a hmoparaona liata thi aw ta; nâ deikua chata na hro tlao na paboh aw.

20 Chyhsa siapa chata a siana a heisaipa ta, hmoparaona taopa ta a hmiakô liata a hluana ei vaw soh khiahtala a thi aw; zikyurâna na hnei leipa vâta moleina liata thi aw ta, a hmo siapa tao hawpa cha a thei thlâh hapa châ aw vei; a thisaih cha nâ liata ei hnawh aw.

21 Châhrasala chyhsa siapa cha molei lei awpa ta zikyu na râ nahta, a molei leipa khiahtala, zikyurâna a papeisapa vâta a hroh aw, nâ chhaota na hro na paboh aw,” tah ta.

Hrohsopa bierei thei leipa ta paysapa a châna zie

22 Chatawhcha cha liana chata ABEIPA ku cha ei chô ta y ta; ei hnohta, ‘Thyu la, bypi lâ sie la, cha liana chata bie ei cha chho aw,” tah ta.

23 Chatanachata thyu na ta, bypi lâna chata sie haw na ta; cha liana chata ABEIPA rôhnahna cha, rôhnahna, Keba chavah kiapâh ta ei hmôpa hawhna tlai khata a vaw duah ta; kei cha â khu lâta pao na ta.

24 Châhrasala Thlahpa cha keima liata a vaw ngia ta, ei phei ta na paduasa ta; na chho ta, “Sie la, na o liata a khawhlôh teh.

25 Nâ la, chyhsa y, pachâ tua, khawhri ta cha buh aw ei ta, ama cha chahry aw, âmo hry liata charei khao aw va chi;

26 na paleih cha na dâh liata pabaisa aw na ta, na reih pathlie khao leipa aw chi ta; âmo padotuhpa châ khao leipa ta; ty hmâhpa chhôhkha châ tlôh ei ta.

27 Châhrasala na hnohta bie ei reih tina chata na pakah cha pa-âsa aw na ta, ama hnohna chata, ‘Abeipa KHAZOHPA chata he tana heta a tah,’ a nahthlietuhpa cha nahthlie sala; a nahthlie leipa cha nahthlie leipa ta y se; atyhmâhpa chhôhkhapa châ tlôh ei ta, a tahna tahpa ta na reih awpa a châ.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 4

Zerusale lana thâtih reina

1 “Nâ chyhsa y, alô rao chiehpa phiapa la la, na hmiakô liata soh la, cha liana chata khihpi, Zerusale tlai, nohthlahpa cha roh teh,

2 a chheipâh padôpa ta kuh sa la, tlâh byuhpa tao teh; pheisaih riena bu zy tao la, kuh paraonapa zy a chheipâh ta tao teh.

3 Chatawhcha nâma ta thua phiapa la la, nâma nata khihpi likawh liana chata thua pâhchhô châta chhôh teh; cha lâna chata pady la, padôpa ta y aw ta, nâma ta na padô awpa a châ. He he Izarel chhôhkhapazy chata pahno chhieliena a châ aw.

4 “Nâ cha, na chavei lâ a hniehpa ta a zia la, a chô liata Izarel chhôhkhapazy hmoparaona cha pahnie teh; a chô liata nâ zia chhôh noh zie lymâ hawhna chata ama hmoparaona na phaohpa a châ aw.

5 Ama hmoparaona kôzy cha nâ chata nohzy châ awpa ta rao ha tlôh na ta, noh za thôh nata noh sychaki a châ awpa châ; cha hawna chata Izarel chhôhkhapazy hmoparaona cha na phaoh awpa a châ.

6 Chatawhcha he he na paki khai nahta, na chachâh lâta a hniehpa ta a zia heih aw chi ta, Zudah chhôhkhapa hmoparaona na phaoh aw; noh sypalih na châta ei rao, noh kha cha kô kha châ lymâ ta.

7 Na bâh mâchiehpa ta Zerusale padôna lâ kha a heih la; na chhochhielie aw.

8 Chatawhcha khawhri ta cha bu na ta, na padôna noh na paki hlâ lei ta cha khataih lâ hmahta nâ heih awpa châ vei.

9 “Uit sâh zy, bâli sâh zy, bia zy, abie zy, satôpa zy, sâh nanopa zy la la, beih miakha liata soh la, viahchhâ ta tao teh. Na kâ lâta a ziahnie la, nâ zia chhôh noh za thôh nata noh sychaki chhôh cha, cha cha na nie awpa a châ.

10 Na nie awpa cha pathlia khaipa châ ta, noh khata sekel syno a châ aw; a daihti hnei kawpa ta na nie awpa a châ.

11 Chatawhcha tizy chhao, panua khaipa ta na doh awpa châ ta, hin su charu pachhaihpa ta su kha a châ aw; a daihti hnei kawpa ta na doh awpa a châ.

12 Bâli sâh viahchhâ nie ta na nie awpa a châ, ama mohmô lia tlaita chyhsa ie nahta na chhoh aw,” tah ta.

13 Chatawhcha ABEIPA chata, “He hawhta niepa pathaih leipa he, Izarel pathlazy chata ei papua awpa phopizy hry liata ama nie aw.” tah ta.

14 Chatawhcha kei chata, “Â, Abeipa KHAZOHPA! Pachâ tua, ei hrona cha pathaih leipa châ beih leipa ta; ei satlia tawhta atahmâ taih chhaota ano kho ta a thipa tlyma, sa ta a taipa tlyma cha nie beih tlôh lei khâh na ta. Sa pasichhihpa ei pakah liata a ngia hra vei,” tah na ta.

15 Cha liana chata ano chata ei hnohta, “Chyhsapa ie vyuhpa ta viahchao ie cha pie na ta, na niepa cha hezy heta na tao awpa a châ,” tah ta.

16 Cha tawhna heih chata ano chata ei hnohta, “Chyhsa y, Zerusale liana chata niepa luh hrona cha parao aw na ta; ama niepa cha panua khaipa ta chado ngaitapa ta ama nie aw; ti chhao panuapa ta thlazoh ngaitapa ta ama dôh aw.

17 Niepa zy, a phahlapa ta thlahzohpa ta ama hmoparaona liata ama leidia khaina hâh ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 5

1 “Chatawhcha nâ, chyhsa y, zaozi tiah ngaitapa la la; na luh nata na kâhmi ngyuna awpa ta a ngyupa ta sâ ngyuna châta hmâh teh; chatawhcha khopathliana la la, sa cha pachhaih mah y.

2 Su thôh pachhaih ta su kha cha padôpa ta a y chhôh nohzy â ki tina chata khihpi liata mei liata rao awpa châ ta: su thôh pachhaih ta su kha cha la aw chi ta, a chheipâh liata zaozi ta na ri awpa a châ; chatawhcha su thôh ta pachhaih ta su kha heih cha thlih phao awpa ta na hie awpa châ ta, kei ta zaozi ta ei chadai aw.

3 Chatawhcha a chyhta la aw chi ta, na viahpakao pasihpa pawhmao liata na pabyu awpa a châ.

4 Chatawhcha hezy liatahpa he la aw chi ta, mei liana chata na thy awpa châ ta, a kâ aw; cha tawhna chata Izarel chhôhkhapa zydua liata mei a vaw pua aw,

5 Abeipa KHAZOHPA chata he tana heta a tah: He he Zerusale a châ; phopi zydua hry liata soh na ta, a chheipâh liata râhzy y ta.

6 Chatawhcha phopizy hlâta tha via ta hmoparaona taopa ta, ei bieraopa chô liata a ty ta, a chheipâh ta râhzy hlâta tha via ta, ei ryhpa taopazy hawhta chhao y hra vei ei.

7 Chavâta Abeipa KHAZOHPA chata he tana heta a tah: Nama chheipâh ta phopizy hlâta pôh via eichi ta, ei ryhpa taopa hawhta y leipa eichi ta, ei bie raopazy a vao hra leipa ta, nama chheipâh ta phopizy chata ei bieraopazy nama tao hra leipa vâta;

8 Abeipa KHAZOHPA chata he tana heta a tah: Pachâ teh u, kei tlai chhao heta ei châ dyuh ei, phopizy mohmô tlaita nama kyh liata ei patlô aw na.

9 Chatawhcha nama pasichhihna zydua vâta hmo ei tao beih leipa, a tao chhao ei tao beih khao lei awpa cha na chô liata ei tao aw na.

10 Chavâta pawzy ta na chhôh liata ama sawzy nie aw ei ta, sawzy chhaota ama pawzy ama nie aw; nâmo liata cha pachia aw ei na ta, nama chyhsa a laibâhpa zydua cha ziza lâta ei papai khai aw.

11 Chatanachata he tana heta Abeipa KHAZOHPA ta a tah, na puana nata na pasichhihnazy ta ei supathaihpa na papuapa vâta ei hropa hawhta cha chhawh pathlah aw ei na ta; ei mo ta cha my leipa aw ta, cha ngiachhie hra aw veih ei na.

12 Su thôh pachhaih ta, su kha cha potla ta tlyma, chakâh ta tlyma nâmo hry liata ama thi aw; su thôh pachhaih ta su kha cha na chheipâh liata zaozi ta ama thi aw; su thôh pachhaih ta su kha heih cha ziza lâta papai khai aw na ta, zaozi ta ei chadai aw.

13 “He hawhna heta ei hiehâhna patlô aw na ta, ama chô liata ei pathi-iana patlai aw na ta, ei pachâ a pha ha aw; ABEIPA heta ama chô liata ei hiehâhna ei patlai tina chata phahnai khohpa ta ei reih haw tahpa ama pahno aw.

14 Cha leipa ta na chheipâh ta phopizy hry liata nata a khiekhâpa zydua mohmô liana chata khih rypa nata mohnao chhihpa ta ei cha tao aw.

15 Hiehâh ngaitapa nata pathi-ia ngaitapa thapi ta chhoreipa ta na chô liata bieraopazy ei patlô tita na chheipâh liata phopizy mohmô liana chata reipachhiena nata taolana nata zikyurâna nata hmo rarôh-ypa na châ aw Kei, ABEIPA heta ei reih haw hih.

16 ama chô liata chakâhna châtai pha lei ngaitapa leidiana awpa nâmo leidiana awpa cha ei vaw patlasa aw; nama chô liata chakâhna papôh aw na ta, nama niepa luh hrona cha ei parao aw.

17 Nama chô liata chakâhna nata sahrâhpa a hrâhpazy vaw tua aw na ta, sawzy kypa ta ama cha tao aw; potla nata thisaih palona nama hry liata a charei aw, nama chô liata zaozi ei vaw patlôsa aw. Kei, ABEIPA ta ei reih haw hih,” tah ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 6

Izarel tlâhzy rao nawpa ta chhochhieliena

1 ABEIPA bie cha ei hnohta vaw tlô ta:

2 “Chyhsa y, Izarel tlâhzy lâna cha a heih la, ama hnohta chhochhielie la,

3 Izarel tlâhzy saih u, Abeipa KHAZOHPA bie he nahthlie teh u! Abeipa KHAZOHPA chata tlâhzy nata tlâh byupazy hnohta nata saikaozy nata athuhpazy hnohna chata he tana heta a tah: Kei, keima tlai heta nama chô liata zaozi vaw patlôsa aw na ta, nama asâhpa suzy cha ei parao khai aw.

4 Nama maisâhzy cha roryhrapa ta y aw ta. Nama noh khazoh nohthlahpazy cha paraopa ta a y aw; nama chyhsa thihpa rizy cha nama khazoh nohthlapazy thaby liata ei thy aw.

5 Chatawhcha Izarel pathlazy ri cha ama khazoh nohthlahpa thaby liana zy chata soh aw na ta; nama ryhpazy cha nama maisâhzy kiapâh liana chata ei hie aw.

6 Nama pahrâna su zydua liana chata khihpizy cha rao aw ta, asâhpa suzy cha roryhrapa ta a y aw, nama maisâhzy paraopa nata roryhrapa ta a châ thei nawpa nata nama khazoh nohthlahpazy paraopa ta a lei thei nawpa nata nama noh khazoh nohthlahpa cha thlupa ta y thei nawpa ta nama raihriazy cha a leidia thei nawpa ta.

7 Chatawhcha chyhsa thipazy cha nama hry liata pao aw ei ta, chatanachata ABEIPA ei châ tahpa nama pahno aw.

8 “Anodeikuacha râh to liata nama pai patla tina chata phopizy hry liata zaozi a khôkhâhpazy ama y awpa vâta, thokha cha ei pahlôh aw.

9 Chatawhcha nâmo hry tawhta a puapazy chata seichâna ta ama chhiena phopizy hry liana chata nâ thei thlâh ha aw ei ta, amâ pheina pathipalôh ei la hawpa nata ama mokhaoh ama khazoh nohthlahpa lâta a pheipazy cha ei paraopazie zy ama pahno aw; ama pasichhihnazy liata hmo moleipa âmo mohmô tlai liata ama vaw tao hawpa kyh liana zy chata amosasy ta ama pasie aw.

10 Chatawhcha ABEIPA cha ei châ tahpa pahno aw ei ta; he hmopha leipazy he ama hnohta tao aw na ta, khâpa hrao leipa ta reih va na tahpa ama pahno aw, tahpa ta,” tah ta.

11 Abeipa KHAZOHPA chata he tana heta a tah: “Na ku chabaihpa ta, na phei a tlai la, Aw! he Izarel chhôhkhapazy pasichhihna moleipa vâta; zaozi ta, chakâhna ta, potla ta pao tlôh aw ei ta.

12 Lâhlapi ta a ypa cha potla ta thi aw ei ta, lâhniata ta a ypa cha zaozi ta pao aw ei ta; a laibâhpa padopa ta a ypazy cha chakâhna ta ama thi hra aw. He hawhna heta ei hiehâh ngaitana cha ama chô liata ei patlôsa aw.

13 Chatawhcha tlâh sâhpa liata zy, tlâh laki zydua liata zy nata tho hropa maih ry liata nata oaka thokô buh to ry liata, ama khazoh nohthlahpazy hnohta rohpahâhpa ama hlâna su liata ama maisâh kiapâh ta ama khazoh nohthlahpazy kiapâh liata ama athihpa ri zy a y tina chata kei he ABEIPA ei châ tahpa ama pahno aw.

14 Chatawhcha ama chô liata ei ku pazawh aw na ta, râhpathohpa tawhta Diblah lâta ama pahrâna su zydua liata râh cha rorypahrasapa ta ei parao aw. Chatanachata kei he ABEIPA ei châ tahpa ama pahno aw,” tahpa ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 7

Daihti chhâna

1 ABEIPA bie cha ei hnohta vaw tlô heih ta:

2 “Nâ, chyhsa y, Abeipa KHAZOHPA ta Izarel râh hnohna chata: Chhâna! Chhâna cha râh ki palih liata a vaw tlô na.

3 Atahmâ he na châta chhâna a châ, na chô liata ei hiehâhna vaw patlô aw na ta, na yzie lymâ hawhta cha pachia aw na ta; na pasichhihna zydua cha na chô liata ei vaw patlôsa aw.

4 Chatawhcha ei moh ta cha pahlôh leipa aw ta; cha ngiachhie hra aw va na; na yzie zy cha na chô liata tlao vaw patlôsa aw na ta, na pasichhihnazy cha na chô liata a y aw. Chatanachata ABEIPA cha ei châ tahpa nama pahno aw, tahpa ta.

5 “Abeipa KHAZOHPA chata he tana heta a tah: Hmopha leipa, hmopha lei ngaitapa pachâ tua! A vaw tlô na.

6 Chhâna a vaw tlô na, chhâna a vaw tlô na; na chô liata a vaw thyu haw. Pachâ teh, a vaw tlô na.

7 Hy râh pahrâtuhpa y, na raona awpa na chô liata a vaw tlô na; daihti cha vaw tlô ta, noh cha a hnia haw tyhreina noh alypa ta, tlâh chô liata awna noh a châ leipa.

8 Atahmâ he ei hiehâhna cha na chô liata ei vaw leitha patoh aw na, na chô liata ei hiehâhna cha ei patlô aw; na yzie lymâ hawhta ryu ei reih aw; na pasichhihna zydua vâta ei cha hrie aw.

9 Chatawhcha ei mo ta pahlôh leipa aw ta ngiachhie hra aw va na; nama hryta pasichhihna a y chhôh cha nama yzie hawhta ei cha hrie aw ei. Chatanachata kei ABEIPA he a hrie theipa ei châ tahpa nama pahno aw.

10 “Pachâ teh, noh cha a vaw tlô hai! Na ryureina cha a vaw tlô haw, pachiana doleipa cha a paw haw, palaina cha a pitloh haw.

11 Nôchhiena cha moleina chôchahrei lâta a lie haw; ahy hmah ta y khao leipa aw ei ta, ama pyu tlyma ama hneirôna tlyma chhao ahy hmah ta ama hiatlia hra aw vei.

12 Daihti cha vaw tlô haw ta, noh cha a vaw hnia hai na. Chaleituhpa cha aly leipa sala, zuahtuhpa chhao cha pachârôh hra khah se, hiehâhna cha ama zydua chô liata y tlôh ta.

13 Zuahtuhpa chata hroh hrasala hmo zuapa hmô khao tlôh leipa aw ta; aluahna cha ama zydua kyh awpa châ tlôh ta; ahy hmah ta kua aw veih ei; ahy hmah ta ama hrona hrao leipa liana heta hroh patlô hra aw veih ei.

14 “Chiahmie cha tô ei ta, ato amâ haw ta; "hâhrasala adyuhna lâna chata ahy hmah sie veih ei, ei hiehâhna cha ama zydua chô liata y tlôh ta.

15 Khôtho liata zaozi, a chhôh liata potla nata chakâhna; râh liata a ypa cha zaozi ta thi aw ta; khihpi liata a ypa cha chakâh nata potla ta a palâ aw.

16 Ahyrai khôkhâhpa ta a râpazy cha tlâhzy liana chata saikao vachhuh hawh tlaita ama y aw, âmo zydua ta yru ngaitapa ta ama hmoparaona chyu liata.

17 Ku zydua cha thazeipa ta y aw ei ta, pakhu zydua cha ti hawhta a nai aw.

18 Lathopala poh a sai aw ei ta, pahlawna ta âmo pahly aw ta, hmia zydua liata nozana a lâ aw ta, ama luh zydua a paloh khai aw.

19 Ama tâkârizy cha othliahzy liata thy aw ei ta, ama ngôhzy cha hmo pathaih leipa a vaw châ aw; ama tâkâri nata ama ngôhzy chata ABEIPA hiehâna noh liana cha âmo pachha thei leipa aw ta; ama hrona lôhrâ patlô leipa aw ta, ama py pabie hra aw vei. Ama hmoparaona paona a châ haw tyhpa vâta.

20 Amâ tobina a ngiana cha apalaikhei nata ama pasichhihna nohthlahpa liata nata ama puana hmo lâta tlao ama pachâsa haw; chavâta ama châta hmo pasichhihpa ta ei vaw tao haw.

21 Chatawhcha hraona hmo chata khichhaipa ku liata pie aw na ta, alei liata moleipazy hnohta hraona hmo châta pie aw na ta; âmo ta ama vaw papuapalei aw.

22 Âmo cha a heisai aw na ta, ei su zipa cha ama papuapalei aw; paru hmâhpazy a vaw ngia aw ei ta, ama papuapalei aw,

23 chatanachata pahleipadiapa ta ama y aw. Thisaih palo hmâhpa ryureina ta bie ta, khihpi cha nôchhiena ta bie tlôh ta,

24 phopi hropa molei chaipazy a vaw ngiakhei aw na ta, ama ozy ama chhu aw; ama thatlôna ama palaikheipa cha pachhâsa aw na ta, ama su zipazy cha papuapaleipa ta a y aw.

25 Nôpona vaw tlô ta, thlahlôhna tlua ei ta, y chachei tlôh leipa ta.

26 Raona chô liata raona bie pathâhpa chô liata bie pathâhpa vaw y aw ta; hrohsopa liata aluahna tlua aw ei ta, châhrasala ryhpazy cha theihthaipa tawhta lei aw ta, machâzy tawhta chhosiena y hra aw vei.

27 Abei cha pachârôhpa ta y aw ta, abeisaw cha hnabeidyna chysia ta tobi aw ta, vâtlâh kuzy chhao a chalyu aw. Âmo liana chata ama yzie reisai ta tao aw na ta, ama hmotaopa lymâ hawhta ei pachia aw; chatanachata ABEIPA cha ei châ tahpa ama pahno ha aw,” tah ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48

Ezekiel 8

Zerusale liata pasichhihnazy hrohsopa ta aluahna ta a hmôzie

1 Kô charuna, thla charuna, cha thla noh pangawh noh liana chata ei o liata atyuh na ta, Zudah machâzy ei hmiakô liata ama tyu hra nona chata, Abeipa KHAZOHPA ku cha ei chô liata vaw y ta.

2 Chatanachata vaw moh na ta, chyhsapa alyupa hawhta aluahpa he vaw y ta; a chai tawhta mathi lâ a châ awpa hawhta a lâpa cha mei châ ta, a chai tawhta a chôlâ cha a di ngaitapa a pathliepa hawhta a châ.

3 Ku hawhpa he vaw pazawh ta, ei sâ ta na patu ta; Thlahpa chata alei nata avâ likawh ta na chalo syulyu haw ta, Khazohpa aluahna ta Zerusale lâ nâ chhi ta, Zerusale dôhpachhôh chhikao khawna thaby liana chata na tlôkhei ta, cha liana chata hiatliana khazoh nohthlahpa atyuna su y ta, cha chata hia patliasa tyh ta.

4 Chatawhcha bypi liata ei hmôpa lymâ hawhna khata cha liana chata Izarel Khazohpa rôhnahna cha a y.

5 Chatanachata ano chata ei hnohta, “Chyhsa y, maw lâ aheihpa ta mohmia pasaih tua teh,” tah ta. Chatanachata maw lâ a heihpa ta mohmia ei pasaih nahta pachâ tua, maisâh chhikao maw lâ a ngiana liana chata he hiatliana khazoh nohthlahpa he vaw y ta.

6 Chatawhcha ano chata ei hnohta, “Chyhsa y, ama hmotaopa kha na hmô ma? Izarel chhôhkhapazy ta hmo pasichhih ngaitapa, he liata ama taopa tlai, ei supathaihpa tawhta lâhlapi ta ei sie syulyuna awpa ta ama taopa kha. Châhrasala hmo hropa pasichhih via syulyupa na hmô heih aw,” tah ta.

7 Chatawhcha a dôhpachhôh a ngiana liana chata nâ chhi ta; chatawhcha vaw moh na ta, pâhchhô liana heta a pyupa vaw y ta.

8 Chatanachata ei hnohta, “Chyhsa y, pâhchhô kha vaw khie tua,” tah ta; chatawhcha pâhchhô ei vaw khie nah chata, ochhi vaw y thlâh ha ta.

9 Ano chata ei hnohta, “A ngia la, he liata moleina pasichhih ngaitapa ama taopa he moh tua,” tah ta.

10 Chatanachata a ngia na ta, hmô na ta; hmo hroh aly thaipa to nohthlahpazy, sahrâhpa pasichhihpa nohthlahpa zy, Izarel chhôhkhazy khazoh nohthlahpa zydua cha pâhchhô liana chata a chheipâh ta vaw y ta.

11 Ama hmiakô liana chata Izarel chhôhkha machâzy hry liata chyhsa sysari cha a duah ei ta, ama liah liana chata Shaphana sawchapawpa Zaazaniah a duah ta. Chyhsa to chata rohpahâhpa byh chaba chyu ei ta, chatawhcha rohpahâhpa khuh roh cha kiah ta.

12 Chatanachata ei hnohta, “Chyhsa y, Izarel chhôhkha machâzy zohna ry liata hmotaopa cha na hmô ma? Chyhsa to ta khazoh nohthlahpa chhôhpadâhpa liata ama taopa cha? ‘ABEIPA chata miah hmô leipa ta, ABEIPA chata râh cha a siesai haw mâ tâh,’ tah tlôh ei ta,” tah ta.

13 Âmo hmotaopa pasichhih via pachaipa hropa chhao na hmô heih aw,” ei hnohna chata tah hra ta.

14 Chatanachata ABEIPA o maw lâchhâh angiana ochhi lâta nâ chhi ta, cha liana chata chanôzy Tamuza chakheipa ta atyu ei ta.

15 Chatawhcha ano chata ei hnohta, “Hy chyhsa y, he he na hmô ma? He hlâta pasichhih viapa na hmô aw,” na tah ta.

16 Chatawhcha ABEIPA o dôhpachhôh viapa liana chata nâ chhi ta; ABEIPA o pathaihpa ochhi liana chata aikah nata maisâh likawh liana heta chyhsa pakih nata papangawh rachhôh ABEIPA o pathaihpa lâ hnôhchhypa ta ama hmiazy nochhi lâ aheihpa ta vaw y ei ta, nochhi lâta noh cha a chhy ei ta.

17 Chatanachata ano chata ei hnohta, “He he na hmô ma hy chyhsa y? Ama hmo pasichhihpa ama taopa, he liata Zudah chhôhkhazy châta hmo chynawhpa a châ? Râh cha nôchhiena ta pabie ei ta, ei hie na pahâh awpa ta vaw heih heih tlôh ei ta. Ama hnapasu cha chhobuh ta pakhâ ei ta.

18 Chavâta kei chhaota pathi-ia ngaitapa ta ei tao aw; ei mo ta’ pahlôh leipa aw ta, ngiachhie hra aw va na; ao paro ngaitapa ta ei nahkhao liata vaw aw hra ei sala, nahthlie aw va na,” tah ta.

Ezekiel (Ezekiel)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48