Moleipa nata mosiapa
1 Hmoparaopazy cha ahy hmah a chadai leipa ta a râpai ei ta, a siapazy deikua cha chakeibarôhneipa hawhta ama riah a pha.
2 Râh ta a paraopa vâta ryureituhpa hluhpi vaw y tyh ei ta; chyhsa hmo pachâna zie a thaipa nata pahnona a hneituhpa zy vâna deikua chata bohpi ta â duah aw.
3 Sipasapa a pasaipa-ituhpa dyhchhiepa cha niepa khâpa hmah a pahlôh leipa hmo a phaoh pathla khaipa vâsua hawhta a châ.
4 Ryhpa a heisaituhpa zy chata hmoparaopa reithai tyh ei ta, ryhpa a zyhtuhpa zy deikua chata ama pakhâ tyh.
5 Chyhsa moleipa chata pachiana pahno thai tyh leipa ei ta, ABEIPA atluatuhpazy deikua chata ato ama pahno thai tyh.
6 Hneirôhpa a yzie a do leipa ta a ypa hlâta, sipasapa yzie a do ngaitapa ta a ypa cha a pha via.
7 Ahyrai ryhpa bie a zyhtuhpa cha sawchapaw sopa châ ta, a zohpazy viasa deikua chata a paw maohphyuhna a tlôkhei tyh.
8 A pôhna a chadaipa ta a sôh a papôhtuhpa chata sipasapa tha a pasatuhpa châta a pachôpa.
9 Ryhpa nahthlie khoh leipa ta a heisaituhpa cha, a thlahchhâna chhao pasichhihpa a châ.
10 Chyhsa dopa lâpi pha leipa liata pasisatuhpa cha, ano khaotlô chaopa tlai liana cha tla aw ta; chyhsa pha pakipazy deikua chata hmophapa ryu ama to aw.
11 Hneirôhpa cha ano pachâ ta so ta; châhrasala sipasapa hmo pachâzie thaipazy chata ama tlua papua aw.
12 A siapa pahniena liana chata rôhnahna thata y ta; moleipa ama thyu nona deikua cha chyhsa zy ama nyu tyh.
13 Paraona a phihtuhpa zy cha thlao chhi leipa ta y aw ei ta, phih leipa ta phuah ta a heisaituhpa zy chata zawngiahna ama hmô aw.
14 Chipa ta a y tyhpa chyhsa cha a tha a pha na; pathipalôh a pachyutuhpa deikua cha vâchhiena liata â ngia aw.
15 Sipasapa chô liata ryureituhpa moleipa cha, chakeibarôhneipa a rôhpa hawhta nata chavyh a thyu ngâpa hawhta a châ.
16 Hmo pachâ zie a thai leipa abeisaw cha chyhsa a pasaipa-ituhpa châ tyh ta; uavana a haotuhpa deikua chata a hro chhôh a pasihsa aw.
17 Chyhsa thisaih a phaohtuhpa cha khaotlô liata a ngia aw ta; ahy hmah ta pakhâ kha se.
18 Ahyrai ta a do ngaitapa ta a ypa cha pachhapa ta y aw ta, a do lei ngaitapa ta a ypa deikua cha a pao patoh aw.
19 Alei a palietuhpa chata viahchhâ a hluhpi hnei aw ta: chyhsa leilôpa a zituhpa deikua cha a dyhchhie kaw aw.
20 Chyhsa ngâchhihpa chata byhnâ a hluhpi hnei aw ta, hneirôh patoh a chhuahpa deikua cha hrie leipa ta pua aw vei.
21 Chyhsa pathlua hlei hneipa he pha leipa ta; chyhsa ta viahchhâ tlaw vâta ama parao awpa châ hra vei.
22 Chyhsa khiehpa chata sôh a chadai ta, a chô liata phahlana a vaw tlô aw tahpa pahno hra vei.
23 Paleih ta chyhsa a papyupahlytuhpa hlâta cha, chyhsa a chhoreituhpa chata a hnôh lâta reithaina hluh via a to aw.
24 A paw tlyma a nô tlyma hrao ta, “Paraona châ vei,” a tahtuhpa cha, cha tlai cha pahleipadiatuhpa viasa a châ.
25 Pathipalôh karâypa chata atuna pathyu ta, ABEIPA liata ngâna a pahniehtuhpa deikua cha pathawpa ta a y aw.
26 Ano palôhrupa a ngâtuhpa cha ahrupa châ ta, so ngaitapa ta a ypa chyhsa deikua cha pachhapa a châ aw.
27 Sipasapa a pietuhpa cha a phahla leipa aw ta, mo pasosaituhpa deikua chata chhiesana thata a to aw.
28 Hmoparaopa ama thyu nota chyhsa zy a nyu ei ta, ama leidia nota a siapa ama pôh tyh.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||