Biesozy 1

Biesozy 1

Biesopazy sona zie

1 Izarel beipa Davi sawchapawpa Sawlawmaw bieso reipazy cha:

2 Sona nata pachuna pahno theina awpa zy, pahno thaina bie pachâpadyna yzie thaina zy,

3 siana zy, pachiana zy pathlua hlei hnei leipa ta, yzie thai ngaitapa ta pachiana apyh zie thaina zy;

4 a ngâpazy lâta so theina pahneisa awpa zy, satliapa zy pahnona nata pachâpady thaina pahneisa awpa nata;

5 chyhsa sopazy ta theipa ta ama thaina zy vaw pôhpa ta, hmo pachâ a thaipa chyhsa ta pachiana sopazy a patu thaina awpa zy,

6 bieso nata a chhopasiana zy chyhsa sopa bie nata ama bie nyupa reipa zy pahno thaina zy cha.

7 Abeipa china he novâhna a thaona châ ta. Ahrupa zy chata sona nata pachuna ama mohnao tyh.

Chhoreina nata zikyurâna

8 Ei sawchapawpa y,na paw a cha pachuna cha nahthlie la, na nô bie a cha piepa cha a heisai khâ;

9 na luh châta pawpi pachhih a ngia ngaitapa châ aw ta, na rao châta pachhih hawhta châ tlôh aw ta.

10 Ei saw y, moleipa ta ama cha reipasao khiahtala zyh khâ.

11 Avy teh, thisaih palo awpa ta a byh ei si, a chhâpa y leipa ta athaipa zy cha aru lâta eimâ byh aw.

12 Sheôl hawhta a hrohpa ta palâ tua ei si; ama pôhpa ta khaotlôpa liata a tlapa hawhta;

13 hmo sôh ngaitapazy hnei aw pi ta, hraona sôh ta eima o eima pabie aw;

14 eima hry liata pachao hra aw chi ta; tâkâ sahria ahly vâ pi, tahpa zy ta ama tah no ta:

15 ei saw y, ama hry liana chata ahlao hra khah la, ama lâpi tawhtapa a panano teh;

16 ama pheizy chata hmo moleina lâta a râ ta, thisaih palo awpa ta amâ parah tyh.

17 Kheihta pavaw mohmô liata sao paraipa cha, khâpa hrao leipa ta paraipa a châ;

18 he chyhsazy heta âmo thisaih a byh ei ta, ama hrona aru lâta a byhpa ama châ.

19 Avyuhna liata karâypa maih cha, cha hawhpa cha ama châ, a hneituhpazy hrona a lapa tyh.

Sona ao

20 Othliah liata sona cha a paro ngaitapa ta awh ta; othliah atyhna zy liana chata a ao papua ta;

21 zawpi apakhyna chaipa liata awh ta; khihpi liata khih a ngiana ochhi thaby liana chata a biezy reih ta:

22 “Nâmo angâpa saih u, khachâ e ngâna nama pasô aw? Khachâ e mohnaotuhpazy mohnaona liata nama tha pha aw ta,ahrupazy ta novâhna namâ hao aw tly?

23 Ei cha chhoreina lâna heta a vaw heih teh u,nama hnohta ei chhosiena cha pie aw ei na ta; ei biezy ei cha pahnosa aw ei.

24 Cha aw ei na ta, khoh leipa eichi ta, ei ku pazawh na ta, ahy hmah ta uasa leipa eichi ta,

25 ei ryhraopa zydua cha khâpa hrao leipa ta tlao pachâ eichi ta, ei chhoreina rai a pyh khoh leipa eichi ta,

26 kei chhao nama chhiena noh liana chata pahneih aw na ta; nama china daihti a vaw tlô nona chata ei cha pahneisao aw ei,

27 nama china thlihpi hawhta a vaw tlô nahta nôpona nama chô liata a vaw tlô tita.

28 Cha tina chata na pado aw ei ta,châhrasala a chhy aw va ei na; tiama ngaitapa ta na tlua aw ei ta,châhrasala na hmô aw veih ei.

29 Novâhna cha a hao tlôh ei ta, ABEIPA china cha amâ tlyh leipa vâta,

30 ei ryhraopa miakha hmahta khoh leipa ei ta, ei chhoreina zydua cha apapeisa veih ei,

31 chavâta âmo yzie thei cha nie aw ei ta, âmo pachâpadyna ta lôhrâ tlôpa ta ama y aw.

32 Angâpazy hnôh lâ a syna chata âmo thie aw ta, a hrupazy vânohtona ta âmo a pahleipadia aw;

33 ei bie a pyhpa maih deikua cha a boh ngaitapa ta pahrâ aw ei ta, hmo moleina chi leipa ta ama y molo aw,” tahpa ta. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 2

Biesozy 2

Sona tluana lymâ

1 Ei saw y, ei biezy alypa ta,ei biepiepa zy pachôpa ta,

2 sona lâta na nah pachôhpa ta na pathipalôh pahnona lâ chata na pie khiahtala;

3 chatatlyh, novâhna awpa ta pahno thaina chhao na aw khiahtala,

4 tâkâri hawhta tluapa ta ryubyh nyupa hawhta na tlua khiahtala;

5 ABEIPA china cha pahno aw chi ta, Khazohpa pahnona cha nâ huah ha aw.

6 ABEIPA chata sona pie tlôh ta; a pakah tawhna chata pahnona nata novâhna a vaw pua tyh;

7 a dopa chata sona hmeihseihpa pachô tyh ta; ngâchhihpa ta a charei tyhpa zy châta vyhphao a châ,

8 siana kyh lâpizy vaipa ta a mopathaihpazy lâpi a hrôbieh thei nawpa ta.

9 Cha tina chata siana nata pachiana cha vaw pahno thai aw chi ta, chyhsa phapa lâpi deita cha a chhih teh;

10 na pathipalôh liata sona cha a ngia aw ta, a hrona châta novâhna cha pha ngaitapa a châ aw;

11 a ryhna pahnona ta cha vaih aw ta; pahno thaina ta a cha mohhôh aw;

12 moleipa lâpi tawhta cha pachha awpa nata nôchhiepa ta a reipa chyhsa zy tawhtapa chhao,

13 chazy chata lâpi zohpa liata sie awpa ta, lâpi dopa cha siesai ei ta,

14 hmo moleina taopa cha amâ lyna zie châ ta, hmo moleipa nôchhiena liata zy amâ ly tyh;

15 ama lâthlôh zy cha a kohkaliepa châ ta, ama lâthlôhzy liana chata chhorupa ta ama y tyh.

16 Chanô kô leipa tawhta a cha pachha aw, râh hropa chanô a reikah thaina tawhta chhao.

17 a hawti nota pachuna zy siesai ta a Khazohpa biehrai a mytuhpa tawhtapa cha;

18 a o chata thina lâ a heih ta, a lâpi zy chata athipa lâta;

19 ano lâta a siepa rai cha kua heih khao leipa ei ta, hro na lâpi hmô heih hra vei.

20 Chyhsa phapa lâpi a chhih aw chi ta, a siapa lâpi cha nâ chhih theina hâh ta

21 A dopazy cha alei liana heta pahrâ aw ei ta, pha pakipazy cha cha liana chata y thlâh ha aw ei ta;

22 hmoparaopazy deikua cha leilô tawhta pahleipadiapa châ aw ei ta, piepieh ngaitapa ta a taotuhpa zy cha pahleipadia khaipa ama châ aw. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 3

Biesozy 3

Reingiah awpa ta pasyuna

1 Ei saw y, ei ryhpa bie cha my khah la, na pathipalôh ta ei biepiepazy cha tlao zyh thlâh ha mawh sy;

2 hro pasihna nata kô hluhpi zy a chapie aw hneirôna chhaota.

3 Zawngiahna nata hmeihseihna chata châ heisai khah se; na rao liata khâchâ chazei la, na pathipalôh phiapa liata roh teh.

4 Chatanachata Khazohpa nata chyhsa mohmô liata khokheina nata moh phana na hmô aw.

5 Na pathipalôh tlokhuh ta ABEIPA ngâ la, nâma pahnona liata a pahnieh khâ.

6 Na lâpi zydua liata ano pahno thlâh ha la, na lâpizy cha a cha pahnosa lymâ aw.

7 Nâma pachâpa ta apasosa kha la; ABEIPA cha chi la, moleina siesai teh.

8 Na sapa châta tlâhna châ aw ta, na rupazy châta thohna a châ aw.

9 Na hneina ta ABEIPA za la, nâ thôhna tua chaipa zydua chhaota;

10 chatanachata na sawvâ cha bie pakhô aw ta, na saohna khaoh zy kresawti thiehpa ta a khô aw.

11 Ei saw y, ABEIPA chhoreina cha a papeisa leita y khah la, a cha rana ai hra khâ,

12 ABEIPA chata a kyhpachâpa zy cha ra tyh ta, paw ta saw a lypa zy a ra tyhpa hawhna heta.

13 Sona a hmôtuhpa chyhsa cha a thapha ta, novâhna a hmôtuhpa chhao,

14 tâkâri a vyuhna hlâta sona cha pha via tlôh ta,a vyuhna chhao ngôh suapa hlâta a pha via.

15 Chanô phapa cha lôsôpa hlâta pha via ta, hmo na kho chaipa chhaota a tlu vei.

16 A ku chachâh lâta hro pasihna y ta; a ku chavei lâta hneina nata zana.

17 A lâpi zy cha aly kawna lâpi châ ta, a lâpi zydua cha thlahlôhna a châ.

18 A patupa maih chata hrona tho châ ta; a vaopa maih cha thaphapa ta ama y.

19 ABEIPA ta sona ta leilô paysa ta; pahnona ta avâzy pa-i ta;

20 a thaina ta ti a thuhpa zy parao ta, meihdo zy chata diati patlasa ta.

21 Ei saw y, sona nata a chadona cha khâchâ a vao la; na hmô theina tawhtapa cha pasiesa khâ,

22 na hrona châta hrona châ aw ta, na rao châta a tobina a châ aw.

23 Chatanachata nama lâpi liana heta a bohpa ta sie aw chi ta, na phei cha a hluah aw vei.

24 Nâ zia tita chi leipa aw chi ta; a zia aw chi ta, mokuh pahâhpa ta nâ mô aw.

25 Chichhihna sôkha ta a tlô theipa chi kha la, hmoparaopazy chôta raona a vaw tlô nota chi hra khâ;

26 ABEIPA cha na ngâna châ tlôh aw ta, na phei cha â ao lei nawpa ta a vaih aw.

27 A phuhpa zy châta phana mochhih khâ,na ku ta tao theina a y tlôh khiahta cha.

28 Na vaihzy hnohta, “Sie chy la, avy heih mah y, mylâ ei cha pie aw,” tah khâ, na vao thlâh tlôh khiahta cha.

29 Na vaih chô liata hmo moleipa tao a chhuah khâ, na ngâ leipa a châ tlôh leipa khiahtala.

30 A chhâpa y leipa ta chyhsa a tu kha, kheihta hmahta a cha tah vei khiahtala.

31 Nôchhiepa chyhsa uava kha la, a yzie chhiepa zi a chhuah hra khâ;

32 chhorupa cha ABEIPA pachâ ta pasichhihpa châ tlôh ei ta, a dopa deikua cha a bienyupa avaopa ama châ.

33 ABEIPA chhiesana cha hmoparaopa zy ota y ta, a siapazy pahrâna deikua cha byhnâ a aw pa tyh.

34 Mohnaotuhpa zy cha mohnao tyh ta, a reisipazy deikua cha ngiachhiena a pie tyh.

35 A sopazy chata rôhnahna to aw ei ta, ahrupazy to awpa deikua cha maohphyuhna a châ aw. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 4

Biesozy 4

Sona a phahnaina

1 Ei saw saih u, paw pachuna cha thei ula, novâhna cha pahno thai awpa ta nahthlie teh u;

2 pachuna phapa cha pie tlôh ei na ta: ei ryhpa bie he a heisai khah u.

3 Ei paw sawchapawpa châ na ta, ei nô saw, sawchapaw matlupa daopa châ na ta,

4 na pachu ta, ei hnohta, “Na pathipalôh chata ei biezy he avao thlâh ha sala; ei biepiepazy he zyh la, hroh teh;

5 sona hnei la, novâhna hnei teh; my khah la, ei pakah liata a puapa zy he chhiena lâ pangaisa khâ.

6 A heisai khah la, a cha hrôbieh aw; a kyh pachâ la, a cha vaih aw.

7 Sona thabypa cha he he châ ta: Sona he hnei teh,na hmo hneipa zydua kypa chhaota sona he hnei teh.

8 Palyupalih la, ano ta a cha pasâhsa aw; nâ pyh khiahtala zachhihpa ta a cha tao aw.

9 Ngiachhiena lakhu na luh pakhusa aw ta; a ngiana lakho a cha pie aw,” tah ta.

10 Hy ei saw y, nahthlie la, a pyh teh, chatanachata na hro chhôh kô a pasih aw.

11 Sona kyh liata cha pachu na ta; sona kyh lâpizy liata ei cha chhihtha.

12 Na sie nota cha pakhâpa y aw vei; na râpa chhaota a hluah aw va chi.

13 ‘Pachuna cha khâchâ patu la, pathlih kha y; liahsa a vao teh, na hrona châ tlôh ta.

14 Hmoparaopa lâpi liana chata a ngia khah la, chyhsa moleipa lâpi cha a chhih khâ.

15 Khôkhâ la; a kiapâh liata sie kha, a heisai la, sie lymâ teh.

16 Tah raruana ama tao ha tua leipa ta cha a mô beih leipa ei ta; ahy zy tlyma chhâ raona ama tlôkhei leipa khiahta cha ama mo kuh thei vei.

17 Hmoparaona viahchhâ nie ei ta; nôchhiena kresawti ama doh tyh.

18 A siapa zy lâthlôh deikua cha khaina ta a khaihpa hawhta a châ, khaih via ngâpa ta khaihna pasô ngaitapa hawhta a châ.

19 Hmoparaopazy lâpi cha zoh ta; khâpa amâ chapia tahpa pahno veih ei.

20 Ei saw y, ei biezy nahthlie la; ei bie reipa liata na nah pachôh teh:

21 Na mohmô tawhtapa papua khâ; na pathipalôh liah liata a vao teh.

22 A hmôtuhpazy châta hrona châ ta, ama sapa zydua châta tlâhna châ tlôh ta.

23 Na pathipalôh cha pakhâta ta liahsa vaih teh; hrona vaw puana châ tlôh ta.

24 Pakah cha biechhiepa reina tawhta vaih la, na hmao chhao haipa biereina tawhta vaih teh.

25 Na mo ta hmia lâ moh lymâ sala, na mo vo ta na hmia lâ a patlâh ngaitapa ta moh lymâ mawh sy.

26 Na phei tlyna lâthlôh pachâ lymâ la, na lâpi zydua â ipa châ mawh sy.

27 Chachâh lâ tlyma, chavei tlyma tlei khâ; hmo moleina tawhtapa na phei pasi teh. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 5

Biesozy 5

Sihryna kyh zikyurâna

1 Ei saw y, ei sona nahthlie la, ei pahnona liata na nah pachôh teh;

2 pachâpady thaina hneipa ta, na hmaozy ta pahnona a hnei theina hâh ta.

3 Chanô ko leipa hmao chata kheihti patlasa ta, a pakah cha sathaw hlâta pahniah tlôh ta;

4 a chhâna deikua cha hmo khapa hawhta kha ta, zaozi a koh nata a hâh a tiah rairiehpa hawhta a tiah.

5 A phei cha thina lâta zu ta; a phei chakâpa ta Sheôl lâta a pangai;

6 hrona lâthlôh a vypa hmô leipa ta; a sienazy cha a i leipa tahpa pahno tlôh leipa ta.

7 Chavâta ei saw saih u, ei bie nahthlie ula, ei pakah liata bie he a heisai kha u.

8 Ano tawhtapa a heisai syulyu la, a chhikao lâ a hnia khâ;

9 chata leipatala na zachhihna pahlei aw chi ta, chyhsahropazy ta ama cha mohnao aw;

10 khichhaipa zy hnohta na hneirôna a saipa ta pie aw chi ta, na hriapasana cha hmia pahno leipa o liata a y pathlei aw na;

11 na sapa nata na pôhpa a zao tina cha, na to awpa cha chana a châ aw,

12 “Kheihta zie ta chhoreina cha a haopa ta, ei pathipalôh ta rana cha khâpa sawta reih leipa ta a vaw y tly!

13 Na pachutuhpa zy bie hra vaw zyh leipa na ta, na pachutuhpa zy chô liata ei nah vaw pachôh hra va na.

14 Zawpi zy nata a hmaohpakhypa sahlao hry liana chata moleina to my khai daihmâpa ta ei y tly,” na tah aw.

15 Nâma ti beih tawhtapa ti doh la, nâma tikhaoreipa liata ti a lohpa cha.

16 Na tihnawhzy cha râh tota loh pathlapa ta othliah zy liata chavah ti a loh aw ma?

17 Na châta dei châ sala, na hnohta khichhaipazy ahly leipa ta.

18 Na tihnawh cha byhnâ aw pata y sala, na thyutlia noh lahpinô liana chata thapha teh,

19 sakhi khochhih ngaitapa nata sathawh pha ngaitapa hawhta. Khati no raita a kalachhôh liana chata lôhrâtlôpa ta cha paysa tyh sala, a kyhpachâna liana chata khâ aly teh.

20 Khazia e, nâ ei saw, chanô kô leipa liata aly aw chi ta, khichhaipa kalachhôh nâ ngia aw?

21 Chyhsapa lâpi zy cha ABEIPA mohmô liata y ta, a lâpi zydua a paryhpa tyh.

22 Hmoparaopa cha a hmoparaopa chata a patu aw, a moleina khawhri ta hriepa ta a y aw.

23 Pachuna phahlapa vâta thi aw ta, thata a hruna vâta a lei aw. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 6

Biesozy 6

Thathina nata haiphiana kyh zikyurâna

1 Ei saw y, chyhsa châta sôka ta châpa ta, khichhaipa vyuhpa ta nâ duah khiahtala;

2 na bietaina chata a ao chi ta, na bietaina chata a cha patu;

3 ei saw y, ei cha chhopa he tao la, nâmasasyh ta thlai a pachha teh, na vaih ku liata y haw chi ta; vawh la, a panawh la, na vaih cha a haw teh.

4 Na mo a pakusa leipa la,na mo vo cha pabieh hra khâ;

5 râhkhietuhpa tawhta sakhi a râpa hawhta nata pavaw a byhtuhpa tawhta pavaw a zawpa hawhta a pachha teh.

6 Nâ thathipa y, hlo-ia lâ vawh la, a piepâ zie a laichadai la, so teh.

7 Ano chata abei zy, hyutuhpa zy, ryureituhpa zy hnei leipa ta,

8 nopi noh châta a niepa pachô ta, sâhhria tita a nie awpa zy a pakhy tyh.

9 Hy thathipa y, khachâ e nâ mô aw? Khatita e na môpa cha na thyu aw?

10 Buakha ta môpa ta, buakhata mokupa ta, a mô awpa ta ku a khômakhipa ta y chi ta,

11 na dyhchhiena cha parutuhpa hawhta a vaw lâ aw ta, na phahlana cha chyhsa chariah chhaichhi ta a tobipa hawhta.

12 Chyhsa dyutlai leipa, chyhsa hmoparaopa, pakah nôchhiepa ta a khie ngâpa ta,

13 a mo ta mopasi ta, a phei ta hria ta, a kudy ta a thlih thlâh tyh,

14 a pathipalôh liata nôchhiena y ta, hmo moleina khâ pachâ ta, adyh leina a tu tyh;

15 chavâta sôkha ta a chhiena vaw tlô aw ta; sôkha ta paraopa ta y aw ta, taopathi heih thei khao leipa ta.

16 Hmo miacharu ABEIPA a hao tyhpa y ta, miasari a pasi ngaitapa a y:

17 mo apalaipa zy, paleih haihthaipa zy, a thaipa thisaih palona ku zy,

18 hmopha leipa a pachâpady tyhpa pathipalôh zy, hmo parao awpa ta ngialy thatlôpa zy,

19 pahnotuh pakheipa, haipa a reih tyhpa zy, unawhpa likawh ta adyh leina a taotuhpa zy hih.

Apheina kyh zikyurâna

20 Ei saw y, na paw biepiepa a ngiah la, na nô bie cha a heisai khâ.

21 Na pathipalôh liata hraih thlâh ha la; na rao liata a ao teh.

22 Nâ khiekhâ nota cha chhihtha aw ta; nâ mô tita cha vaih aw ta, na thyu tita bie a châ chho aw.

23 Biepiepa cha meiôh châ ta, pachuna cha khaihna châ tlôh ta, chhoreina rana cha hrona lâpi a châ,

24 chanô moleipa tawhtapa cha vaih awpa ta, khichhaipa paleih reithai pakheina tawhta chhao.

25 Na pathipalôh ta a chhithaina khôkhâh la, a mo padei ta cha patu kha se;

26 sihrypa chanô ty cha viahchhâ lâta alie ta, dyhchâpa chanô cha a hro a pahâh tyh.

27 Chapaw ta a chysia kâ leipa ta mei â pyh thei aw ma?

28 Chapaw cha a phei kâ leipa ta mei-ia a tly thei ma?

29 Cha hawhna chata avaih lahpinô lâta siepa ta; ahyrai ano a kei hriapa cha hrie leipa ta pua aw vei.

30 Chyhsa ta a nodi papaina châta a paru khiahta cha mohnao leipa ei ta.

31 Châhrasala ama hmô khiahta cha alie sari ta a thô aw; a o liata a sôh zydua a pie aw.

32 Chanô liata a pheituhpa chata pahnona hnei vei; ano hrona parao awpa ta hmo a tao.

33 Hmah nata zachhi leina hnei aw ta, a moh chhiena cha padiapa châ aw vei.

34 Hiatliana cha chapaw hiehâhna châ ta, phuh la noh liana chata pahlôh aw vei.

35 Panaopapâna cha khâpa ta hmah a palôh tlâh leipa aw ta, hmopiepa a hluhpi pie hra sala, a palôh châ hlei aw vei. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 7

Biesozy 7

Chanô sihryhpa reipasaona

1 Ei saw y, ei bie a pyh la, ei biepiepazy pachô teh;

2 ei biepiepazy a ngiah la, hroh teh, ei ryhpa bie cha mosawpa hawhta a vao teh;

3 na kudyzy liata a kyh la, na pathipalôh phiapa liata roh teh.

4 Sonô hnohna chata, “Ei sietanô na châ,” tah la; Pahnothai hnohna chata, “Ei kyhpachâpa,” tah la;

5 chanô kô leipa tawhta ama cha vaih thei nawpa ta nata chanô papyupahly thaipa tawhtapa chhao cha.

6 Ei o liata opy tawhna chata sai na ta,

7 angâpa hry liana chata, satliapa hry liata satlia pahnona a hnei leipa hmô na ta,

8 chanô yna lâ a hniapa othliah liana chata sie pathao ta, a o lâ pangai haw ta,

9 zâlâ a zo hra hri ta, zâ zohpa, a zoh kaluhpa zy liana chata.

10 Chanô ta thlai vaw dy ta, chanô piepiepa nata sihryhpa a lyu.

11 Y molo thai leipa ta chokiapa châ ta, a phei chata a o liata ypa khoh vei;

12 othliah liata zy, lâpi a tyhna liata zy y ta, ki to liata a byh tyh.

13 Ano cha thlai patu ta, sy ta, nâ ngaitapa ta a hnohta,

14 “Adyhna hlâna atheihna zy ei hlâ awpa châ ta, atanoh liata ei bietai patlô haw na ta;

15 chavâta nâma a tyh a chhuahpa ta ei vy, pakhâta ta cha tlua na ta, atahmâ he ei cha hmô haw hih.

16 Ei rakhô liata hmophaw angia ngaitapa phaw na ta, Izi râh pala ta kiky pakypa;

17 ei rakhô cha myr zy, alôs zy, lô-iasopa zy ta a roh pahâsa na ta.

18 A vy tua, zâkhihdei ta kyhpachâna khozie ta y tua ei si; kyhpachâna khozie ta palôh a patlâhsa ei si.

19 Ei vahpa hra y tlôh va; lâhlapi lâ khi tlyh ta;

20 tâkâ sykhao a chei ta; thla pôlô daihti ta a vaw tlô aw,” tah ta.

21 A reikah thaina zie ta reipasao thei haw ta; a ngiana zie ta a reithaina ta a chhi haw ta.

22 Thlai zi pâ haw ta,viahchao tôhpa a thiena su lâta a siepa hawhta nata ahrupa paso awpa ta keihrai dai awpa ta a siepa haw ta,

23 pavaw ta a thi nawpa a cha tahpa pahno leipa ta châtai ta a pathi a pyu pahliena taihta khohei lâta a pangaipa hawhta.

24 Chavâta saw saih u, ei bie he nahthlie ula, ei biereipazy he a pyh teh u.

25 Na pathipalôh ta cha chanô lâna cha a heih kha sala, a lâpizy liana chata sie kha;

26 chyhsa hluhpi hmah paphao ta; a thiepazy cha a hluhpi ama châ.

27 Ano o cha Sheôl lâpi châ ta, thina chhôhpadâhpa za pha ta. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 8

Biesozy 8

Sonô phana nata tlyuna zie

1 Sonô châ awpa ta, pahnothaina cha a ao papua vei ma?

2 Lâthlôh kiah su a sâhpa chô liata zy, lâpi a tyhna liata zy a duah tyh ta;

3 khihpi angiana chhikao khô, chhikao thaby liata zy a paro ngaitapa ta awh ta:

4 “Hy nâmo chyhsa saih u, ei cha aw ei hih; ei ao cha chyhsa sawzy châta a châ.

5 Hy nâmo angâpa saih u, a ryhna pahnona he novâhpa ta y teh u; nâmo a hrupa saih u, sona pathipaloh a hneipa chyhsa vaw châ teh u.

6 Nahthlie teh u, hmo pha ngaitapa ei reih aw, ei bie reipazy cha hmo dopa sai a châ aw;

7 ei pakah chata hmeihseihna kyh reih aw ta; hmoparaona cha ei hmao châta pasichhihpa a châ.

8 Ei pakah liata bie zydua cha a siakhaipa a châ; bie a kohpa nata dyutlai leipa rai y vei.

9 A pahno thaipazy chata sia khai ta, sona a hmôtuhpa zy châta â do khai.

10 Ei pachunazy aly teh u, tâkâzy châ leipa ta, sona cha ngôh khochhihpa hlâ chhaota;

11 sona cha rubi lôsôpa hlâta pha via tlôh ta, saduthiepa hmo zydua a khô theipa y veih ei.

12 Kei, Sonô chata ei pahrâna liata aryhna pahnona tao na ta, sona nata pachâpady thaina ei pahno tyh.

13 ABEIPA chipa cha moleipa a haopa he a châ. Palaina zy, pasâhsana zy, hmo moleipa taona zy, pakah nôchhiepa zy he ei hao hmeihseih.

14 Ryhraopa nata pahnona dopa he kei eih châ ta, Pahnothaina châ na ta, thatlô ngaitapa ei châ.

15 Keima baona ta abeizy ryureih ei ta, abeisawzy ta ryureina siapa ta bie ama pathlu tyh,

16 keima baona ta abeisawzy ta ryureih ei ta, molaipazy leilô liata pachiatuhpa zydua chhaota.

17 Ei kyh nâ pachâtuhpa cha a kyh pachâ na ta, phahnai khohpa ta nâ tluatuhpa chata eina hmô aw.

18 Hneina nata zachhihna zy ei hnohta y ta, hneina nata siana tlyu ngaitapa cha.

19 Ei patheipa cha ngôh hlâta pha via ta, ngôh suapa hlâ chhaota, ei pangiapa cha tâkâ ri a suapa hlâta.

20 Siana lâpi a chhih na ta, pachiana lâpi liana tlaita,

21 ei kyh na pachâtuhpa zy cha hneina ryu patosa na ta, ama ryubyh zy ei pabie hra.

22 ABEIPA ta a hmotaopa thaby chaipa ta na tao ta, hlâno ta hmotao thaby chaipa ta.

23 Tlyzaw tawhta a thao tuana liata taopa ei châ, leilô y hlâ rai ta.

24 Ti a thuhpa y hlâpi ta, y haw na ta, tihnawh ti hluhpi y hlâpi ta.

25 Tlâhpi zy yzie a hnei hlâta nata, tlâhzy y hlâta ei y haw;

26 leilô tao hlâta nata sibiepa su zy tao hlâta, khizaw liata dohlei chhao a y hlâpi ta.

27 Avâzy a pa-i nota y haw na ta, tilaipi a thuhpa chô liata chahlôna a tao nota,

28 chô lâ avâ a pa-i nota, a thuhpa tihnawhzy tha patlôpa ta a y nota,

29 tizy chata a biepiepa ama parao lei nawpa ta, tilaipi râhri zy taopa ta leilô bôna a tao nona khata,

30 cha nona chata a kiapâh liata raihria thaipa ta y na ta; a hmiakô liata khâ alypa ta, noh tato alyna châ na ta,

31 pahrâ theina a leilô liata thaphapa ta ypa ta, ei lyna cha chyhsa sawzy chô liata a châ.

32 Chavâta ei saw saih u, ei bie nahthlie teh u; ei lâpi a chhihtuhpa zy cha byhnâ atopa châ tlôh ei ta.

33 Pachuna cha nahthlie ula, so ula, khoh leipa ta y khah u.

34 Ei chhikao thaby liata hâpa ta, ei dôhpachhôh chhikao liata noh tato hâpa ta, ei bie a nahthlietuhpa cha a nohhlao na.

35 Na hmôpa maih chata hrona a hmôpa châ tlôh ta, ABEIPA khokheina to aw ta;

36 na hmô leipa maih deikua chata anosasyh ta pasana a tao, nâ haopa zydua cha thina kyh apachâpa ama châ,” tah ta. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 9

Biesozy 9

Sona nata hruna kyh ta chyhsa a syna

1 Sonô chata a o sa ta, a tôh miasari bô ta.

2 A sahro thie ta, a kresawti zy pahlao ta, a tlâhkhai liata chhao nie awpa soh ta.

3 A laihsazy tuah ta, khihpi liata su a sâhpa liata zy aw ta,

4 “Angâpa maih cha he lâna heta a vy mawh sy!” tahpa ta. Pahnona a hnei leipa zy hnohta,

5 “A vy ula, ei viahchhâ nie ula, ei kresawti pahlaopa cha doh teh u.

6 Hruna kyh cha puasai ula, hroh teh u, chatanachata pahnona kyh liata laiseih teh u,” tah ta.

7 Eilaw thaipa a chhoreituhpa chata tahpalôhna a tyh tyh ta, hmoparaopa a chhoreituhpa chata kupasa taona a tao tyh.

8 Eilaw thaipa chyhsa cha chhorei khâ, a châhao pathlei aw na; chyhsa sopa chhorei la, kyh a cha pachâ aw.

9 Chyhsa sopa chho la, a so pachai aw; chyhsa sopa pachu la, thaina liata avaw pôh aw.

10 ABEIPA chipa he sona thabypa châ ta, Mopathaihpa pahnona he pahno thaina a châ.

11 Keima tawhta na nohzy cha papôhpa châ aw ta, na hro chhôh kôzy cha baipa a châ aw.

12 Na vaw so khiahtala na châta a sopa na vaw châ aw;eilawtuhpa na châ khiahtala nâma deita pasa na tao aw.

13 Chanô hrupa cha y molo thei leipa ta;khâpa hmah pahno vei.

14 A chhikao liata a tyuh tyh ta, khihpi liata su a sâhpa zy liata dyuchhai liana chata,

15 lâpi liata a vypa maih nata ano a khoh awpa zy awpa ta,

16 “Angâpa maih cha he lâ a vy teh u!” tahpa ta. Chatawhcha pahnona a hnei leipa zy hnohna chata,

17 “Parupa ti cha thlôh ta, aru lâta viahchhâ niepa cha a pahâh,” tah ta.

18 Chârasala cha liana chata athipa ama y tahpa nata, a chyhsa hruapa zy cha Sheôl a thuh chaipa liata a ypa ama châpa pahno vei. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31

Biesozy 10

Biesozy 10

A dopa nata moleipazy pakhona

1 Sawlawmaw biesozy Sawchapaw sopa ta paw alyna taota,sawchapawpa hrupa deikua cha nô pachârôhna a châ.

2 Hmoparaopa hneirôhna cha a thôhna hnei leipa ta,siana deikua chata thina tawhta a pachha.

3 ABEIPA chata chyhsa siapa cha a no padisa leipa ta, hmoparaopa zy saduthiepa deikua cha a thy pathlahpa tyh.

4 Ku thathipa chata sipasana tlôkhei tyh ta, chyhsa tiamapa ku deikua chata hneirôna a tlôkhei tyh.

5 Nopi noh ta a pachô pakhypa cha sawchapaw sopa châ ta, sâhhria daihti nota a môpa sawchapawpa deikua cha maohphyuhna a tlôkhei tyhtuhpa a châ.

6 A siapa luh liana chata byhnâ zy y ta, hmoparaopa pakah deikua cha nôchhiena ta a pahly.

7 A siapa myleina cha byhnâ awna châ ta, hmoparaopa moh deikua cha a thuzao aw.

8 Chyhsa sopa chata pathipalôh ta biepiepa zy a pyh tyh ta, ahrupa reikah hluhpa deikua cha a pao aw.

9 A dopa ta a siepa cha thlahlôh chhihpa ta sie tyh ta, a yzie a paraotuhpa deikua cha pahnopa ta a y aw.

10 Moh pathlituhpa chata pachârôhna tlôkhei ta, a lâhâh ta chhoreina cha thlahlôhna a tlôkhei.

11 Chyhsa siapa pakah cha hrona tihnawh châ ta, hmoparaopa pakah deikua cha nôchhiena ta a pahly.

12 Ahaona ta ahryuna papua ta, kyhpachâna deikua chata paraona zydua a khu tyh.

13 Pahnothaipa hmaozy liana chata sona hmôpa châ ta, anodeikuacha pahno thaina a hnei leipa kyh chata sôsi a y.

14 Chyhsa sopazy chata pahnona pachô ei ta, ahrupa pakah deikua cha leidiana a hnia thlâh hana a châ.

15 Chyhsa hneirôhpa sôh cha a khihpi thokhy châ ta; sipasapa leidiana cha ama dyhchhiena a châ.

16 A siapa hria pasana chata hrona tlôkhei ta, hmoparaopa athôhna chata moleina.

17 Chhoreina apyhpa cha hrona lâpi liata y ta, rana a heisaituhpa deikua chata hmo a parao tyh.

18 Ahaona a phihtuhpa cha hmao a haihthaipa châ ta, kyh reina bie a papuapa cha ahrupa a châ.

19 Bie a hluhpi reipa liata paraona y tyh ta, a hmao a sohsi theipa deikua chata so ngaitapa ta a tao tyh.

20 A siapa paleih cha tâkâ suapa hawhta châ ta;hmoparaopa pathipalôh deikua cha khâpa phuhpa hmah châ vei.

21 A siapa hmao chata chyhsa hluhpi pasa ta, ahrupa deikua chata pahno thaina a phahlapa ta a thi.

22 ABEIPA byhnâ chata pahneirôhsa tyh ta, pachârôhna baichha tyh vei.

23 Ahrupa châna chata moleina taopa he alyna châ ta, cha hawhna hra chata pahno thaipa chyhsa châta sona a châ.

24 Hmoparaopa cha a chipa hawh tlaita a chô liata a vaw tlô aw, a siapa saduthiepa cha piepa a châ aw.

25 Khisô a vaw pathli nahta hmoparaopa cha leidia aw ta, a siapa deikua cha chhâzaw lôbô a châ.

26 Hâh chata kresawti thaopa nata mo châta meikhuh hawhta, thathipa cha a tuahtuhpa châta a châ aw.

27 ABEIPA china chata hro chhôh noh pasihsa ta, châhrasala hmoparaopa kôzy cha pachhosapa ta a châ aw.

28 A siapa hnabeiseipa cha thaphana châ aw ta, hmoparaopa hnabeiseipa deikua cha a leidia aw.

29 A sopa chata ABEIPA lâpi cha kuh châ aw ta, hmoparaona a taotuhpa châna deikua chata leidiana a châ aw.

30 A siapazy cha pasipa ta y leipa aw ei ta, hmoparaopa deikua cha leilô liata pahrâ aw veih ei.

31 A siapa pakah chata sona papua ta, nôchhiepa paleih deikua cha taipa ta a châ aw.

32 A siapa hmaozy chata a pyh tlâhpa cha pahno ta,hmoparaopa pakah deikua cha nôchhie ngaitapa ta a reih tyh. 

Biesozy (Proverbs)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31