1 Rapa ta kha a ypa chhaota a kuh a chhapa cha, sôkha ta thliepa ta y aw ta, patlana y aw vei.
2 A siapazy ama sâh nona heta chyhsa zy aly tyh ei ta; hmoparaopa chyhsa ta ryureina ama to nota deikua cha chyhsa zy amâ rôh tyh.
3 Ahyrai ta sona a pasôtuhpa chata a paw alyna tlôkhei ta, sihryhpa chanô a kaotuhpa chata a sôh a papai tyh.
4 Abei ta ryureipa ta râh pa-i ta, hmopiepa a latuhpa deikua chata a pachô tyh.
5 A vaih apapyupahlytuhpa chata a phei châta sao a parai.
6 Moleipazy paraona liana chata khohei y ta, a siapa deikua chata hla sa ta a tha a pha.
7 A siapa chata sipasapa bie pahno khoh ta; hmoparaopa deikua chata pahno awpa ta pachâ thaina hnei vei.
8 Mohnaotuhpa chata khihpi pakâ ta, a sopa deikua chata hiehâhna a papai tyh.
9 Chyhsa sopa ta ahrupa a ei khiahtala, a hiehâh tlyma a pahneih tlyma rai châ sala adyhna y aw vei.
10 Thi a palosa khohpazy chata chyhsa pha pakipa a hao ei ta, a dopazy ta hrona cha ama tlua tyh.
11 Ahrupa chata a hiehâhna bie zydua reih papua ta, a sopa deikua chata nyu ei ta, amâ chalihkhei tyh.
12 Ryureituhpa ta haipa bie a nahthlie khiahtala, a chakaopa zydua ama molei tyh.
13 Sipasapa nata pasaipa-ituhpa hmaohkha ta y ei ta; ABEIPA ta ama mo pavâhsa rairieh ta.
14 Sipasapazy ngâchhihpa ta a pachiatuhpa abei cha, a beidyuchhai cha chhâzaw ta pa-ipa a châ aw.
15 Sôsi nata rana ta pasosa ta, hawti diathlâpa chata a nô nozana a tlôkhei tyh.
16 Hmoparao khohpa ama pôh nota, paraona chhao pôh tyh ta; a siapa deikua chata ama paona cha ama hmô aw.
17 Na sawchapawpa cha chhorei la, pahâna cha pie aw ta; na palôhrupa alyna a cha tlôkheipa aw.
18 Biehneipa a y leipa khiahtala vâtlâhzy a pathliethlaw tyh ei ta, ryhpa a zyhtuhpa deikua cha âly tyh.
19 Chakaotuhpa cha bie deita chhorei awpa châ vei, pahno hra sala khâpa ta hmah angiah aw vei.
20 Bie thlai a reihpa na hmô tyh ma? Cha chyhsa hlâta cha ahrupa liata hnabeiseih a chhihpa a hluh via a y.
21 A hawti ta tawhta a sei a daopa cha, a chhâna lâta a sawchapawpa lâta â lie thlâh ha aw.
22 Chyhsa pathi-iapa ta atuna pathyu ta, chyhsa hiehâhpa ta paraona a hluh a hnei tyh.
23 Chyhsa a palaina ta panaw aw ta, chyhsa palôrupa a reisipa chata palyupalihna a to aw.
24 Parutuhpa a kaotuhpa chata ano hrona â hao; chhiesana pyu thei ta, khâpa hmah reih tlôh leipa ta.
25 Chyhsapa china ta khoheih tao ta, ahyrai ABEIPA liata ngâna a pahniehpa cha a boh aw.
26 Chyhsa hluhpi ta ryureituhpa khokheina to awpa tlua ei ta, châhrasala chyhsapa chô liata ryureina cha ABEIPA tawhta a vaw puapa a châ.
27 Chyhsa sia leipa cha a siapa pachâ ta pasichhihpa châ ta, a dopa ta a ypa chyhsa cha hmoparaopa chata pasichhihpa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||