1 Mylâ ta hmo a vaw y awpa a palaikhei khâ, cha no chata khâpa a vaw chhikhei aw pahno tlôh chi va.
2 Na pakah ta a reithai leipa ta mohropa ta tlao cha reithai ei sala; na hmao châ leipa ta khichhaipa hmao ta.
3 Alô he a hri ta, leisadi chhao he a hri ta, châhrasala ahrupa ta chyhsa ama patypamâna cha, cha miano hlâta â hri via.
4 Hiehâhna cha nôchhie ta, pathi-iana cha a tlao ta; châhrasala hnâchhaona cha ahy e a tao thei tly?
5 Kyhpachâna a nyupa hlâta cha a lâhâh ta rana a pha via.
6 Kei (viasa) hmah maniah paphaona cha ngâ a chhih ta; khakhaipa maniah a sypa deikua cha a pakheipa a châ.
7 Chyhsa rihbiepa châta cha kheihthlawh chhao pasi a chhih ta; chyhsa nodipa châta deikua cha hmokhapa zydua chhao a pahâh khoh.
8 Chyhsa a o a viavisaipa cha, pavaw a bu a zaw saipa hawhta a châ.
9 Sathaw rohpahâhpa ta pathipalôh a palysa tyhpa hawhta, Kei (viasa) ngâchhihpa ta pathipalôh thlah a palôh tyh.
10 Na kei(viasa) tlyma nata na paw kei tlyma cha pathlua khâ; na vâchhie nota na unawhpa lâta sie khâ. Lâhlapa liata unawh hlâta lâhniapa liata keizy cha ama pha via.
11 Ei sawchapawpa y, so la, ei pathipalôh palysa teh, na reipachhietuhpa zy ei chhy theina hâh ta.
12 A sopa chata hmo moleipa hmô ta, a nyu tyh ta; angâpa deikua chata chatôh tyh ta, pasa a taopa tyh.
13 Khichhaipa chata sôhkâ ta a pietuhpa chysia cha la la, hmia pahno leipa chata sôhkâ ta a pietuhpa cha bietaina ta hmâh teh.
14 Mydi kari ta thyu ta a paro ngaitapa ta a vaih byhnâ a aw patuhpa cha, ano chata chhiesapa ta pachâpa a châ aw.
15 Vâneihpa nata chanô a paphôh thaipa cha miakha ama châ;
16 cha chanô a pakhâtuhpa chata thlih chhao a pakhâ, a ku chachâh lâna chata sathaw a hria.
17 Thua ta thua patiahsa ta, cha hawhna hra chata chyhsa ta a viasa a taopathi thei hra.
18 Ahyrai theiku kô a hneipa chata a thei nie aw ta, ahyrai a zibeipa a chakaopa cha palyupalihpa ta a châ aw.
19 Ti liata hmia tyhpa a lâpa hawhta, chyhsa pathipalôh cha chyhsapa liata â lâ.
20 Sheôl nata Abadon ta a dai tahpa a hnei leipa hawhta chyhsapa mo ta â daih tahpa rai hnei vei.
21 Pathaisana beih cha tâkâri châta châ ta, patina mei cha ngô châta châ ta, chyhsapa cha a hmo reithaipa liata pasiapa a châ.
22 Ahrupa cha sâh nata sôkhaoh liata sôkhaih ta daih hra ula, ahruna chata pathlie aw vei.
23 Na mietahkupa zaw yzie cha pahno a chhuahpa ta tiama papua la, na sahroh zawzy cha a phapa ta vaih teh;
24 hneirônazy cha chhâzaw châta châ leipa ta, abei lakho cha a chhâ zydua chhôhta a y lymâ aw ma?
25 Sibiepa cha a ei ta, sibie panyupa a vaw lâ ta, tlâh liata âhnalasi pakhy ei ta,
26 mietahkupazy cha na chysia châta châ ta, miezy cha lyu ty a châ;
27 na niepa chata mie sâhpiti a daihpa ta hnei aw chi ta, na chhôhkhapa niepa châta nata na laihsa zy pasa nawpa ta chhao cha.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||