Pakhonazy nata yzie pachunazy
1 Sawlawmaw biesozy he Zudah bei Hezekia chyhsazy ta ama ro pachhuahpa a châ.
2 Hmo nyupa he Khazohpa rôhnahna châ ta, abei rôhnahna deikua cha hmo tlua papuapa a châ.
3 Avâ cha a sâhna châ ta, alei cha a thuhna châ ta, cha hawhna chata abeizy pathipalôh chhao cha a laichadai theipa châ vei.
4 Tâkâri tawhta a syu-ie thy la, a pathaituhpa chata hmobaoh a vaw pua aw;
5 abei hmiakô liata hmoparaopa cha pasie ula, abeidyuchhai cha siana ta pa-ipa a châ aw.
6 Abei hmiakô liata nâsasyh ta achhaohdaolao khah la, chyhsa rôhnahpa zy su liata a duah khâ;
7 na hmô haw tyhpa abeisaw hmiakô liata panawhpa na châpa hlâta cha, ‘He lâ a khy teh,” cha tahpa cha pha via tlôh ta.
8 A tu awpa ta sie parah khâ, a chhâna lâta na vaihzy ta maoh ama cha paphyuh tita, a taonazie pahno leipa ta na y pathlei aw na,
9 Na biepeipa cha na vaih nata rei khoh ula, hmo hropa bieru cha phuah khâ;
10 a theituhpa chata cha ra aw ta, na moh chhiena lei leipa ta a y pathlei aw na.
11 A daihti ta bie reipa he, tâkâri byh liata ngôh apple hawhta a châ.
12 Reingiahpa nahkhao liana chata chhosietuhpa sopa cha ngôh rahy nata ngôh suapa pachhih hawhta a châ.
13 Tuapa chyhsa a tuahtuhpa châta ngâchhihpa cha, Sâh hriana daihti liata dâhaw chakuapa hawhta a châ.
14 A pie leipa pita a reih ta a palaipa cha vâsua ti a hnei leipa meihdo nata thlih hawhta a châ.
15 Mao-oh theina ta ryureituhpa cha reipasao theipa ta y ta, bie naipa chata biehneina a padia tyh.
16 Kheihti na hmô khiahta cha a daihpa rakha ta nie teh, na nie hluh tu khiahtala na pasa aw.
17 Na vaih o cha tly tu khâ; cha ai aw ta a châ hao pathlei aw.
18 Ano vaih chô liata a pahnotuhpa pakheipa chyhsa cha byuthôh zy, zaozi zy, châtai tiah ngaitapa zy a châ.
19 Nôpo nota chyhsa ngâchhih leipa a ngâpa cha hâh thliepa nata phei ru a thliepa hawhta a châ.
20 Chyhsa pachârôhpa liata hla a satuhpa cha, chasi nota a chysia a pahluhpa nata lô-iah liata sahhmah thaopa hrypa hawhta a châ.
21 Na khakhaipa a no a di khiahta la viahchhâ nie awpa pie teh; a dâh a phi khiahtala ti do awpa pie teh;
22 a luh chô liata mei-ia a pahmaohpa châ aw chi ta, ABEIPA ta a cha thô aw.
23 Maw thlih ta vâsua vaw tlôkhei ta; cha hawhna hra chata chyhsa kyh rei a hmâhpa paleih ta pathi-iana hmia.
24 Chanô paphôh thaipa nata o kawh ngaitapa liata pahrâpa hlâta cha, o chô laki liata ypa a pha via.
25 Râh hlapi tawhtapa thâtih phapa cha, chyhsa dâhphi ngaitapa chata ti chakuapa hawhta a châ.
26 Chyhsa siapa hmoparaopa hmiakô liata a paotuhpa cha, tikhaoh pathaih leipa nata tihnawh paraopa hawhta a châ.
27 Kheihti a hluh niepa he pha leipa ta, cha hawhna chata rôhnahna tlua tupa pha vei.
28 Ano palôhrupa a vaih thei leipa chyhsa cha, khihpi chopa kuh a hnei leipa hawhta a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||