1 Chyhsa moleipazy uava leipa la, ama hry liata a hlao awpa khoh hra khâ;
2 ama pathipalôh ta leidiana a chu ta, ama hmao ta bie pha leipa ama reih tyh.
3 Sona ta o cha sapa châ ta, pahno theina ta pa-ipa a châ;
4 pahnona vâta chhôhpadâhpa cha hmo sôh ngaitapa nata khochhih ngaitapa ta pabiepa ta a y.
5 Chyhsa sopa cha a tha tlô ta, pahnona a hneipa chata a thatlôna a papôhsa tyh;
6 adyuh zie thai ngaitapa ta nâ dyuh awpa châ ta, tiahna cha a chhuahna theilâpa a châ.
7 Ahrupa chata sona cha a sâh tu ha ta; kuh chhikao liata a pakah â aw vei.
8 Moleina tao awpa ta a ryhrao tyhpa cha chyhsazy ta,“Hmoparao a hmâhpa,” ama tah aw.
9 Ahrupa pachâna cha moleina châ ta, chyhsa mohnao a hmâhpa cha chyhsa châta pasichhihpa ama châ.
10 Nôpona noh liata na panao khiahtala, na thatlôna a chyh.
11 Thi awpa ta chhihthapa zy cha pachha la; thie thlâh ha awpa zy cha pachha thlyu teh.
12 “Nahthlie teh, he he la pahno ma pi,” na tah khiahta cha, pathipalôh khopathliatuhpa chata pachâ aw vei tly ma? Na hrona a vaotuhpa chata pahno aw vei tly ma? Chyhsa to ama hmotaopa hawh lymâ ta viarithô aw vei tly ma?
13 Ei sawchapawpa y, kheihti nie teh, pha tlôh ta, kheihthlaw na pachâpa liata a pahâh kawpa cha.
14 Na hrona châta sona a châ tahpa pahno aw chi ta; na hmô khiahta cha lymâ y aw ta, na hnabeiseihna cha pahlei aw va chi.
15 Hy chyhsa hmoparaopa,a siapazy yna kha a byh khâ; a o cha paraopa khâ;
16 chyhsa siapa cha ei sari pao hra sala thlai a thyu heih tyh; hmoparaopa deikua cha vâchhiena ta a pahleipadia tyh.
17 Na khakhaipa a pao nota aly khah la, panawhpa ta a y nota na pathipalôh aly khah se;
18 chata leipata la, ABEIPA ta hmô aw ta, aly leipa aw ta, ano tawhtapa a pathi-iapa a palie pathlei aw na.
19 Hmo moleina a taotuhpazy vâta na pachâ a parôh khoh khâ, hmoparaopa uava khâ;
20 chyhsa moleipa châ chata lyna y tlôh leipa aw ta; hmoparaopa meiôh cha pachhaipa châ tlôh aw ta.
21 Ei sawchapaw y, ABEIPA nata abei cha chi la, lôchhailôkhy a hneipa chyhsazy cha a pahlao khâ;
22 ama raona sokha ta vaw tlô aw ta, ama leidiana kôzy ahy e a pahno?
23 Hezy chhao he chyhsa sopa bie reipa a châ. Ryureina liata chyhsa za viapa hneipa he pha vei.
24 Hmoparaopa lâta, “Na sia na,” a tahtuhpa cha, chyhsa tota chhie sapa aw ei ta, phopizy ta ama pasi aw;
25 a ratuhpa zy deikua cha thaphapa ta y aw ei ta, ama chô liata byhnâ pha ngaitapa a vaw tlô aw.
26 A dopa ta achhytuhpa hmao cha viasa sypa tluta a châ.
27 Khôtho lâ hmo a chhuahdy la, lyu lâta amâ chiehpa ta y la; cha khai nata na o sa teh.
28 A chhâpa y leipa ta na vaihzy kyh liata pahnotuhpa châ kha la, na hmaozy ta dô hra khâ.
29 “Ei chô liata a taopa hawhta ano chô lâta tao aw na ta; a hrianazie lymâ hawhta ei pie aw,” tah khâ.
30 Thathipa lyu lâ sie na ta, pahnona a hnei leipa chyhsa kresahdô lâ chhao;
31 chatawhcha moh nahta ahloh ta phi kalu thlâh ha ta; a chô zydua cha thlahbei ta phi kalu thlâh ha ta; a dona alô sahdôzy cha cho khai ha ta.
32 Chatanachata moh thlâh ha na ta, pakhâta ta pachâ na ta; a pachuna cha hmô na ta, a pyh haw na ta.
33 Buakhata môpa ta, buakhata mokupa ta a mô awpa ta, ku a khômakhipa ta y chy chi ta,
34 chavâta na dyhchhiena chata parutuhpa hawhta a vy aw ta, na phahlana cha chyhsa chariah chhaichhi ta a tobipa hawhta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||