1 Ryureituhpa zy nata pati niepa ta namâ tyukhoh no ta, na hmiakô liata chyhsa liahsa pachâ teh;
2 pati pahâpahao kawpa chyhsa na châ khiahtala na rao liata chaizôh soh teh.
3 Dona pati tlai a châ tahpa pahno thlâh hapa ta, pahâna deita cha khoh khâ.
4 Hneirôh awpa ta na rie pathei leipa la; nâma sona ngâna bâh teh.
5 Na moh pasia khai hlâta pai ha aw ta; a mathlaw a thaopa hawhta, pahmô nata avâ liata pavaw hawh tlai ta.
6 Chyhsa mochhihpa viahchhâ cha nie leipa la; hmo pahâna niepa zy uava hra khâ;
7 a pathipalôh pachâna lymâ hawhta ma a y ta, “Nie teh, doh teh,” cha tah aw ta; chârasala a pathipalôh chata pachâna cha hnei vei.
8 A chyhta na niepa cha na pali aw, na bie pachâpa cha na pahlei aw.
9 Ahrupa theina liana chata bie reih khâ, na sona biezy cha mohnao tlôh aw ta.
10 Hlâno ta râhri pakhâhpa cha pasie leipa la, paw hnei leipa lyuzy liata a ngia khâ;
11 âmo chatlaituhpa cha a tha tlô ta; na chô liata ama bie rei khei tlôh aw ta.
12 Pachuna lâta na pathipalôh pahnieh la, na nah cha pahnona bie lâta.
13 Sawnawhpa chhoreina chalih sai khâ; sômasih ta tu hra la, thi tlôh leipa aw ta.
14 Sômasi ta chhei aw chi ta, chatanachata Sheôl tawhta a hrona na pachha aw.
15 Ei saw y, na pathipalôh a so khiahta cha, kei tlaita ei pathipalôh aly hmeihseih aw.
16 Bie dopa na reih khiahta cha, ei palôh â ly aw.
17 Na pathipalôh ta chyhsa moleipa uava kha se, nâ deikua cha noh y ta ABEIPA chipa ta tlao y teh.
18 Lymâ cha y thlyu tlôh aw ta, hnabeiseina cha pahleipa ta y aw vei.
19 Ei saw y, thei la, so mah y, lâpi dopa liata na palôh soh teh.
20 Kresawti a parâpazy hry liata nata sa a khohpazy hry liata a pahlao khâ;
21 sahhmah a paripazy nata rihkawhpazy cha ama sipasa tlôh aw ta; thazeina ta poh chhiepa a pabusa aw.
22 Na paw cha satuhpa bie cha a pyh la, na nô cha a nôpi nata mohnao khâ.
23 Bie hmeihseihpa cha chalei la, zuah khao khâ; sona zy, pachuna zy pahno thaina zy chhao.
24 A siapa paw cha thata a thapha aw ta; saw sopa a satuhpa chata a chô liata alyna a hnei aw.
25 Na paw nata na nô cha thaphapa ta y ei sala, cha satuhpa ei cha thapha ngaitapa ta y mawh sy.
26 Ei saw y, na pathipalôh na pie la, ei yzie zy heta namo ady mawh sy.
27 Sihryhpa chanô cha tihry athupa châ ta; chanô kô leipa cha khaotlô buahpa a châ.
28 Parupa hawhta chyhsa a byh ei ta, chyhsa hry liata piehpiena ama papôhsa tyh.
29 Ahyzy e hupo tyh ta? Ahyzy e pachârôh tyh? Ahyzy e ahryuh tyh? Ahyzy e patypamâna hnei tyh ta? Ahyzy e a chhâpa y leipa ta pasa tao tyh ta? Ahyzy e ama mo a saih hôlô tyh tly?
30 Kresawti dona liata a y thlâh ha tyhpa zy, kresawti pahlaopa a tlua tyhpa zy ama châ.
31 Kresawti a sai nota moh khâ, nyu liata a yzie a lâ nota zy, a loh pathla ngâ no ta zy.
32 a chhâna liata cha parih hawhta pachu ta, vâzi pachupa hawhta â parah tyh.
33 Na mo ta hmonoâh ngaitapazy hmô aw ta, na pathipalôh ta bie pha leipa zy reih aw ta.
34 Chyhsa tilaipi liah liata a ziapa hawhta tly ma, balyh poh zawna pawhmao liata a ziapa hawhta tlyma na châ aw,
35 “Na tu ei ta, pasa tlôh va, na chhei ei ta, pahno va na; khâpa nota e ei vaw hra aw tly? Ei tlua heih thlyu aw,” na tah aw.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||