1 Hneirôna hlâta moh phana he kho chhih viapa a châ, tâkâ nata ngôh hlâta khokheina khoh viapa a châ.
2 Hneirôhpa nata sipasapa y khoh ei ta; âmo zydua a taotuhpa cha ABEIPA a châ.
3 Chyhsa sopa chata hmo moleina cha a hmô nahta a nyusai tyh ta; angâpa deikua chata hria tyh ta riethei a tao tyh.
4 A reisina nata ABEIPA china lymâ cha hneirôna zy, zana zy, hrona zy a châ.
5 Chyhsa dyutlai leipa lâpi liana chata ahloh zy, khoheihzy y ta; a hrona a phapa ta a vaopa chata a hla sai syulyu aw.
6 Hawtipa cha a siena awpa lâpi liana chata pachu ula, a machâ tita chhao siesai aw vei.
7 A hneirôhpa ta sipasapa ryu reipa ei ta, dyu a cheituhpa cha a pacheisatuhpa sei a châ.
8 Sia leina a tutuhpa chata pachârôhna hria aw ta, a hriana chhâna cha chôhchahrei a châ.
9 Chyhsa riahphapa cha byhnâ hmôpa ta a y aw, a viahchhâ sipasapa a pie tyhpa vâta.
10 Mohnao a hmâhpa cha to ula, a eina cha a pai aw, atuna zy, tahraruana zy â chalih aw.
11 ABEIPA cha ngâchhihna khoh ta, abei deikua cha reikah thaipa ta na viasa thei aw.
12 ABEIPA mo chata pahnona hneipa chyhsa cha a phapa ta hrôbieh tyh ta, piehpiepa bie deikua cha a thy pathlapa tyh.
13 Thathipa chata, “Khôtho lâ chakeibarôhneipa y ta, othliah liata thiepa ta ei y aw,” a tah.
14 Chanô kô leipa pakah cha khaotlôh a thupa a châ; ABEIPA a haopazy cha cha liana chata ama tla aw.
15 Hawti pathipalôh liata hruna khâchâ a bai ta, tuna kyh dopa ta ano cha a taopathi thei.
16 A hneirôna awpa ta sipasapa rie a patheipa nata a hneirôhpa ota a pietuhpa chata a phahlana a tlôkhei aw.
Ryhpa nata zikyurâna
17 Na nah pachôh la, a sopa bie nahthlie teh, na pathipalôh cha ei sona hmô nawpa ta hmâh teh;
18 na chhôh liata a vaopa ta na hmao liata na pa-i hra khiahta cha, hmo kho a chhih kawpa a châ.
19 ABEIPA liata ngâna ei cha pahneisa aw, na phana awpa he hmozy he atanoh ei cha chho aw.
20 Na châta biesozy sythôh ei cha ropa hih, pahnona kipa nata chhoreina sopazy chuh,
21 pahnona dopa cha cha siesai leipa aw ta, cha tuahtuhpa hnohta biedopa na tlôkhei thei aw.
22 Sipasapa cha paru khâ, a si pasa tlôh ta, chhikao liata pachârôhpazy rie patheisa hra khâ;
23 ABEIPA ta ama bie reikhei tlôh aw ta, âmo a paraotuhpa zy hrona cha a parao aw.
24 Pathi-ia a hmâhpa chyhsa cha a viasa khâ, chyhsa pathi chhiepa a pakyh khâ,
25 a taozie a hâ a la aw chi ta, na hrona chata khohei a châ pathlei aw na.
26 Bietai a hmâpa hry liata rai a hlao kha, leibâh châta sôhkâtuhpa zy hry liata chhao.
27 Khâpa hmah pie awpa na hnei tlôh vei khiahta cha, khazia e na rakhô cha a cha lapa aw vei?
28 Na paw pathlazy ta hlâno ta râhri ama vaw pakhâh chiehpa cha pasie khâ.
29 Chyhsa a o raihria liata a tiamapa cha na hmô beih ma? Abei hmiakô liata zy a duah aw ta; chyhsa zawrâpa hmiakô liana chata a duah aw vei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||