1 Abei pathipalôh cha ABEIPA ku ta y ta; ti lona hawhta a kho khona liata a pakohsa tyh.
2 Chyhsa to yzie he âmosasyh mo liata cha a do tahpa châ ta, châhrasala ABEIPA ta pathipalôh kho a pathliah tyh.
3 Atheihna hlâta a dona nata sia ngaitapa ta ryureina he ABEIPA chata tlao âly via.
4 A pasâhsapa nata pathipalôh apalaipa, hmoparaopa mei-ôh he moleina a châ.
5 Tiamapa pachâna chata hneirôna lâta pangai ta, thathipa deikua chata phahlana lâ deita a pangai.
6 Palei haipa a hmâhpa sôh hmôna cha, meihdo thlih ta hmô ta a phaoh ngâpa nata thina khohei a châ.
7 Hmoparaopazy nôchhiena chata âmo a pahleipadia, pachiana siapa ama khoh leipa vâta.
8 Thai leina a phaohtuhpa lâpi cha a koh ngaita ta, chyhsa pathaihpa deikua cha a hmotaopa â do.
9 Chanô hryu a hmâh kawpa nata o kawh ngaitapa liata y hlâta cha, o chô lâ ki pazaohpa liata y a pha via.
10 Hmoparaopa palôhrupa chata hmo moleina khoh ta; a vaihzy ta â mo liata khokheina hmô veih ei.
11 Mohnao hmâhpazy hriepa ta ama y nata angâpazy chata so pâ tyh ei ta; a sopa cha pachupa ta a y nata pahnona a to tyh.
12 Chyhsa siapa chata hmoparaopa chhôhkha zy cha pachâ tyh ta; hmoparaopazy amâ ao nawpa ta pahleipadiapa ta ama chânazie zy,
13 Sipasapa awna lâta a nah a chahupa cha, ano chhao aw aw ta, châhrasala theipa ta y aw vei.
14 Aru lâta hmopiepa ta hiehâhna padia ta; kalachhôh liata hmopiepa ta thata hiehâhna rupa a padia.
15 Pachiana siapa he chyhsa siapa alyna châ ta, hmoparaopa a taotuhpa châta deikua chata leidiana a châ.
16 Pahnona lâpi tawhta a siesaipa cha, athipa y pakhyna hry liata â pahâ aw.
17 Lôhawhna kyh a pachâpa cha chyhsa sipasapa châ aw ta; kresawti nata sathaw a pasôpa chyhsa cha hneirôh aw vei.
18 Hmoparaopa cha a siapa chatlaina châ aw ei ta, dô hmâhpa cha a dopa chatlaina.
19 Chanô paphôh a hmâhpa nata pathi-iapa pahrâlâh hlâta cha, râhpathohpa liata ypa a pha via.
20 A sopa pahrâna liana chata ryu nata sathaw sôh ngaitapa y ta, chyhsa hrupa deikua chata a palâ khai tyh.
21 Siana nata zawngiana a zituhpa zy chata, hrona zy, siana zy, zana zy ama hmô aw.
22 Chyhsa sopa cha thatlôpa khihpi kiah ta, cha liata ama ngâ chaipa thatlôna cha a tiah tyh.
23 Ahyrai a pakah nata a paleih a phapa ta a vaihpa chata nôpona tawhta a hrona a phapa ta a vaih.
24 Chyhsa apalaipa nata tahsapa moh cha “A mohnaotuhpa” a châ, a parôhnahsapa apalaina ta hmo a tao tyh.
25 Thathipa saduthiena chata ano athiesao tyh; a ku ta raihriapa a khoh leipa vâta.
26 Noh y ta khohlei khopa ta uavana hneipa y ei ta, a siapa deikua chata pie ta, khâpa hmah pahlôh vei.
27 Hmoparaopa atheihna cha hmo pasichhihpa châ ta; palôhrupa moleipa chhaota a vaw hlapa cha pasi a chhih via pachai heih dia.
28 Pahnotuhpa pakheipa cha leidia aw ta, pahnotuhpa a dopa deikua chata ahy hmah ta reipasipasua leipa ta bie a reih aw.
29 Hmoparaopa ta a hmia kuh pachha ta, a siapa deikua chata a lâpi a phapa ta a tao tyh.
30 ABEIPA hmiakô liata cha, pahnona zy, sona zy, aryhraona zy khâpa hmah châ vei.
31 Arâ cha adyuhna noh chata a chhuahdypa châ ta, pahniena deikua cha ABEIPA eih a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||