1 Kresawti he, pahnei parâsaopa ta chyhsa a taotuhpa châ ta, sahhmah he a tu ngâna a châ; ahyrai cha chata dohpa ta a ypa maih cha so veih ei.
2 Abei pathi-iana cha chakeibarôhneipa a ropa hawhta châ ta; chyhsa a pathi apa-iapa cha anosasyh hrona chô liata hmo a paraopa ama châ tyh.
3 Ahryuna tawhta a pananona he hmo khochhihpa châ ta; ahrupa maih cha ama tu tyh.
4 Chyhsa diathlâpa chata chasipa vâta alei palie hoh leipa ta; chavâta sâh hria nota a ku dao aw ta, khâpa hmah hnei aw vei.
5 Ryhraona cha chyhsapa pathipalôh liata ti athuhpa hawhta châ ta, châhrasala pahno thaina a hneipa chata a sy aw.
6 Chyhsa hluhpi ta âmosasyh phana cha tlâh awhkhei tyh ei ta, châhrasala chyhsa ngâchhihpa cha ahy e a hmô thei tyh?
7 Chyhsa siapa ano ryhrao thaipa ta a ypa a sawzy cha byhnâ ama to.
8 Pachiana liata abeidyuchhai liata a tyupa chata a mo ta hmo moleina a pahlei tyh.
9 Ei pathipalôh pathai na ta; ei moleina tawhta ei pathaih na,”ahy ma a tah thei tly?
10 Khopathliana a nanopa zy, thliena a nanopa zy he, ABEIPA mohmô liata miakha sai hawhta hmo pasichhihpa a châ.
11 Hawtipa ta chhao tlai a hmotaopa ta a palâsa tyh, a hmotaopa cha a pathaih nata â do tlyma.
12 Theina nah nata hmôna mo he, ABEIPA taopa rairieh a châ.
13 Mokuna kyh pachâ khâ, na vaw dyhchhie pathlei aw na; na mo padeih la, chatanachata viahchhâ nie khi na hnei aw mâ tâh.
14 “Khâpa hmah châ vei he, Khâpa hmah châ vei he,” hmo a chaleituhpa chata tah tyh ei ta; ama sie tawhta deikua cha amâ palai kaw heih tyh.
15 Ngôh y ta, rubi lôsôhpa zy chhao hluh ta; pahnona hmao deikua cha lôsôhpa a sôh ngaitapa a châ.
16 Khichhaipa chata sôhkâ a pietuhpa chysia cha la la, khichhaipa chata sôhkâpa cha bie pataisa ta.
17 Dôna viahchhâ cha chyhsa ta a pahâsa, châhrasala a hnôh lâta a pakah cha masi ta a bie aw.
18 Hmo chhuahpa maih a ryhraopa ta pa-ipa châ tyh ta; a so ngaitapa ta chhithana ta adyuh teh.
19 Bie hohpa a hlaihlâpa chata bierupa zy palâsa tyh ta; chavâta a pakah kawhpa ta a âpa cha a pakyh khâ.
20 Ahyrai a paw tlyma, a nô tlyma a chhie a satuhpa cha, a zoh chaina liata a mei-ôh pachhai awpa a châ aw.
21 Ryutona hmiatua ta thlai hmô theipa, châhrasala a chhâna liata byhnâ châ hlei vei.
22 “Moleina cha viari ei thô aw,” tah khâ; ABEIPA liata hâ la, ano chata a cha pachha aw.
23 Khopathliana lô a nanopa zy he ABEIPA mohmô liata hmo pasichhihpa châ ta, khopathliana do leipa he a pha leipa a châ.
24 Chyhsa sienazy cha ABEIPA raopa châ ta; kheihta zieta e chyhsa ta lâpi ama pahno thei aw?
25 “A pathaih na,” tah thlâh hapa heta chyhsa châta khohei a châ, bietai hâ tawhta hiahri pasia heihpa zy hih.
26 Abei sopa chata hmoparaopazy papai ta, âmo chô liata a pasia tyh.
27 Chyhsa palôhrupa cha ABEIPA mei-ôh châ ta, py chhôh chaipa zydua chhao a pakhaihsa tyh.
28 Zawngiahna nata hmeihseihpa ta abei hrôbieh ta, abeidyuchhai cha zawngiahna liata paduapa ta a y.
29 Satliapazy rôhnahna cha ama thatlôna a châ, pawpizy a ngiana cha ama luh pawhpa a châ.
30 Hmah yna taihta tuna chata hmo moleipa pathaih ta; tuna chata py chhôh chaipa lâta chhao a pha.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||