1 Chyhsa a hmao liata chhorupa, a hru pâ hrapa hlâta cha sipasapa palôhrupa phapa phaohpa ta a ypa cha a pha via.
2 Pahnona leipa ta khona ngalâh chhao he pha leipa ta, phei chakâpa chatliepa ngalâh cha moleina a tao.
3 Chyhsa a hruna ta a lâpi parao pa tyh ta, a pathipalôh ABEIPA chô liata ruchhôna a hnei tyh.
4 Sôh ta viasa hluhpi pahneisa ta, sipasapa deikua cha viasazy ta ama pathlua aw.
5 Pahnotuhpa pakheipa cha hrie leipa ta y leipa aw ta, haipa a reihpa cha pua aw vei.
6 Chyhsa hluhpi ta riahphapa khokheina a haw aw ei ta, hmo a pietuhpa tawhna chata chyhsa to he viasa ama châ.
7 Sipasapa unawhpa cha ama zydua ta khoh leipa aw ei ta; a viasa tyhpa zy chhaota khatluta e amâ hla aw tly! Bie ta a chadai ta, châhrasala ama sie syulyu haw.
8 Sona a totuhpa chata ano hrona kyh pachâ tyh ta; pahnona a vaotuhpa chata hmophapa a hmô aw.
9 Pahnotuhpa pakheipa cha hrie leipa ta y leipa aw ta, haipa a reihpa cha a leidia aw.
10 Hro phana cha ahrupa nata a kyh leipa ta, chakaopa ta abeisawzy chô liata ryureipa cha a kyh lei pachai.
11 A pachâpady thaina ta chyhsa pathi panaisa tyh ta, paraona a mopakhôpa cha rôhnahna a châ.
12 Abei hiehâhna cha chakeibarôhneipa a rôhpa hawhta châ ta, a khokheina cha sibiepa chôta diati hawhta a châ.
13 Sawchapaw hrupa cha a paw vâchhiena châ ta, lahpinô paphôh tyhna cha khatino raita a di a tla ngâpa hawhta a châ.
14 O nata hneirôhna cha pawzy tawhta ryuto châ ta, lahpinô aryhna a pahnopa deikua cha ABEIPA tawhtapa a châ.
15 Thathina ta mokuthuna liata pangiasa ta, chyhsa thathipa chata nodi a tao aw.
16 Biepiepa a vaopa chata a hrona a phapa ta a vaopa châ ta; a yzie liata a chado leipa deikua cha a thi aw.
17 Sipasapa a ngiachhiepa chata ABEIPA a pacheisapa châ ta, a hmotao phapa cha a thô aw.
18 Hnabeiseina a y nota na sawchapawpa cha chhorei la; a leidia thlâh ha awpa ta pachâ khâ.
19 Hiehâhna thata a hneipa chyhsa cha hriena a tao aw; na pachhapa chhaota pachha heih tyhpa a byuh aw.
20 A chhâna lâta na so thei nawpa ta rana a pyh la, chhoreina a papeisa teh.
21 Chyhsapa pathipalôh liata a chhuahna hluhpi y ta, ABEIPA ryhraopa deikua cha a ualua ta a y thlâh ha aw.
22 Chyhsa a saduthiepa cha a nôphana yzie thliena châ ta, a haih thaipa hlâta cha sipasapa kho â chhih via.
23 ABEIPA china chata hrona tlôkhei ta; a hneipa maih cha palôh châpa ta y aw ei ta; hmo moleina tlô thlupa ta y aw vei.
24 Chyhsa thathipa chata a ku beihko liata ny ta, a pakah lâta chalo heih awpa dâhdei chhao hoh vei.
25 Nawhtaw a hmâhpa cha tu la, chatanachata angâpa ta aryhna pahnona â chu aw ta; pachâ thaina a hneipa cha chhorei la, a pahno thai aw.
26 Pawzy rie patheipa ta nô zy a papuapa cha, sawchapawpa maohphyuhna nata mohchhiena a tlôkheituhpa a châ.
27 Ei saw y, hmo do leipa liata sona pachuna bie nahthliepa cha ba teh.
28 Bie pahnotuhpa dyutlai leipa chata pachiana nawhtaw ta, hmoparaopa pakah chata paraona a palâ.
29 Pachiana cha nawhtaw a hmâhtuhpa zy châta a chhuahdypa châ ta,tuna cha ahrupa kyh châ ta.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||