1 Anosasyh ta a pachhaihpa ta a ypa chata ano khona zie tlua tyh ta, sona a dopa zydua â dyuh tyh.
2 Ahrupa chata pahnona liata alyna hnei vei, ano pathipalôh ta a palâsapa dei leipa ta cha.
3 Hmoparaona a vaw y nata mohnaona chhao a vaw y tyh; maohphyuhna a vaw y nahta rana.
4 Chyhsa pakah liata bie cha ti athuh ngaitapa hawhta; sona tihnawh vatie a lohpa hawhta a châ.
5 Hmoparaopa khokheipa cha pha leipa ta, pachiana liata a siapa paviasapa cha pha hra vei.
6 Ahrupa hmao chata ahryuna tlôkhei ta, a pakah chata tuna a aw.
7 Ahrupa pakah cha a leidiana châ ta, a hmao cha a hrona khohei a châ.
8 Hohiahpa ta bie rei a hmâhpa bie cha pati pahâh ngaitapa hawhta châ ta; py chhôh chaipa liata â ngia tyh.
9 Chyhsa a raihria liata thathipa cha a unawhpa râh paraona a châ.
10 ABEIPA mo cha kuh sapa thatlôpa châ ta; chyhsa siapa cha a boh nawpa ta cha lâ cha â râ tyh.
11 Chyhsa hneirôhpa chata a sôh cha a khihpi thatlôpa châ ta, a pachâpadypa liana chata alô sahdô a sapa hawhta a châ.
12 Chyhsa pathipalôh apalaina cha leidiana hmiakô liata sie ta, areisina cha palyupalihna hmiakô liata.
13 Thei hlâta achhypa cha a châta hrupa châna nata maohphyuhna a châ.
14 Chyhsa palôh a hneipa chata a thatlô leina cha pasa tao aw ta; châhrasala palôhrupa hmah cha ahy e a tao thei aw?
15 Aryhna a pahnopa pathipalôh chata pahnona to tyh ta, a sopa nahkhao chata pahnona a tlua tyh.
16 Chyhsa a hmopiepa ta lâpi paypa ta, chyhsa rôhnahpa zy hmiakô liata a chhih tyh.
17 Ano thaina bie a reih tuatuhpa cha siapa ta â lâ, tyh ta, châhrasala a vaihzy a vy ei ta ama vaw palasa tyh.
18 Pachaona ta ahryuna pabâsa ta, thatlôpazy a pachhaih tyh.
19 Unawhpa ru pâhchhôpa cha khihpi thatlôpa hlâta pahnie a ru via, cha hawhpa ahryuhna cha kuh hawhta a châ.
20 Chyhsa ta a py cha a pakah patheipa ta pabie aw ta; a hmaozy ta a papôna ta lôhrâ tlôpa ta a y aw.
21 Paleih hmotaotheina liana chata thina nata hrona y ta, a pasôtuhpazy chata cha liata a patheipa cha ama nie aw.
22 Lahpinô a hmôpa chata hmophapa a hmôpa a châ, ABEIPA khokheina a to tyh.
23 Sipasapa chata a reipasao ta reipasao ei ta, a hneirôhpa deikua thlai a chhy tyh.
24 Viasa hluhpi hneipa chata anosasyh paraona tao ta, anodeikua cha unawhpa hlâta â i viapa viasa a y.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||