1 Atu ngâpa kyhchhina o hlâta cha, aryh ngaitapa ta laochhohpa kawhkha niepa a pha via.
2 Sei sopa chata sawchapawpa maohphyuhna a tlôkheituhpa chô liata ryu reih aw ta, unawhpa ryu hry liana chata tovyuh a hnei aw.
3 Pathaisana beih cha tâkâri châta châ ta, patina cha ngôh châta châ ta, pathipalôh deikua cha ABEIPA ta a pasia tyh.
4 Hmopha leipa a taotuhpa chata hmoparaopa hmaokah nahthlie tyh ta; haihthaipa chata hmo peipa hria a hmâhpa paleih lâta a nah a pachôh tyh.
5 Sipasapa a mohnaotuhpa chata a Taotuhpa a mohnaopa châ ta; vâchhiena a eilawtuhpa cha hrie leipa ta y aw vei.
6 Tu nata sawzy he machâzy lakho châ ei ta, sawnawhzy rôhnahna cha ama pawzy he ama châ.
7 Reiphapa nata ahrupa a ky leipa ta; hmao haihthaipa nata abeisaw a ky lei pachai.
8 A totuhpa mo liata cha hmopiepa cha lôsôhpa hawhta châ ta; â heina lâ maihta vânoh a to tyh.
9 Hmo taopasina a nyutuhpa chata kyh a pachâna tlua ta, reih hluhpa chata viasazy a pachhaih tyh.
10 Ahrupa chôta ei zakha chheipa hlâta a sopa liata cha ei kha chhoreina chhao a thuh viata â ngiah.
11 Chyhsa moleipa chata atyna dei tlua tyh ta, chavâta a chô liata lyuhchâpa nôchhiepa tuapa a châ aw.
12 Ahrupa a hru nota atypa hlâta cha, chavyh a taw lapa hawhpa atyhpa kho â chhih via.
13 Ahyrai ta phana moleina ta viari a thôtuhpa cha, hmo moleipa ta a o puasai aw vei.
14 Ahryuna a thaona cha ti leithapa hawhta châ ta; chavâta ahryuna a y pathao hlâta bâh teh.
15 Hmoparaopa a pasiatuhpa nata a siapa thai lei a pachâsatuhpa cha, ABEIPA chata miakha saita pasichhihpa ama châ.
16 Pahno thaina a hnei tlôh leipa a hrupa ku liana chata khazia sona chaleina awpa ty a y tly?
17 Kei(viasa) chata khati no raita a kyh pachâ ta, nôpo noh chata unawhpa ta a pihpa a châ.
18 Pahnona a hnei leipa chata bie taih ta, a vaihzy hmiakô liata sôhkâ a tao tyh.
19 Ahryu a khohpa chata paraona tyh ta; a o dôhna chhikao pasâhpa chata leidiana a tlua tyh.
20 Pathipalôh chhorupa chata hmophapa hmô tyh leipa ta, paleih dyutlai leipa a hneituhpa chata paraona liata â ngia tyh.
21 Ahrupa a satuhpa chata ano pachârôhna tlôkhei tyh ta; ahrupa paw chata alyna hnei vei.
22 Pathipalôh thaphapa he thohna pha ngaitapa châ ta, pathipalôh pachâ chhiepa deikua chata ru a paraoh tyh.
23 Hmoparaopa chata pachiana kyhzy paviasa awpa ta, chyhsa kalachhôh tawhta hmopiepa ala tyh.
24 Sona cha pahno thaina a hneituhpa hmiako liata y tyh ta. ahrupa moh deikua cha kaoki liata a y.
25 Sawchapawpa hrupa cha a paw pachâ a parôhtuhpa châ ta, a satuhpa nô châta a kha.
26 A siapa hriepa cha pha leipa ta; chyhsa phapa ama phana vâta tupa pha hra vei.
27 A bie reipa liata a chado tyhpa chata sona hnei ta, palôhrupa tlâhpa chata pahno thaina a hnei.
28 Ahrupa chhao he â chalih thlâh ha khiahta cha sopa ta reipa châ ta; a hmao a mo khiahta cha pahnona kyh a hneipa hawhta a ngiahpa a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||