1 Achhyna naipa ta hiehâhna papai tyh ta, rei chhiepa deikua chata hiehâhna a pathyu tyh.
2 Chyhsa sopa paleih chata pahnona bie dopa papua tyh ta, ahrupa pakah deikua chata bie khâpa hrao leipa a papua tyh.
3 ABEIPA mo cha su to liata y ta, hmopha leipa nata hmophapa a moh thlâh ha tyh.
4 Paleih dopa cha hrona tho châ ta, chhoruna yna deikua cha pathipalôh pachâchhiena a châ.
5 Ahrupa chata paw chhoreina nawhtaw tyh ta, a rana a pasasapa chata aryhna pahno ngaitapa ta a tao tyh.
6 A siapa o liana chata sôh hluhpi y ta, hmoparaopa athôhna deikua cha tymâna a châ.
7 Chyhsa sopa hmao chata pahnona pakawh ta; ahrupa pathipalôh deikua chata cha hawhpa cha tao vei.
8 Hmoparaopa atheihna cha ABEIPA châta pasichhihpa a châ, chyhsa phapa thlahchhâna deikua cha âlyna zie a châ.
9 Hmoparaopa lâpi cha ABEIPA châta pasichhihpa châ ta, siana lâpi a chhihtuhpa deikua cha kyh a pachâ tyh.
10 Lâpi a heisaituhpa chata chhoreina ru kawpa y ta, a rana a haopa cha a thi aw.
11 Sheôl nata Abadon cha ABEIPA hmiakô liata y ta, chyhsa pathipalôhzy cha khatluta sia viapa ta ma a y aw tly!
12 Mohnao thaipa chyhsa chata rapa ta ypa pasô leipa ta, a sopa lâna chata vawh khoh vei.
13 Pathipalôh alyna ta hmia alyna tao ta, pathipalôh chhiena chata palôhrupa a pachhiesa tyh.
14 Pahno thaina palôhrupa a hneituhpa chata novâhna tlua ta, ahrupa pakah deikua cha haipa ta a pabie tyh.
15 Riethei a taotuhpa chata noh zydua he a pha leipa sai châ ta, pathipalôh thaphapa deikua chata kyhchhiena khâ a hnei thlâh haw.
16 ABEIPA china chôta a chyhta hneipa cha, a hluhpi hneipa ta atymâpa hlâna chata a pha via.
17 Ahaona chôta viahchao tôhpa thawpa nie hlâta cha, kyhpachâna chôta âhna pati nie a pha via.
18 Chyhsa pathi chhiepa chata adyuhna pathyu ta, nônaipa deikua chata ahryuna a papai.
19 Thathipa lâpi cha ahloh dôpa hawhta châ ta, a dôpa lâpi cha lâlai ta taopa a châ.
20 Sawchapaw sopa chata paw thaphana tao ta, ahrupa deikua chata a nô a mohnao tyh.
21 Sona a hnei leipazy chata hruna he ama thaphana châ ta, a pahno thaipa deikua chata a lâpi a patlâh tyh.
22 A chatlie chakohpa ta hmo pachâpa cha hrao leipa châ ta, dusawta hmo pachâpa cha daihti reipi â daih.
23 Chyhsa ta a pakah ta achhyna liata palysa thei ta, bie a daihti ta reipa he a pha kaw dia!
24 A sopa châna chata hrona lâpi he a chô lâta sie ta, a ry lâta Sheôl cha a siesai thei nawpa ta.
25 ABEIPA ta a palaipa chhôhkha cha parao aw ta, nôhmei su deikua cha a pa-i aw.
26 Chyhsa chhiepa pachâna cha ABEIPA châta pasichhihpa châ ta, mo pathaihpa bie deikua cha nahtlapa a châ.
27 Karâypa chata ano chhôhkha patypamâ tyh ta, panaopapâna a haotuhpa deikua cha thlao â chhi.
28 Chyhsa siapa cha a chhy hlâta pachâ aw ta, chyhsa chhiepa deikua chata hmopha leipa a papua tyh.
29 ABEIPA cha hmoparaopa tawhna chata a hla ta, a siapa thlahchhâna deikua cha a nahthlie tyh.
30 Mo chyhpa chata pathipalôh tha papha ta, thâti phapa ta rupa a pathawh.
31 Hrona chhoreina nah a pachôh tyhpa cha, a sopa hry liata â hlao aw.
32 Padona a khoh leipa chata a thlahpa a nawhtaw, chhoreina a pyhpa deikua chata novâhna a to aw.
33 ABEIPA china cha sona pachuna châ ta, a reisina cha palyupalihpa ta yna a châ.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||