1 Chanô sopazy ta ama o sa ei ta, ahrupa deikua chata ama ku tlaita ama phie tyh.
2 A dona kyh liata a chareipa chata ABEIPA chi ta, chyhsa chhorupa deikua chata a mohnao.
3 Ahrupa pakah liana chata apalaina sôsi y ta, a sopazy hmaozy deikua chata âmo a hrôbieh tyh.
4 Viahchao tôhpa y leina liana chata viahchao lao sona pathai tyh ta; anodeikua a hneirôna pôhna cha viahchao tôhpa tha liata a y.
5 Pahnotuhpa ngâchhihpa cha haih leipa aw ta, pahnotuh pakheipa deikua chata haipa a reih tyh.
6 Nawhtaw a hmâhpa chata sona tlua ta, hmô tyh leipa ta, pahno thaina a hneituhpa châna deikua chata sona he nao ngaitapa a châ.
7 Ahrupa tawhna cha siesai teh, ano tawhna chata pahnona khâpa hmah hmô aw va chi.
8 Ryhpaona a pahnopa sona cha ama yzie pahnopa he châ ta, ahrupazy hruna deikua cha dôna a châ.
9 Ahrupazy chata thai lei châna he khâpa hrao leipa ta pachâ ei ta. chyhsa dopa deikua cha Khazohpa a pazaona a hnei.
10 Pathipalôh chata ano khana pahno ta, khichhaipa chata alyna liata a hlaona hnei vei.
11 Hmoparaopa o cha paraopa ta y aw ta, a dopa poh-o deikua cha vânohtopa ta a y aw.
12 Chyhsa pachâ ta lâpi a dopa hawhta alâpa, a chhâna cha thina lâpi a châ tlôhpa a y.
13 Pahneina liata chhao pathipalôh pachârôhna y ta. thaphana cha pachârôhna lâta â lie tyh.
14 Pathipalôh liata hnôh lâ a sypa chyhsa cha ano khozie ta bie aw ta, chyhsa phapa cha anosasyh ta palôh a patlâh aw.
15 Angâpa chata bie to zo ta, ryhpaona a pahnopa deikua chata a siena a phapa ta a moh tyh.
16 Chyhsa sopa chata a chado ta, moleina siesai tyh ta, ahrupa deikua cha a riah a paphasa, anosasyh ta â ngâ tyh.
17 Pathipachhopa chata hruna hmo tao aw ta, hmo moleipa pachô a hmâhpa cha ahaopa a châ.
18 Angâpa chata hruna to aw ta, aryhna a pahnopa deikua cha pahnona pakhopa ta a y aw.
19 Chyhsa moleipa cha chyhsa phapa hmiakô liata a bôh ta, hmoparaopa cha chyhsa siapa chhikao thaby liata a y.
20 Sipasapa cha a vaihzy tlai chhaota ahao ei ta, hneirôhpa deikua chata viasa hluhpi ama hnei.
21 A vaihzy a mohnaopa chata a molei, sipasapa a pasôtuhpa deikua cha thaphapa ta a y.
22 Hmo moleina tao a chhuah leituhpa zy chata taopasi veih ei ma? Hmophapa a pachâpadytuhpa deikua chata zawngiahna nata hmeihseihna liata a y aw.
23 Hriapasana to liana heta athôhna y ta, reikah hluhpa chata dyhchhiena a tlôkhei.
24 A sopa lakho cha hneirôna châ ta, ahrupazy hruna cha hruna deita a châ.
25 Pahnotuh dopa chata hrona zy pachha ta, haipa a reihpa chyhsa chata dona a papua tyh.
26 ABEIPA china liana chata ngâna thatlô ngaitapa y ta, a sawzy chata a hrôbiena su ama hnei aw.
27 ABEIPA china cha hrona tihnawh a châ, thina khohei a heisai nawpa ta.
28 Zawpi hluhna cha abei rôhnahna ngiana a châ, chyhsa chyhna liana deikua chata abeisaw leidiana a y.
29 Hiehâhna lâta a nainôsôpa chyhsa cha sona thata a hneipa chyhsa châ ta, chahraochatôhpa deikua chata hruna a palyupalih.
30 Palôhrupa tlâhpa cha sapa hri-iah pathaihna châ ta, hnâchhaona deikua cha ru hmyna a châ.
31 Sipasapa riepatheisapa cha a Taotuhpa riepatheisapa châ ta, phahlapazy ngiachhietuhpa chata a palyupalih.
32 Hmoparaopa cha hmo chhiepa taopa liata leidiapa châ ta, a siapa deikua chata thina liata hnabeiseina a hnei.
33 Pachâ thaina a hneipa pathipalôh liata sona y ta, ahrupa chhôh lâta a ypa deikua cha a lâ thlâh haw.
34 Siana ta phopi parôhnahsa ta, moleina deikua cha pho to châta maochhiena a châ.
35 Abei khokheina cha chyhsa novâhpa liata piepa châ ta, a pathi-iana deikua cha maohphyuhna a tlôkheituhpa chô liata a y aw.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||