1 Chhoreina a pasôpa chata pachuna pasô tyh ta, rana kyh a haopa deikua chata râhsa hawhpa dei a châ.
2 Chyhsa phapa chata ABEIPA khokheina hmô aw ta, moleina palôh a phaohpa deikua cha thai lei a pachâsa aw.
3 Chyhsa cha hmoparaona ta pa-ipa châ leipa aw ta, chyhsa siapa duahmo deikua cha a chalyu aw vei.
4 Chanô kôpa cha a vahpa châta lakho châ ta, maohphyuhna hmotaopa deikua cha a ru a pahmytuhpa a châ.
5 A siapa pachâna zy cha a do ta; hmoparaopazy aryhraopa deikua cha dôna a châ.
6 Hmoparaopa pakah cha thisaih palo awpa ta a byhpa châ ta, a dopa pakah deikua chata âmo a pachha aw.
7 Hmoparaopazy cha thy pathlapa ta y ei ta, lei tyh ei ta, a siapa chhôhkha deikua cha ama y thlâh ha aw.
8 Chyhsa a sona yzie lymâ hawhta reithaipa ta y aw ta, chhorupa deikua cha nawhtawpa a châ aw.
9 Anosasyh ta za a pachhisapa ta viahchhâ chhao a hnei tlôh leipa hlâta cha, Ahy hmah pasâhsa leipa chakaotuhpa a hneipa cha a pha via.
10 Chyhsa siapa chata a sahroh hrona a pachâ khoh, châhrasala hmoparaopa pachâna cha nôchhiena a châ.
11 Alei a palietuhpa chata viahchhâ hnei aw ta, khâpa hrao leipa chyhsa taona zie azituhpa cha sona a hnei leipa chyhsa a châ.
12 Hmoparaopazy kuh cha cho aw ta; a siapazy thari deikua cha â i aw.
13 Hmoparaopazy chata paraona hmao cha khoheih châ ta, châhrasala a siapazy cha tymâna tawhta ama pua aw.
14 Chyhsa ta a reikah a puapa thei cha hria aw ta, ano ku hmotaopa tlai cha ano lâta hlâpa a châ aw.
15 Ahrupa lâpi cha ano mokhaoh liana chata a do ta, a sopa deikua chata chhosiena ama nahthlie tyh.
16 Ahrupa tymâna cha thlai a la ta, a sopa deikua chata maohphyuhna anyu tyh.
17 Hmeihseihna bie a reihtuhpa chata siana pamosa ta, pahnotuhpa pakheipa deikua chata dôna.
18 Zaozi chhôpa hawhta a pasapa ta bie areihpa y ei ta, a sopa paleih deikua cha tlâhna a châ.
19 Biedopa reipa cha chhâzaw châta châ aw ta, haipa bie deikua cha buakha châta a châ.
20 Hmopha leipa a pachâtuhpazy palôh liana chata dôna y ta, dyhna a chhosietuhpazy deikua chata lyna ama hnei.
21 A siapazy chô liana chata hmoparaona tlô leipa aw ta, hmoparaopazy deikua cha hmo moleipa ta ama bie aw.
22 Haihthaipa he ABEIPA pasina zie châ ta, a dopa ta a taotuhpa zy deikua cha alyna zie a châ.
23 A sopa chata sona nyu ta, ahrupa pathipalôh deikua chata hruna a phuah.
24 Chyhsa tiamapa ku chata ryureina chaba aw ta, thathipa deikua cha hriapasapa ta hria awpa tahpa a châ aw.
25 Pachâ rôhpa chata chyhsa pabôhsa ta, bie phapa deikua chata a palysa tyh.
26 A siapa cha vaih châta chhithatuhpa châ ta, hmoparaopazy lâpi deikua chata leina a tlôkheipa tyh.
27 Chyhsa thathipa chata niepa a hmô leipa ta, chyhsa hriapasapa deikua chata niepa a hnei hluh.
28 Siana lâthlôh liana chata hrona y ta, cha lâthlôh liana chata thina y vei.
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||