1 Khopatliana do leipa he ABEIPA mohmô liata hmo pasichhihpa châ ta, khopathliana a dopa deikua cha alyna zie a châ.
2 Palaina a vaw y nota maohphyuhna vaw y ta;reisipazy lâna deikua chata sona a y.
3 A siapa palôhrupa phana chata âmo a chhi aw ta, piehpiepazy chhoruna deikua chata âmo a pahleipadia aw.
4 Hiehâhna noh liana chata hneirôna ta phahnaina hnei leipa aw ta, siana deikua chata thina tawhta a pachha aw.
5 Chyhsa pha pakipa siana chata a siena pahmo aw ta, hmoparaopa deikua chata hmoparaona ta a papao aw.
6 Chyhsa a dopa siana chata âmo pachha aw ta, piehpie ngaitapa ta a taotuhpa zy deikua chata âmo paraona tlaita patupa ta ama y.
7 Hmoparaopa cha a thi nahta a hnabeiseina cha leidia aw ta, hneirôhna a hnabeiseina cha a leidia aw.
8 A siapa cha nôpona tawhta papuapa ta y ta, hmoparaopa ta a su cha tlao a to.
9 Khazohpa pachâ leipa chyhsa chata a pakah ta a vaihzy pahleipadia ta, a siapa deikua cha pahnona vâta pachhapa ta a y aw.
10 A siapazy chô liata hmo a pha nota khihpi cha thaphapa ta y ta; hmoparaopazy ama thi nota awh ngâna y ta.
11 A siapazy byhnâ ta khihpi palyupalihpa ta y ta, hmoparaopazy pakah deikua chata a parao.
12 Vaih a nawhtawtuhpa chata sona hnei leipa ta, pahnona a hneipa deikua cha a chalih tyh.
13 Pakah sopa chata bierupa zy phuah ta, palôhrupa ngâchhihpa a hneipa deikua chata chyhsa zy a nyu tyh.
14 Achhihthana sopa y leina liana chata chyhsa zy pao tyh ei ta; ryhrao thaipa hluhna liana deikua chata abohna a y.
15 Khichhaipa chata pahnokheituhpa ta a taopa chata pachârôhna a tao aw ta, pahnokheituhpa ta y a khoh leipa deikua chata palôh pahâhpa ta yna a hnei.
16 Chanô phapa chata zachhihna to aw ta, thachahra ta la a hmâhpa chyhsa ta sôh a to aw.
17 Zawngiah theipa chyhsa chata ano hrona châta hmophapa tao tyh ta, chyhsa nôchhiepa deikua chata ano sapa tymâna a tlôkhei tyh.
18 Hmoparaopa chata dôna hlao tyh ta, siana a taotuhpa deikua chata a hmeihseihpa hlao a to tyh.
19 Siana liata a ipa ta a duahpa chata hrona to aw ta, hmo moleipa a chadaituhpa chata ano thina.
20 Chyhsa palôhrupa chhorupa zy cha ABEIPA châta pasichhihpa châ ei ta, ama lâpi liata chyhsa siapakipa deikua cha a lyna zie ama châ.
21 Bie a paraoh hra ei sala hmoparaopazy cha hrie leipa ta pua leipa aw ei ta, a siapa pathlazy deikua cha pachhapa ta ama y aw.
22 Chanô chhithaipa, pachâna a hnei leipa cha, vao hmaothy liata ngôh lôsôpa hmobaoh pataopa hawhta a châ.
23 A siapa saduthiepa cha hmophapa dei châ ta; hmoparaopa hnabeiseina deikua cha hiehâhna a châ.
24 Hie patlapa cha pôh rilina châ ta, byuhpa hleikhô ta ria-ypa ta a ypa cha phahlana a châ.
25 Chyhsa riahphapa cha pahneirôhsapa ta y ta, ti a bao tyhtuhpa chata anosasyh chhao â bao.
26 Sâh pasaih leituhpa cha chyhsa ta chhie sapa aw ei ta, a zuahtuhpa luh chô liana deikua chata byhnâ a y aw.
27 Phahnai khohpa ta phana a tluatuhpa chata khokheina a tluapa châ ta, hmo parao awpa a tluatuhpa deikua cha ano chô liata a tlô aw.
28 A hneirôh angâpa cha uah aw ta, a siapa deikua cha sibiepa hrohpa hawhta a laiseih aw.
29 Ano chhôhkha a patypamâtuhpa chata thlih to aw ta, ahrupa cha chyhsa pathipalôh sopa chakaopa ta a y aw.
30 Chyhsa siapa thei cha hrona tho châ ta, a sopa chata chyhsa pathipalôh a pahnie tyh.
31 Siapa hmahta alei liana heta thôpa ama châ khiahta cha, hmoparaopa nata moleipa cha khatlu ta tha viapa ta ma a châ aw tly!
| Bo 1 | Bo 2 | Bo 3 | Bo 4 | Bo 5 | Bo 6 | Bo 7 |
|---|---|---|---|---|---|---|
| Bo 8 | Bo 9 | Bo 10 | Bo 11 | Bo 12 | Bo 13 | Bo 14 |
| Bo 15 | Bo 16 | Bo 17 | Bo 18 | Bo 19 | Bo 20 | Bo 21 |
| Bo 22 | Bo 23 | Bo 24 | Bo 25 | Bo 26 | Bo 27 | Bo 28 |
| Bo 29 | Bo 30 | Bo 31 | ||||